E Na’o Tusiga Faaeletonika: Talavou Matutua
Faatoilaloina o le Lēlavā Faaleagaga
E nofo le tusitala i le United Arab Emirates.
Ina ua ou toe foi mai mai la’u misiona, sa ou lagonaina le mamafa tele o le mea e sosoo ai.
Na ou fiafia i la’u misiona. Ae ina ua ou toe fo’i mai i le aiga i Filipaina, sa ou feagai ma le tele o le popole ona o se mea ou te ta’ua o le “lelava faaleagaga.”
Ia te a’u lava ia, o le lelava faaleagaga o lona uiga o le lagonaina o le matuai vaivai lava pe a uma ona tuuina atu mea uma e te mafaia. O lenei mea na aafia ai lo’u olaga i le tulaga ou te nofo ai i lo’u potu i le aso atoa ona sa ou matua vaivai lava.
I le avea ai ma se faifeautalai ua mae’a mai, sa ou lagonaina ai le faamamafa mai lo’u aiga, uo, ma le nuu e faatatau i tonu fai o lo’u olaga. Sa ou lagonaina e pei o tagata na siomia a’u sa tele ni o latou manatu e uiga i filifiliga sa ou faia ma mea e tatau ona ou faia—sa lofituina. Sa ou nanaina o’u lagona mai tagata uma aua ou te le manao e faanoanoa i latou.
I le aluga o taimi, na matuā tele na’uā le mamafa mo a’u e onosaia.
Na ou lagonaina e pei lava ona faamatala mai e Elder Dieter F. Uchtdorf o le Korama o Aposetolo e Toasefululua.
“O nisi taimi e sausau malie ai lava le lafotuina faaleagaga lea e faafaigata ai ona tatou iloaina le mea o loo tupu. E pei o vaega o papa e faaputuputu, e faapena tiga ma faanoanoaga faaleagaga e mafai ona fatufatu i le aluga o taimi, ma mamafatu ai i o tatou agaga seia oo ina a toetoe lava lematatalia le mamafa tele. Mo se faataitaiga, e mafai ona tupu lenei mea pe a lofituina tele o tatou tiutetauave i galuega, aiga, ma le ekalesia lea tatou te le vaaia ai le olioli o le talalelei. Tatou te ono lagonaina foi e pei ua le o toe i ai se mea tatou te foai atua, pe faapea foi o le ola ai i poloaiga ua le gafatiaina e lo tatou malosi.
E ui lava sa ou lagonaina faapea, ae sa mafai ona ou maua le filemu a o ou liliu atu i le Tama Faalelagi mo le taitaiga. O auala nei e tolu na ou faia ai:
1. Lafoaia o Faamoemoega o Isi
O faamoemoega o isi na faigata ai ia te a’u ona maua le filemu sa ou manaomia e toe suia ai i le olaga i le aiga o se faifeautalai ua mae’a mai.
O lea sa ou tatalo ai po o le a le itu e tatau ona ou uia mo lo’u lumanai ma ta’u atu i le Tama Faalelagi e uiga i le mamafa o loo o’u lagonaina. A o ou galue e valaaulia le Agaga i lo’u olaga, sa ou lagona le uunaiga e fai se laasaga mamao o le faatuatua ma siitia atu i le Iunaite Arab Emirates e faigaluega. O lenei musumusuga sa matuai le’i faamoemoeina lava, ma sa toatele tagata i lo’u nuu sa faateia ina ua ou mulimuli i lenei uunaiga.
Na faafuasei lava ona ou lagonaina le tele o le faamoemoe! Sa ou lagonaina e ala mai i le Agaga, sa taitaiina a’u e le Atua i se itu o le a aumaia ai ia te a’u le faamalologa sa ou manaomia.
O le aoao e lafoai faamoemoega sa i ai i isi tagata mo a’u ma taulai atu i le taitaiga a le Tama Faalelagi na mafai ai ona ou agai i luma ma le faamoemoe ma le faatuatua.
Na aoao mai foi Elder Uchtdorf, “O le a tatou maua se faamalologa faaleagaga pe a tatou o ese mai atalafoia o le lalolagi ma o atu i le Malamalama o Keriso e faavavau.”
2. Faasaolotoina o A’u Lava mai Faatusatusaga
Ina ua ou toe foi mai i le fale mai la’u misiona, sa ou tauivi foi ma le faatusatusaina o a’u lava i isi.
Na saunoa Elder Uchtdorf i le matautia o le faatusatusaga, ma faapea mai: “Tatou te faaaluina le tele o le taimi ma le malosi e faatusatusa ai i tatou lava i isi[.] … O lenei mea e mafua ai ona tatou fatuina ni faamoemoega mo i tatou lava ia e faigata ona ausia. O se taunuuga la, tatou te le patipatia lava a tatou taumafaiga lelei, aua e foliga mai e laiti atu nai lo mea e fai e se isi tagata.”
Sa ou taulai tele atu i mea sa faia e isi faifeautalai ua toe foi mai, lea na ou lagona ai e pei e le o tele so’u alualu i luma. Ae o le ole atu i le Tama Faalelagi mo se fesoasoani i le suia o lo’u taulaiga ma le taumafai malosi e faia lena mea na mafai ai ona faaitiitia lo’u popole i mea sa faia e isi. Nai lo lena, sa ou taulai atu i lo’u ala tulaga ese ma laasaga e mafai ona ou faia i aso taitasi agai i a’u sini faaleagaga ma faaletino.
3. Ia Taulamua Faaleagaga
O le siitia atu i Dubai na aoaoina ai a’u i le taua o le taulamua. Po o a lava o tatou tulaga, e mafai ona tatou taulamua e faia ni suiga ma saili Keriso i soo se mea tatou te i ai.
E ui lava sa foliga mai sa faaosogata le talalelei ina ua ou toe foi mai i le fale mai la’u misiona, ae o le auai pea o le tali moni lea i o’u lagona o le lelava. Sa ou mauaina le filemu ma le faamalologa sili atu a o ou faia se taumafaiga e avea ma se vaega o la’u uarota ma faaavanoa se taimi mo le Alii i aso taitasi.
Na molimau mai Peresitene Russell M. Nelson e uiga i lenei manatu faavae, ma faapea mai: “Tatou te manaomia ni aafiaga i aso taitasi e tapuai ai i le Alii ma suesue i Lana talalelei. Ou te augani atu ia te outou ia faamuamua le Atua i lou olaga. Avatu ia te Ia se vaega talafeagai o lou taimi. A e faia lenei mea, ia matau le mea o loo tupu i lou malosiaga lelei faaleagaga.”
Pe a ou feagai ma le lē fiafia faaleagaga, ua ou iloa nei o le ala e maua ai le filemu o le faatumauina lea o le saoasaoa faaleagaga. O se tasi o auala e mafai ona tatou faia ai lenei mea o le liliu atu lea o lo tatou taulaiga i le Faaola ae lafoai faamoemoega o isi.
Pe a ou faia lenei mea, ou te maua le filemu ou te manaomia e agai ai i luma i le ala o le feagaiga—tasi le laa i le taimi.