“Ou te Fiafia Tele i le Pese Lena,” Liahona, Aok. 2024.
O Leo o le Au Paia o Aso e Gata Ai
Ou te Fiafia Tele i le Pese Lena
O upu i se viiga e sili ona fiafia i ai na faamanatu mai ai i lo’u tina e tatau ona tatou aapa atu ia i latou e manaomia le fesoasoani.
Ata na tusia e Katy Dockrill
O lo’u tina, o Dorothy Candland Woodruff (lea ua maliu nei), sa tatau ona taunuu i Regina, Saskatchewan, Kanata, i se tasi aoauli, ae sa misi lana vaalele. O lea sa toe faatulaga ai lana malaga, e aofia ai ma le faatalitali i Colorado, ISA, ma Calgary, Alberta. O le a le taunuu o ia seia oo i le vaeluaga o le po. I le le fiafia, sa amata ai lana malaga.
O lana malaga lona lua sa tumu ma pisapisao. Sa taumafai o ia e fai se galuega, ae amata ona tagi se teineitiiti i le isi itu o le alasavali. Sa le onosai o ia i lona tina, o lē sa siiina se pepe laitiiti. Sa nofo le tamā o le teineitiiti i luma o lo’u tina ma se isi tamaitiiti, pe a ma le lima [tausaga].
Sa talanoa lemu atu le tina o le teineitiiti i lana tama teine, ae sa faasolo ina leotele le tagi a le teineitiiti.
“Sa manino lava sa lei saunia e lenei aiga le la fanau mo le malaga,” o le tala lea a lo’u tina ina ua faasoa mai mulimuli ane lona aafiaga i lo matou aiga. Mo le lesona na sosoo ai, ou te faaaogaina ana upu:
“Mulimuli ane, sa sii atu e le tina lana tama teine tagi i le faletaele. I se taimi puupuu mulimuli ane, sa toe foi atu ai le tina ma le teineitiiti, o le sa maligi pea ona loimata—loimata filemu, sa ou māitauina ma le faafetai. Sa nofo o ia i lalo ma opo mai lana tama teine i ona lima, ma luelue o ia i tua ma luma ma le agamalu. Ona ou faalogoina lemu lea o lana pese ‘O A’u o se Atalii o le Atua.’
“I le faateia ai, sa ou tilotilo a’e i luga mai la’u galuega ona ou te iloaina le pese. Sa ou vaaia le aiga i se malamalama fou. Ina ua uma le pese a le tina, sa tuu atu lo’u lima i luga o lona tauau ma fai atu, ‘Ou te fiafia tele i le pese lena.’
“Ma loimata, sa ia fai mai, ‘O le pese lea sa sili ona fiafia i ai lo’u atalii e fitu tausaga. O loo matou aveina atu o ia i le fale i le fanuatanu o lo matou aiga i Monatana. Na maliu o ia ananafi i se faalavelave matautia. Ua matua o matou misia lava o ia.’
“Sa lofituina a’u i le maasiasi. Sa ou faamasinoina lenei aiga lelei, ma le le magafagafa i le auala semanu ou te fesoasoani atu ai. O upu o le pese na faapupulaina ai lo’u iloa e tusa lava pe lei avea i latou ma Au Paia o Aso e Gata Ai, o i latou lava o ni fanau a le Atua, ma sa tatau ona ou aapa atu ia te i latou i o latou manaoga.
“Sa faalotomaulaloina a’u. O le vaega na totoe o le matou malaga faatasi sa tumu i le faasoaina atu o lagona, faalogona, ma aafiaga na taua ia i ma’ua uma. Sa matou faamavae o ni uo lelei o e o le a fesootai pea i tusi i tausaga a sau.”