Pe a Ese Aafiaga Faaleagaga mai Mea Na E Faamoemoeina

Saunia e Abby Larkins

Mekasini a le Ekalesia

O fautuaga mai o’u faiaoga sauniuni mo le malumalu na suia ai le ala na ou mafaufau ai e uiga i le lagonaina o le Agaga.

Ata

Malumalu o Gilbert Arisona

Ata pue o le Malumalu o Gilbert Arisona na pueina e Ronald Lee Enloe

Sa ma mauaina faatasi ma lo’u uso laitiiti o ma faaeega paia, i ni nai aso a o lei alu o ia i lana misiona. Sa ou fiafia lava e auai faatasi ma ia i le malumalu, ma sa ou saunia e laa i le isi laasaga i luga o le ala o feagaiga.

Ae i lena aso, sa o solo o’u lagona. Sa o le faaiuga o le taumafanafana. Sa faamalumalu mai i o’u luma se semesa taufaafefe o le aoga. I le tulimatai atu i le toe siitia atu i le kolisi, tuua o lo’u aiga, ma faatofa atu i lo’u uso, sa faafuasei ona ou lagonaina le le faamafanafanaina.

Ma e ui sa matagofie le sauniga o le faaeega paia, ae sa tele lava mea e mafaufau i ai. Sa itiiti lava so’u malamalama ma sa ou sauni e aluese atu i le taimi na uma ai le sauniga.

Sa ese se aafiaga o lo’u uso. I totonu o le potu selesitila, sa ia fesili atu ai ma le toafimalie ma le fia iloa i o’u matua e uiga i le faaeega paia ma sa foliga mai ua tele atu mea na ia maua nai lo a’u. O le taimi lea, sa ou saofai ai i se tulaga gῡgῡ. Ou te manatua le taofiofi o loimata o le le fiafia ma le maasiasi ona o le ese mai o lo’u aafiaga mai ia te ia.

Sa faaosoosoina au i se taimi le tumau ia lagona le lototiga ona ou te lei mauaina le aafiaga sa ou faamoemoe i ai. Ona ou manatuaina lea o ni mea patino se lua na ta’u mai ia te au e o’u faiaoga sauniuni mo le malumalu:

Atonu o le a ou le malamalama i mea uma na tutupu i le taimi o la’u uluai sauniga o le faaeega paia. Sa la fai mai ia te au, nai lo le taumafai ia malamalama uma i ai i lena taimi, e tatau ona ou taumafai e taulai atu i le lagona filemu i totonu o le malumalu.
Atonu ou te tuua le malumalu ma lagona le vaivai faaleagaga ma le lofituina. Ma sa le afaina lea.

O a la upu atamai na telegese ai o’u mafaufauga faigata ma sa mau pea ia te a’u i le aluga o tausaga. Ou te talitonu o le fautuaga lava lea e tasi e mafai ona fesoasoani ia i tatou a o tatou faitau i faamoemoega ua tatou maua e uiga i isi aafiaga faaleagaga, i totonu ma fafo atu o le malumalu.

Fetuunai Ou Faamoemoega

Ou te fiafia e faapea atu ua ou fiafia e auai i le malumalu i le taimi nei, ma ua faatupulaia lo’u malamalama i le faaeega paia i nai tausaga ua mavae. Ae ou te fesootai foi i le manao ia i ai ni faamoemoega patino mo mea faaleagaga e tutupu, e pei o le mauaina o ou faaeega paia po o le alu i se misiona. Sa oo foi ina ou faamoemoe mo se “aafiaga faaleagaga” taua i taimi uma ou te asiasi ai i le malumalu pe faitau ai a’u tusitusiga paia.

Ae ua ou iloa o le i ai pea o aafiaga faaleagaga ofoofogia e le moni. Mo se faataitaiga, o nisi o a’u asiasiga i le malumalu sa faamalamalamaina ma faagaeetia, ae i isi sa ou tauivi e taulai atu pe mataala.

E pei ona molimau mai talu ai nei Elder Gary E. Stevenson o le Korama a Aposetolo e Toasefululua: “E le mafai ona faamalosia mataupu faaleagaga. E mafai ona e atiina a’e se uiga faaalia ma se siosiomaga e valaaulia ai le Agaga, ma e mafai ona e saunia oe lava, ae e le mafai ona e faatonuina pe faapefea po o le a foi le taimi e oo mai ai musumusuga.”

Afai e te le fiafia i le mauaina o faaaliga po o le lagonaina o le Agaga mo soo se mafuaaga, o nisi nei o faamanatu ua fesoasoani ia te au e lagona ai le fesootai atu i le Tama Faalelagi ma Iesu Keriso ma agai ai i luma ma le faatuatua.

Manatua e Fesootai mai le Agaga i le Tele o Auala

E ui e mafai ona musuia le faalogo e uiga i aafiaga faaleagaga o isi, ae o nisi taimi e faigofie ona lagona le le fiafia pe a le pei o tatou aafiaga o isi tagata.

O le faatusatusaina o lo’u aafiaga i le malumalu i le aafiaga o lo’u uso sa faalotovaivaia ai a’u. Ona ou te lei manao i lena aafiaga muamua e faalavelave i lo’u fiafia i faamanuiaga o le tapuai i le malumalu, sa tatau ai ona ou filifili ma le iloa e agai ese mai i le eseesega i mea na ma lagonaina ma lo’u uso ma malamalama ai i lena aso.

Atonu e te moomoo maimau pe ana e tagi ina ua e lagonaina le Agaga. Atonu e te moomoo maimau pe ana e le tagi! Atonu e te lagonaina se lagona o le moomoo pe a e faalogo i tala e uiga i tagata e i ai miti ma faaaliga . Atonu e te lei oo lava i se mu i lou loto (tagai i le Mataupu Faavae ma Feagaiga 9:8). Pe atonu na fai mai se tasi na latou lagonaina le Agaga i se tulaga ae e te leilagonaina lava.

O le tala fiafia e faapea, e tele auala e fetalai mai ai le Agaga ia i tatou. Afai e ese ou ala mai le isi, e le faapea ai la e sese i latou pe e le fesootai mai le Agaga ia te oe.

A o tatou liliu atu i le Tama Faalelagi mo se fesoasoani, e mafai ona tatou aoao pe faapefea ona iloa le auala e fesootai mai ai le Agaga ia i tatou ma olioli atoatoa ai i o tatou aafiaga faaleagaga faaletagata lava ia. Na saunoa mai Elder Ronald A. Rasband o le Korama a Aposetolo e Toasefululua: “Ua ia i tatou le tiutetauave paia e aoao ai ia iloa faatosinaga [a le Agaga Paia] i o tatou olaga ma tali atu.”

Tuaifaamaumau Ou Aafiaga Faaleagaga

O se tasi o auala e iloa ai le uunaiga a le Agaga o le tusifaamaumauina lea o ou aafiaga faaleagaga. Pe o totonu o se api talaaga faaletino, i luga o se faamatalaga faaeletonika, po o se faamanatu o se leo, o le tusifaamaumauina o ou aafiaga lelei o se auala mamana lea e le gata e manatua ai mea lelei na e lagonaina ae faapea foi ona e lelei atili ai i le iloaina o le ala e talanoa atu ai le Agaga ia te oe.

Afai e te le iloa le mea e amata ai, taumafai ia mafaufau i taimi e te lagona ai le filemu, lotofaafetai, musumusuga, po o le olioli. Na saunoa Elder Craig C. Christensen o le Fitugafulu: “O le faatumulia i le Agaga Paia o lona uiga ia faatumulia i le olioli. Ma o le faatumuina i le olioli o lona uiga ia faatumulia i le Agaga Paia [tagai Galuega 13:52; Mosaea 4:3].”

A o e faia lenei mea, atonu e te iloaina o loo e lagonaina le Agaga e sili atu nai lo le mea sa e mafaufauina muamua.

Faamuamua Fesootaiga Faamaoni ma le Atua

Ona ua ta’u mai ia i tatou e saili ma faamoemoe e le gata i vavega faapea ma faaaliga faaletagata lava ia (tagai i le Mataio 7:7–8), e mafai ona matua faalotovaivaia pe a tatou lagona e pei tatou te le o mauaina se mea o ia mea. O nisi taimi ou te mafaufau ai pe aisea e tatau ai ona ou fesili pea i le Atua pe a foliga mai e le o tali mai o Ia ia i latou. Faatasi ai ma lenei mafaufau, sa oo ina ou popolevale ma fiapule i ou uiga faaalia ia te Ia.

Ata

soo o loo pa’i atu i aao o le Faaola toetu

Ae ua ta’u mai e tusitusiga paia ia i tatou, “Aua tou te saili e fautuaina le Alii, a ia outou talia fautuaga mai lona aao” (Iakopo 4:10). Ou te matauina se suiga pe a ou le toe tilotilo i faaaliga ua nao na pau lea o lo’u faaosofiaga e tatalo ae nai lo lena ua faamuamua fesootaiga faamaoni ma le Tama Faalelagi. Ou te faamatala atu o’u lagona ia te Ia, faamatala atu o’u popolega, faailoa atu lo’u lotofaafetai, ona ole atu lea ma le agamalu mo mea ou te le o maua. Ou te lagona le fesootaiga moni ma le Atua pe a ou le toe vaai atu ia te Ia o se “masini faifaatau malosi,” e pei ona faamalamalama mai e Elder D. Todd Christofferson o le Korama a Aposetolo e Toasefululua.

Ma e ui ou te le maua i taimi uma se tali vave pe manino, ou te iloa e faafofoga mai pea o Ia ia te au. Ma ua lava lena mo au e agai ai pea i luma.

Mulimuli i Mataupu Faavae Taiala

Pe a sailia le Agaga ma faaaliga faaletagata lava ia, e taua le faia i totonu o le auivi sa’o. I le ta’ua ai o le Tala’i La’u Talalelei, na saunoa ai Elder Stevenson e faapea: “‘O le i ai o le taitaiga a le Agaga Paia i lou olaga e manaomia ai le galuega faaleagaga. O lenei galuega e aofia ai le tatalo faatauanau ma le suesue pea lava pea i tusitusiga paia. E aofia ai foi le tausia o au feagaiga ma poloaiga a le Atua. … E aofia ai le ’ai ma inu ma le agavaa i le faamanatuga i vaiaso taitasi’ [Tala’i La’u Talalelei, 101].”

Ona ia tuuina mai lea o mataupu faavae taiala faaopoopo e fa mo le “valaauliaina ma le iloaina o uunaiga a le Agaga”:

Tutu i Nofoaga Paia: “O o tatou malumalu ma fale e sili ona paia o nei avanoa faapaiaina.”
Tutu faatasi ma Tagata Paia: “Afai o e faamoemoe ia lagona le Agaga, ia i ai faatasi ma tagata e mafai ona faigofie ona mafuta ai le Agaga.”
Molimau atu i Upumoni Paia: “E faasoa mai pea e le Faamafanafana lona siufofoga pe a tatou molimau atu i o tatou leo.”
Faalogo i le Agaga Paia: “E tautala o ia i ni leo maaleale ma filemu. … Ia su’e se nofoaga filemu, se avanoa paia lea e mafai ona e saili ai ia maua le taitaiga mai le Agaga.”

E ui atonu e le o se mea maoae pe tupu foi i le ala e te faamoemoe i ai, ae o le a faatasi atu le Agaga ma taiala oe a o e faia nei mea.

O Se Vaaiga Fou

A o faamanatu mai e o’u faiaoga sauniuni mo le malumalu ia te a’u, e le afaina le le malamalama atoatoa i le talalelei pe, i lo’u tulaga, o le malumalu. Ma o nisi taimi o a tatou sailiga faaleagaga e ono tuua ai i tatou ia lagonaina sina lelavā. O taimi faapenei e mafai ona fesoasoani ia i tatou e aoao ai le onosai ma toe iloilo ai lo tatou sootaga ma le Tama Faalelagi ma le Agaga Paia.

Ua ou matauina a ou faaaogaina na lagona e uunai ai au e faifai lemu, galue i le faatuatua, ma liliu atu i le Tama Faalelagi mo se fesoasoani, o ou faamoemoega o aafiaga faaleagaga ua avea ma mea faamaoni nai lo le popole ma malolo nai lo le le fiafia. I nei taimi, ou te lagonaina le alofa o le Tama Faalelagi mo au. Ma a o ou faatalitali mo ni tali, o lena alofa e lava i taimi uma.