“O Le Mana o le Taumafaiga Magafagafa, Tumau,” Liahona, Aok. 2024.
Sau, Mulimuli Mai ia te A’u
O Le Mana o Taumafaiga Magafagafa, Tumau
O a tatou faaiuga laiti, faigofie, tumau e aafia ai le ala o o tatou olaga.
Mafaufau, mo se faataitaiga, i le mana o se sinasina faifai pea o le vai. Sa faapupula mai i se tasi taimi e Elder David A. Bednar o le Korama a Aposetolo e Toasefululua le mataupu faavae o le fafagaina laitiiti ma le faatauvaa faaleagaga e ala i le faamatalaina o le matafaioi o se faiga o le faasūsūina i le vai: “O le sinasina faifai pea o le vai e gotouga ifo i le eleele ma maua ai se sūsū maualuga i le eleele lea e mafai ona ola ai laau. E faapena foi, afai e taulai atu ma faifai pea oe ma a’u i le mauaina e le aunoa o mataua o meaai faaleagaga, ona mafai lea ona gotouga ifo a’a o le talalelei i o tatou agaga, e mafai ona faatuina ma le mausali ma maua se faavae lelei, ma mafai ona fua mai ai fua maoae ma le suamalie.”
O se “liuga tele i o [tatou] loto” (Alema 5:14) e mafai ona avea o se fua o faaiuga laiti ma faifai pea. O le faaiuga e faitau le Tusi a Mamona i aso taitasi, fai se tatalo, po o le faia o se galuega agalelei e faamāmā ai avega a se tasi atonu e foliga mai e le taua. Ae, “o mea laiti ma faatauvaa e faataunuu ai mea tetele” (Alema 37:6).
E ui e mafai ona faafaileleina e ni mataua o vai laiti, ae e mafai foi ona latou faatafeaina. E faapena foi, o faaiuga laiti i o tatou olaga e mafai ona taitai atu ai i le tuputupu ae—agai atu i le Faaola—po o le tafia ese o a tatou molimau, mai ia te Ia. O le tuulafoaina pea lava pea o nai faatinoga laiti lea e fesootai atu ai i tatou ia Iesu Keriso e mafai ona afua ai ona vaivai le faatuatua ma faavaivaia tautinoga.
Na aoao mai Peresitene Russell M. Nelson, “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai taumafaiga magafagafa ma tumau e faatumu ai o tatou olaga i aso taitasi i Ana afioga, Ana aoaoga, Ana upumoni.” O le o mai ia Iesu Keriso e aofia ai le faia ma le loto i ai o ni suiga laiti i o tatou olaga.
Ioe, e i ai taimi e manaomia ai nisi suiga maoae. “Afai o loo tatou aafia i ni agasala matuia, e manino lava ma lē mafaaseseina le Alii; ua tatau ona tatou taofia, sailia se fesoasoani mai le epikopo, ma fulitua ese vave i na faiga.” Ae peitai, mo le tele o isi vaega, e mafai ona tatou vaai atu i a tatou faatinoga e foliga e laiti e suia ai a tatou amioga.
Pe a e toe tomanatu i tua i lou olaga, e mafai ona e iloa ai o au filifiliga laiti, e faatotonugalemu ia Keriso ua faaopoopo atu i se suiga moni. E masani lava e le manaomia ai se taumafaiga maoae—e manaomia ai se faaiuga laitiiti se tasi, ona sosoo ai lea ma le isi, ma le isi, e liliu atu ai ia Keriso.