“Iesu Keriso: O Le Totonugalemu o lo Tatou Faatuatuaga,” Liahona, Aok. 2024.
Sau, Mulimuli Mai ia te A’u
Iesu Keriso: O Le Totonugalemu o lo Tatou Faatuatuaga
Ina Ia Outou Iloa, saunia e Gary L. Kapp, e le mafai ona kopiina
I tusiga faaEperu, o le fefulisaiga o se fatuga faatusisolo lea e tuuina atu ai upu po o manatu ona toe tā’ua lea e faasolo mai tua, faatasi ai ma le avea o le ogatotonu o le taulaiga ma le manatu aupito sili ona taua. Ua le toe tā’ua e faateleina i le afa mulimuli, lea e faamamafa atu ai le savali autu. O loo maua se faataitaiga i le Alema 36, o loo faapupula mai ai le matagofie o lenei mamanu.
-
Tausi poloaiga (fuaiupu 1)
-
-
E moni lava na Ia laveai ia te i latou (fuaiupu 2)
-
-
Lagolago i tofotofoga, faafitauli, ma puapuaga (fuaiupu 3)
-
-
Ou te iloa lenei mea e le mai ia te au lava ia ae mai le Atua (fuaiupu 4)
-
-
Tiga o se agaga ua malaia (fuaiupu 16)
-
-
Sa ou manatuaina Iesu Keriso (fuaiupu 17)
-
Sa ou tagi atu, “Iesu e, oe le Alo o le Atua” (fuaiupu 18)
-
-
O le olioli e sili atu nai lo le tiga (fuaiupu 20)
-
-
O lo’u malamalama ua mai le Atua (fuaiupu 26)
-
-
Lagolagoina i tofotofoga, faalavelave, ma puapuaga (fuaiupu 27)
-
-
O le a Ia laveaiina a’u (fuaiupu 27)
-
-
Tausi poloaiga (fuaiupu 30)
Matau o loo i ai le Faaola i le totonugalemu o lenei faataitaiga o le fefulisaiga. Na aoao mai Elder Richard G. Scott (1928–2015) o le Korama a Aposetolo e Toasefululua e uiga i faamanuiaga o le faatotonugalemuina o o tatou olaga ia Iesu Keriso: “O le fiafia tumau, faatasi ai ma le malosi, lototele, ma le gafatia e faatoilalo ai faigata silisili, o le a oo mai a o e faatotonugalemuina lou olaga ia Iesu Keriso.”
Ua tatou iloa o le i ai o le faatuatua i le Faaola o le a faamanuiaina ai i tatou e faavavau. Ae o nisi taimi e galo ai ia i tatou le ala e mafai ai e le i ai o le faatuatua ona faamanuiaina i tatou i le taimi nei. E ala i lona faaalia o le fefulisaiga, ua faaali mai ai e le Alema 36 ia i tatou le mana o le faatuatua ma le ala e faasino uma ai ia Iesu Keriso.
O mau nei—mai lesona eseese i le Sau, Mulimuli Mai ia te A’uia Aokuso—ua faaalia ai le ala e tuuina mai ai e le faatuatua ia Keriso ia i tatou le mana:
O Le A Ia Laveaiina i Tatou
Afai e maileia i tatou e mafaufauga, lagona, po o tulaga leaga, e mafai ona fesoasoani le faatuatua ia Keriso ia i tatou e saoloto ai.
“O lenei, o le faatuatua lenei o i latou nei o e ua ou tautala atu ai; ua talavou i latou, ma ua mausali o latou mafaufau, ma ua latou tuu atu o latou faalagolago i le Atua e le aunoa. …
“Ma faauta, ua toe laveaiina foi i tatou mai lima o o tatou fili. Ma ia faamanūina lava le suafa o lo tatou Atua; aua faauta, o ia lava na laveaiina i tatou.”
E Mafai Ona Tatou Saili ma Maua Tali
O le i ai o le faatuatua ia Keriso e mafai ona taitai atu ai i tatou e sue tali pe afai e i ai se mea tatou te le malamalama i ai pe le iloa.
“E tele mealilo ua taofia, e leai se tasi na te iloaina vagana ai le Atua lava ia. Ae ou te faailoa atu ia te oe se mea e tasi sa ou ole atu ai ma le filiga i le Atua, ina ia mafai ona ou iloaina.”
O Le a Faatumulia o Tatou Agaga i le Olioli
O le faatuatua ia Iesu Keriso e mafai ona aveeseina ai ao pogisa mai o tatou mafaufau ma faafiafiaina ai o tatou loto i le olioli.
“Sa latou … faasolo malolosi ma atili malolosi ai i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga.”
E Mafai Ona Tatou Faatoilaloina le Fefe ma Puapuaga
Afai tatou te faatuatua i le Alii, o le a Ia lagolagoina i tatou i taimi faigata i o tatou olaga.
“Na matou faanoanoa ai ma faatumulia foi i le fefefe. …
“O lea na sasaa atu ai o matou agaga i le Atua i le tatalo, ina ia faamalosia e ia i matou ma laveai i matou. …
“… Ma sa oo ina asiasi mai le Alii lo tatou Atua ia i matou ma ni tautinoga o le a ia laveaiina i matou; ioe, sa oo ina ia fetalai mai le filemu i o matou agaga, ma tuu mai ia te i matou le faatuatua tele, ma faatonu i matou ia matou faamoemoe mo le laveaiina mai ia te ia.”