E Na’o Tusiga Faaeletonika
“O Le Taimi Lenei e Tuu ai le Ita”
“O le maitaita o se filifiliga lea tatou te faia; e lē o se tulaga e faatupu pe fai faamalosi mai e se tagata po o se isi mea i o tatou luga.”
E toafia tagata tatou te fegalegaleai i aso taitasi? E fia ni savali po o ni faamatalaga tatou te faitauina? E tusa lava pe o le telefoni, po o ala o faasalalauga faaagafesootai, e mafai ona matuā maualuga lava le aofa’i. I se isi taimi, o le a tatou fetaiai ai ma se tasi o le a fai atu pe faia se mea e manatu e faatiga, faamoemoeina pe leai.
Na saunoa Elder David A. Bednar o le Korama a Aposetolo e Toasefululua: “O le faamanuiaina i le faitalia, o oe ma a’u o ni sui, ma e tatau ona tatou galulue muamua ae le na o le faatinoina. Ia talitonu e mafai e se tasi po o se mea ona faia i tatou ia le fiafia, ita, tiga, pe matua faaitiitia ai lo tatou faitalia ma faaliliuina ai i tatou i ni mea faitino ina ia galueaina ai. Peitai i le avea ai ma sui, ua i ai i a te oe ma a’u le mana e galulue ai ma filifili pe faapefea ona tatou tali atu i se tulaga e le fiafia pe tiga ai.”
Mafaufau pe faapefea ona e amio i tulaga nei e masani ona ita ai tagata—ma mafaufau loloto pe faapefea ona e filifili e le faia:
-
Sa e saunia ma le agalelei se taumafataga mo isi. A o taumamafa, ua fai mai se tasi e le tofo lelei le meaai.
-
Ua ta’ua e se tasi e foliga ve’uve’ua lou lauulu i nisi, ae o isi tagata ua talie.
-
I le taimi o se talanoaga i le Aoga Sa, pe a uma ona e faasoa atu se aafiaga faaleagaga mai le loto, e faitioina e se tasi au upu.
O le filifilia o le auala e amio ai ma tali atu i tulaga tiga e le faigofie. Ae peitai, ua faamanatu mai e Peresitene Russell M. Nelson ia i tatou le mea e mafai ona tatou taulai atu i ai nai lo lena: “Pe a outou faia ni filifiliga, ou te valaaulia outou ia vaai umi—i se vaaiga e faavavau. Ia faamuamua Iesu Keriso, ona o lou ola e faavavau e faalagolago i lou faatuatua ia te Ia ma i Lana Togiola.
O Se Aoaoga Faavae ia Keriso
O Iesu Keriso o le faataitaiga atoatoa lea o le le faatagaina o upu ma amioga a isi e aafia ai Lona tiute (tagai 1 Nifae 19:9). I le taimi o le Lauga i luga o le Mauga, ua aoao ai i tatou e Iesu ia alolofa i o tatou fili ma poloaiina i tatou ia faaatoatoaina, lea e mafai ona maua e ala i Lana Togiola (tagai Mataio 5).
A o tatou taumafai e latalata atili atu i lo tatou Tama Faalelagi, e mafai ona tatou maua le mana gafatia ma le faamalosia e ala mai ia Iesu Keriso e fesoasoani ia i tatou e faatoilalo ai lo tatou tiga ma le faatausuai.
Ua aoao mai Elder Bednar e “ala i le mana faamalosiau o le Togiola a Iesu Keriso, e mafai ai e oe ma a’u ona faamanuiaina e aloese ma manumalo i le lototiga.
Ia Avea ma Tagata Sailiili
A uma se faamatalaga po o se gaoioiga lē mafaufau, atonu tatou te lagonaina le manaomia ona vave tali atu, pe a ma le ita, pe taofimau i o tatou lagona seia oo ina tatou le mafai ona taofia. E mafai faapefea ona tatou laa i tua ma manatua le Faaola?
O se tasi o manatu o le avea lea ma a tatou lava tagata sailiili. E mafai ona tatou taumafai e malamalama i lagona o loo i tua atu o le faatausuai. Pe o i ai ni fesoota’iga sesē? Pe o tatou mafaufau ea ma ni lagona ua atiina ae po o se ulu o manino? O a mea tatou te tali atu i ai?
Na saunoa Elder Dieter F. Uchtdorf o le Korama a Aposetolo e Toasefululua: “E tele taimi tatou te tauamiotonuina ai lo tatou ita o ni tagata amiotonu ma o a tatou faamasinoga e faatuatuaina ma e na o le pau le mea e talafeagai ai. … Tatou te faia ni ‘alofaga pe a oo mai i o tatou lava lē fiafia ona ua tatou lagonaina lena mea, i o tatou tulaga, ua ia i tatou faamatalaga uma tatou te manaomia e ta’ulēaogaina ai le isi tagata.”
E ui lava o le avea ma a tatou lava tagata sailiili e ono manaomia ai le faataitai, ae o le malamalama lelei i le tulaga ma o tatou lava lagona e mafai ona fesoasoani ia i tatou e manatua ai le Faaola, nai lo le lagonaina o lagona le lelei e ono tosina atili ai i tatou.
A uma ona faataitai lenei togafiti, o nisi taimi o le mea na fai atu pe faia e tiga lava. Afai o lea, na saunoa ai Elder Bednar: “O la tatou matafaioi muamua lava o le musu lea e ita ona fesootai faalilolilo lea, faamaoni, ma tuusao atu i lena tagata. O lena faiga e valaaulia ai musumusuga mai le Agaga Paia, ma mafai ai ona faamanino ni faaletonu, ma malamalama ai i le faamoemoega moni.”
Mo se lagolago faaopoopo, faitau le “O Le Maufetuunai Faalelagona e Fesoasoani ia i Tatou e Saunia ai mo Faalavelave Faafuasei” ma ona soavaega nei i le Tusi Lesona o Sauniuniga mo Faalavelave Faafuasei, ma vaai i le kosi o le maufetuunai faalelagona mai le Tautua mo le Ola Tutoatasi.
Maua le Filemu i Aso Nei
A fai mai pe faia e se tasi se mea e mafai ona manatu e faatiga, e mafai ona tatou faalagolago i le faamanatu a Elder Uchtdorf:
“E tatau ona tatou iloaina tatou te le atoatoa uma—o tatou o tagata aisi i luma o le Atua. …
Ona tatou te faalagolago uma i le alofa mutimutivale o le Atua, e mafai la faapefea ona tatou taofia mai i isi soo se vaega o le alofa tunoa o loo tatou matuai mananao ai lava mo i tatou lava? O’u uso e ma tuafafine pele, pe tatau ea ona tatou le faamagalo atu ae mananao pea ia faamagaloina i tatou?”
O le mea moni, o le faamalologa moni e oo mai e ala mai i le Faaola, e tuuina mai ai ia i tatou le filemu e faaauau ai pea i luma.
“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).