Tutumau Mausali i le Faatuatua ia Keriso

Saunia e Elder Mark D. Eddy

O Le Au Fitugafulu

E faapefea ona tatou atiina ae ia lava le faatuatua ia Iesu Keriso mo vaitau uma o le olaga?

tane ma le avā o loo faitau faatasi i se laulau

I le mataupu lona tolu o le Helamana, tatou te faitau ai i se vaitau o le “filemu aveavaeai pea” (Helamana 3:23) ma le “manuia tele naua i le ekalesia” (Helamana 3:24). E faitau afe sa papatisoina, ma “o faamanuiaga sa sasaa mai i luga o tagata” sa matua tele naua “e oo lava i faitaulaga sili ma aoao sa le mafuatiaina lo latou ofo tele” (Helamana 3:25).

O le mea e faanoanoa ai, o nisi “o tagata o e sa fai mai ua latou auai i le ekalesia a le Atua” (Helamana 3:33) sa amata ona faamaualuluga ma amata ona sauaina o latou uso a tagata o le Ekalesia (tagai Helamana 3:34). “O lenei … lea na mafua ai ona mafatia o le toatele o le vaega sili ona lotomaualalalo o tagata i sauaga tetele, ma latou asa atu ai i puapuaga e tele” (Helamana 3:34).

Ou te manatu sa faapitoa lava le tiga o lenei mea mo tagata lotomaualalalo o le Ekalesia. O le mea moni, i ni nai tausaga na muamua atu, na tau faatasi ai tagata e faatoilalo se osofaiga a sa Lamana (tagai i le Helamana 1). Ae peitai, o le taimi lea, na oo mai ai puapuaga mai totonu. O le au faaoosala o i latou ia sa latou feiloai i ai ma tatalo ma aoao ma tapuai.

I le lotolotoi o ia mafatiaga, na faapefea ona tali atu le “vaega sili ona lotomaualalo o tagata”? O le a se mea na fesoasoani ia i latou e onosaia ai le leaga o le sauaina e i latou o e sa fai mai muamua o ni soo o Keriso?

O leHelamana 3:35 ua tuuina mai ai le tali: “Sa latou anapopogi ma tatalo soo, ma sa faasolo malolosi ma atili malolosi ai i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga, ioe, seia oo ina faamamaina ma faapaiaina o latou loto, o le faapaiaga lea e oo mai ona o lo latou tuu atu o o latou loto i le Atua” (faaopoopo le faamamafa).

Sei o tatou mafaufau pe faapefea e i tatou, e pei o le Au Paia i ona po o Helamana, ona “mausali ma atili mausali ai i le faatuatua ia Keriso” a o tatou feagai ai ma le mea na faamatalaina e Peresitene Russell M. Nelson o “se taimi sili ona faigata i le talafaasolopito o le lalolagi,” o se taimi o “luitau e le mafaatusalia.”

O Faataitaiga e Lua o le Faatuatua o Nifae

Ua tumu tusitusiga paia i aafiaga o alii ma tamaitai o e na oo ina mausali ma mausali atili i le faatuatua ia Keriso a o feagai ai ma luitau o o latou aso. Mo se faataitaiga, faamolemole ia mafaufau loloto i le tali faamaoni a Nifae i ni aafiaga se lua e falo ai le agaga lea sa toetoe lava a tutusa i le taimi muamua ae na eseese faigata i le faaiuga.

A o toe foi mai Nifae ma ona uso mai Ierusalema faatasi ma Isamaeli ma lona aiga, sa fouvale Lamana ma Lemuelu ma le toatele o isi (tagai i le 1 Nifae 7:6–7). Na valaau atu Nifae ia i latou ia salamo ma aioi atu ia i latou ia manatua le Alii (tagai i le 1 Nifae 7:8–15). Na feitai Lamana ma Lemuelu ia Nifae ma saisai ona lima ma vae i maea ma tuua ai o ia e oti i le vao (tagai i le 1 Nifae 7:16).

E pei o le lotonutimomoia e pei ona sa i ai faatinoga a ona uso, ma e tusa lava po o le a le fefe atonu na ia lagonaina, na filifili Nifae e tumau mausali i le faatuatua ia Keriso. Sa ia “tatalo atu i le Alii, ua fai atu: Le Alii e, e tusa ma lo’u faatuatua ia te oe, sei e laveaia au mai lima o ou uso; ioe, foai mai ia te au le malosi ia mafai ai ona ou motusia o nei maea ua noatia ai au” (1 Nifae 7:17).

Sa vave ona tali mai faavavega le tatalo a Nifae! “Sa matala ese maea mai [ona] lima ma vae, ma sa tu [o ia] i luma o [ona] uso, ma … sa tautala atu ia te i laua” (1 Nifae 7:18). Masalo na malena ae le loto o Nifae ma le lotofaafetai i le Alii mo le laveaiina o ia.

Peitai, e le o le taimi mulimuli lea o le a saisai ai e Lamana ma Lemuelu lo la uso i maea. Ma o le isi taimi, o le laveaiga a Nifae o le a matuai ese lava mai le taimi muamua ma o le a toe faamaonia ai, le mausali o le faatuatua o Nifae ia Keriso.

I le tele o tausaga mulimuli ane, a o sopoia le sami i le nuu folafolaina, sa amata ona faatino e Lamana ma Lemuelu ma atalii o Isamaeli le “le migao tele” ma faagalo le mana o le Alii na faamanuiaina ai la latou malaga (tagai 1 Nifae 18:9). Na toe valaauina i latou e Nifae ia salamo, ma sa toe feitai Lamana ma Lemuelu ia te ia (tagai i le 1 Nifae 18:10). E pei lava ona sa la faia muamua, sa laua ave Nifae ma saisai o ia i maea malolosi (tagai i le 1 Nifae 18:11–12).

O le a le manatu o Nifae ina ua noatia o ia i maea mo le taimi lona lua? Mata o le a sou po o so’u manatu pe a tatou toe oo i lenei tulaga pagatia? Masalo atonu tatou te mafaufau, “Sa ou oo muamua i lenei mea! Ou te iloa le mea e fai. Afai ou te tatalo i le Alii, o le a Ia laveaiina vave ma faavavega a’u.” Tatou te le iloa po o le a le manatu o Nifae, ae ua tatou iloa e ui o nei aafiaga e lua sa talitutusa, ae o taunuuga vave sa leai lea. O le taimi lea, o le a le vave ona laveaiina Nifae mai ona uso, ae nai lo lena, o le a ia onosaia aso e fa o puapuaga i o laua lima (tagai 1 Nifae 18:14–15).

O le manatuaina o lona aafiaga muamua, atonu na tatalo ai Nifae ma le mautinoa tele mo le laveaiga vave. Ina ua leai se laveaiga faapena, atonu e mafai ona lotovaivai Nifae, ma faavaivaia lona faatuatua i le masalosalo. A o faaumiumi itula ma aso, ma sa faateleina lona tiga, o le faateleina o le mamafatu o lena lotovaivai ma le masalosalo sa ono olopalaina ai le faatuatua o Nifae. Na ono mafai ona muimui o ia, “Aisea ua le laveaiina ai au?” Pe lei sili atu ea lona faatuatua i le taimi nei—ua sili atu ona faatagata matua ma atoatoa—nai lo le taimi muamua na noatia ai o ia? Pe lei faateleina ea lona faatuatua e ala i aafiaga mamana faatasi ma le Liahona, lana aufana gau, ma se vaa na fausia i lalo o le taitaiga a le Alii lava Ia?

Nai lo le lotovaivai po o le masalosalo, sa tumau mausali Nifae i lona faatuatua. Sa lei faatotonugalemu lona faatuatua i le taimi po o le metotia o lona laveaiga, pe sa faalagolago foi lona faatuatua i se taunuuga faamoemoeina. O lona faatuatua sa le o se faatuatua e i ai ni tuutuuga. Sa mausali le totonugalemu o le faatuatua o Nifae ia Iesu Keriso—po o le a lava le mea e ono tupu. Ona o lena faatuatua, na ia tusia, “Sa ou tepa taulai a’e i lo’u Atua, ma sa ou viia o ia i le aso atoa; ma sa ou le muimui e faasaga i le Alii ona o o’u puapuaga” (1 Nifae 18:16).

Faamolemole ia manatua o le mausali o le faatuatua o Nifae ia Keriso na mafai ai ona ia maua le mafanafana i le lotolotoi o ona puapuaga ma faatumulia i le alofa mo le Atua e ui lava i ona tiga. O ia o le peresona o mea o le a aoao atu mulimuli ane e lona uso o Iakopo:

“Ia outou tepa taulai atu i le Atua ma le mausali o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga, ma o le a ia aioia a outou tagi. …

“… Ia ea i luga o outou ulu ma tali le afioga malie a le Atua, ma taumamafa fiafia i lona alofa; auā tou te mafai, pe afai e mausali o outou mafaufau, e faavavau” (Iakopo 3:1–2; ua faaopoopo le faamamafa).

E Mafai ona Tatou Faaauau Pea i le Faatuatua.

O Nifae ma le Au Paia i ona po o Helamana ua tatou maua ai le faamoemoe faapea, faatasi ai ma le fesoasoani a le Alii, e mafai ona tatou mausali atili i lo tatou faatuatua ia Keriso. A o e faitauina lenei mea, atonu e te mafaufau pe faatatau lenei faamoemoe ia te oe. Ia tatou maua uma le mafanafana ma le lototele mai nei upu mai lo tatou perofeta pele, o Peresitene Nelson:

‘E le manaomia e le Alii se faatuatua atoatoa mo i tatou e maua ai Lona mana atoatoa . Ae ua Ia talosagaina i tatou ia talitonu. …

“… E le latalata atili atu le Faaola ia te oe nai lo le taimi ua e feagai ai pe ā’ea ai se mauga i le faatuatua.”

I le faaiuga, e pei ona aoao mai Elder D. Todd Christofferson o le Korama a Aposetolo e Toasefululua, “o le toatele o i tatou e oo i lenei taimi i se fuafaatatau i le va o se auai faaagafesootai ua faaosofia i sauniga o le talalelei i le tasi itu ma se tautinoga atoatoa faaKeriso i le finagalo o le Atua i le isi. I se mea i le aluga o lena ala, e ulufale mai ai le tala fiafia o le talalelei a Iesu Keriso i o tatou loto ma pulea o tatou agaga. Atonu e le tupu i se taimi vave, ae e tatau ona tatou agai uma i luma i lena tulaga faamanuiaina.”

O lea la, i le lotolotoi o tofotofoga tulaga ese ma faigata o o tatou aso, tau ina ia tatou foia—faatasi ma mo tagata uma—ia filifili le faatuatua ia Iesu Keriso, ia lava se faatuatua mo vaitau uma o le olaga. Tau ina ia tatou galulue ma anapopogi ma tatalo ina ia faasolo mausali atili ai i le faatuatua ia Keriso ma, faatasi ma mafaufau mausali, ia maua Lona faamafanafanaga i o tatou puapuaga ma taumamafa fiafia i Lona alofa e faavavau.

I lena tulaga, ou te molimau atu i le moni o le molimau faapitoa a Peresitene Nelson: “Po o a lava fesili po o faafitauli o ia te oe, o le tali e maua i taimi uma i le soifuaga ma aoaoga a Iesu Keriso.”