“O Se Kilo o le Alofa,” Liahona, Aok. 2024.
O Leo o le Au Paia o Aso e Gata Ai
O Se Kilo o le Alofa
O taimi o faigata, taufaafefe, ma puapuaga e mafai ona aumaia ai mea silisili ia i tatou taitoatasi.
Ata na tusia e Carolyn Vibbert
Ina ia tausia lo matou aiga, e faigaluega malosi lo’u toalua e ofoina atu le auaunaga i taavale la’u pasese i lana uila afi. Talu ai nei sa i ai o ia i se faalavelave tau taavale ae o se vavega sa lei mafatia i se manuaga ogaoga. Peitai, sa tatau ona malolo o ia a o lipeaina lana uila afi.
Ona sa le mafai ona faigaluega lo’u toalua, o lea sa ma popole ai. Sa leai se isi a matou tupe maua, ma na faateleina lo matou popolega i faafitauli tautupe a lo matou atunuu.
I le taimi o le sauniga faamanatuga i le Aso Sa ina ua mavae le faalavelave a lo’u toalua, sa taulai atu lauga e lua i le agaalofa ma le auala e mafai ai ona matou atiina ae lenei uiga faaKeriso. Mulimuli ane, sa sau se tasi o tagata o le matou uarota ia te au e fai mai o se tagata o le paranesi sa matuai manaomia lava ni meaai. Sa mafaufau o ia pe mafai ona ma foai atu “se kilo o le alofa”—o se kilo (2.2 pauna.) o soo se ituaiga o meaai sa i ai i le fale. Sa ou fai atu ia te ia e mafai ona ia faamoemoe la matou lagolago.
Ina ua taunuu lo matou aiga i le fale ina ua tuua le lotu, sa ma talanoa ma lo’u toalua i lea talanoaga. Sa matou feagai ma o matou lava tofotofoga, ae ui i lea sa ma lagonaina le faamanuiaina.
“E ui o loo tatou feagai ma aso faigata,” na ia fai mai ai, “ua lava ma totoe e aulia ai mai lea aso i lea aso, ma atonu foi e i ai sina mea faaopoopo e faasoa atu.”
O lena aoauli, o se tuaoi na faalogo i le faalavelave a lo’u toalua, na fai mai ia i maua ma te asiasi atu. Ina ua matou taunuu, sa tuuina mai e le tuaoi ia i matou se pusa e 7 kilo (15 pauna) e tumu i meaai, faatasi ai ma isi mea sa matou manaomia. Sa matou ofo. E leai se tasi o i matou na faamoemoeina lena ituaiga o faamanuiaga.
A o ou talanoa atu i lo’u toalua e uiga i lenei aafiaga, sa ou iloa le aao o le Atua ma faafetai atu ia te Ia mo Lona alofa tele mo i matou. Sa ia vaaia lo ma naunautaiga e faasoa atu mea e mafai ona ma faasoa atu—o se kilo e tasi o le alofa—ma sa faamanuiaina sātofitu i ma’ua i le ma taulaga.
O taimi o tofotofoga ma mea utiuti e mafai ona aumaia ai le mea sili mai ia i tatou taitoatasi. Latou te ofoina mai ia i tatou avanoa e atiina ae ai ma faaali atu ai uiga faaKeriso. Ou te iloa e le o faatinoga uma o le alofa e maua ai faamanuiaga vave, ae ou te iloa e leoleo e le Alii Ana fanau. O le a Ia tali mai i a tatou tatalo pe a tatou tali atu i tatalo a isi e ala i le auauna atu ma le faasoa atu—e tusa lava pe na o le pau le mea tatou te foai atu o se kilo e tasi o le alofa.