E Na’o Tusiga Faaeletonika
E Mafai Faapefea Ona Tatou “Tasi” i le Ala a le Alii?
Ou te manao i le saogalemu e oo mai faatasi ma le lotogatasi ia Keriso.
Pe e te mafaufau ea, e pei foi o au, “E mafai faapefea ona ou lagonaina le olioli sili atu i lo’u olaga?”
E ui e tele mea e aumaia ai le olioli, ae talu ai nei lava na ootia ai a’u i se saunoaga a Peresitene Henry B. Eyring, Fesoasoani Lua i le Au Peresitene Sili: “E oo mai le olioli pe a faamanuiaina i tatou i le lotogatasi.” Talu mai ona po o Atamu ma Eva, ua saili fanau a le Atua ia lotogatasi atili ma Ia ma le tasi ma le isi, a o saili Satani e faaumatia le lotogatasi.
Sa tele ni aafiaga na ou maua i le aluga o tausaga lea na ou oo ai i le olioli o le lotogatasi ma le tiga o le fevaevaea’i. Ou te maua le faamoemoe tele, e pei ona saunoa ai Peresitene Eyring: “A o tatou tatalo ma galulue mo lena mea i le ala a le Alii[,] … o le a fusia faatasi o tatou loto i le lotogatasi. Ua folafola mai e le Atua lena faamanuiaga i Lana Au Paia faamaoni po o a lava o latou eseesega i tua atu ma po o le a lava le feteenaiga o loo siomia ai i latou.”
E mafai faapefea la ona tatou “ tasi” i le ala ua poloaiina ai e le Alii (Mataupu Faavae ma Feagaiga 38:27)? Na aoaoina i tatou e Elder D. Todd Christofferson o le Korama a Aposetolo e Toasefululua i ni auala se tolu: “O le a tasi lo tatou loto ma le mafaufau a o tatou taitasi ma tuuina le Faaola i le totonugalemu o o tatou olaga ma mulimuli ia i latou ua Ia poloaiina e taitai i tatou. E mafai ona tatou lotogatasi … i le alofa ma le popole o le tasi i le isi.”
O le auala lenei o loo ou galue ai e ola i na upumoni i lo’u lava olaga:
O le Tuuina o le Faaola i le Totonugalemu o Lo’u Olaga
I le Ioane 17, na aioi atu ai le Faaola i le Tama mo i tatou i Lana Tatalo Faatoga: “Ina ia tasi i latou uma; faapei o oe le Tama o i totonu ia te au, o au foi i totonu ia te oe, ina ia tasi i latou i totonu ia te i taua” (Ioane 17:21). O le upu Togiola (To-gi-ola) o lona uigamoni “ia fai ia tasi,” pe toe faaleleia. Ou te maofa ona e finagalo tele le Faaola i lo tatou lotogatasi ma Ia ma le Tama Faalelagi, o lea na naunau ai o Ia e tafetotoi mai pu uma ina ia mafai ai.
E talafeagai ia te a’u lo’u manao e tasi ma i La’ua. Ae peitai, ua ou maofa ona o lo Laua mananao e tasi ma a’u. Ae peitai, ua molimau mai le Agaga Paia ia te a’u i le tele o taimi e faapea e La te mananao.
O lo’u lotogatasi ma i La’ua o le punavai sili lea o le olioli ma le saogalemu i lo’u olaga. O lenei lotogatasi e valaaulia ai le uunaiga taiala, puipuia, ma le faapaiaina a le Agaga Paia ia sili atu ona atoatoa i lo’u olaga. Ou te tatalo i taeao taitasi ina ia faatasi le Agaga Paia ma a’u ma galue e ala mai ia te a’u i lena aso. Ou te taumafai moni lava e tuu Iesu Keriso i le totonugalemu o lo’u olaga ma faalogo ia te Ia.
Pe o ou faia atoatoa ea? E matua’i leai lava! Ae pe o ou taumafai i aso uma? Sa’o lelei! Atonu e eseese uma o tatou manaoga ma tulaga, ae o le a taialaina i tatou e le Agaga a o tatou taumafai e mulimuli i aoaoga ma faataitaiga a le Faaola i aso taitasi.
E tusa lava po o le a le mea ou te taumafai i ai, ua uunaia au i le iloaina o loo augani mai Keriso mo i tatou taitoatasi ina ia tasi ma Ia ma le Tama Faalelagi.
Mulimuli ia i Latou ua Poloaiina e Iesu Keriso e Taitai A’u
A o faasolo ina sili atu lo’u tuuina o le Faaola i le totonugalemu o lo’u olaga, ua ou matauina ai ua faateleina lo’u tomai e lotogatasi ai ma Ana perofeta filifilia, ma ua molimau mai le Agaga ia te a’u ua tofia i latou e taitai a’u. O le upu “tofia” o lona uiga o le “pule e galue ai, mo, po o le suitulaga i se isi.”
O le Mosaea 18 o se faataitaiga matagofie lea o tagata o loo maua le lotogatasi ma le Atua e ala i le mulimuli i perofeta. E lei leva ona liua Alema le Matua ina ua uma ona maua le savali a Apinati. Ona amata lea ona ia aoaoina tagata o e na naunau e ui atu i se laueleele sa “tumu, i taimi po o vaitau, i manu feai” (Mosaea 18:4) e aoao ai e uiga i le Atua ma Lana fuafuaga atoatoa mo i latou.
O i latou na mulimuli ia Alema i lenei tala e fesoasoani ia i tatou ia malamalama ai e ui o nisi taimi atonu e lagona ai e pei tatou te malaga i tulaga faigata e mulimuli i o tatou taitai (tagai Mataio 5:10), ae o loo i ai le saogalemu i le lotogatasi ma perofeta a le Atua aua o le a latou taitaiina i tatou i taimi uma ia Iesu Keriso. A o maua e tagata le upumoni ma osia feagaiga ma le Atua, “sa fili faatasi o latou loto i le lotogatasi ma le alofa o le tasi i le isi” (Mosaea 18:21).
Ona o le meaalofa o tekinolosi, ua avea ai perofeta ma soa maoae ia te a’u—aemaise lava i lo’u tuuatoatasi. Sa ou faalogologo soo i a latou savali a o ou moaina la’u vao, faamama lo’u fale, asu le kiona, ma alu e savalivali. O o latou loto ma leo ua ou masani ai.
Ma e tusa lava pe sa faigata a latou fautuaga ia te a’u, ae sa latou fesoasoani ia te a’u e tuu le Faaola i le totonugalemu o lo’u olaga. Ua sili atu lo’u lotogatasi ma le Aiga Atua ona o i latou ua poloaiina e Keriso e taitai a’u.
Tuufaatasia i le Alofa ma le Manatu Mamafa o le Tasi i le Isi
I lo’u aafiaga, o le mulimuli ia Iesu Keriso ma Ana perofeta o le a taitaiina ai i tatou i taimi uma e tausia e le tasi le isi. Na aoao mai Peresitene Eyring: “O le olioli o le lotogatasi ua Ia matuai finagalo e tuuina mai ia i tatou e le taitoatasi. E tatau ona tatou sailia ma agavaa i ai faatasi ma isi.” E tele naua eseesega i tagata i lo’u olaga i aso uma, ma ou te le iloa i taimi uma le auala e galue ai i se auala e fesoasoani ai e aumai le lotogatasi. Ma o nisi taimi ou te lagona ai le matuai vaivai lava, ma o lo’u manao ia lotogatasi e le malosi tele.
O le manatuaina “o le faamaualuga o le fili sili lea o le lotogatasi” e mafai ona fesoasoani ia i tatou e saili ai le fesoasoani a le Alii i le atiina ae o le lotogatasi. 1 Korinito 12 na fesoasoani ia te a’u ia ou iloa ai o fanau taitoatasi a le Atua e eseese meaalofa faaleagaga ma o a latou meaalofa e taua i lo’u olaga. Ua ou aoaoina foi o eseesega i Ana fanau e atili ai ona faafiafiaina ma matagofie mea uma.
E ui lava ou te iloa e le tatau ona tatou faatusatusaina i tatou lava i isi, ae paga lea, o nisi taimi ou te lelei tele i le faatusatusaina o o’u vaivaiga i malosiaga o isi. Ma o nisi taimi, o nei ituaiga o lagona ua taofia ai au mai le atiina ae o le lotogatasi ma isi aua sa ou faamasinoina i latou i le amioletonu (tagai Mataio 7:1, vaefaamatalaga a).
Ua manino o le Alii e finagalo o Ia ia “leai se fevaevaeaiga [fevaevaeaiga po o se tuueseeseina] i le tino; ae ia tutusa le tausiga o tagata o le ekalesia” (1 Korinito 12:25).
O lea sa ou fesili ai, “O le a se mea e mafai ona ou faia e taofi ai le tuueseeseina o a’u lava mai isi i lo’u mafaufau ma lo’u loto?”
Sa ou tatalo ia vaai i isi e pei ona vaai i ai Keriso ia i latou. Sa ou tatalo ia iloa le meaalofa na latou maua lea na faafetaiaia ai lo’u manaomia i lena aso. Ma e tutusa lava le taua, ua ou faatagaina a’u lava ia ou lotofaafetai ai.
Ona amata lea ona ou fesili ifo ia te a’u lava, “O le a se mea e mafai ona ou aoaoina mai isi o e ua i ai ni aafiaga ou te le mauaina lava?” O le faia o lenei mea ua fesoasoani ia te a’u e vaai ai i lo’u aiga, le tagata faigaluega i le Pamu penisini, o talavou, tagata faigaluega, ma tagata uma o loo siomia a’u i ni auala e sili atu ona anoa ma fesootai atu ia i latou.
Sa tatau foi ona ou faalagolago i malosiaga o isi ina ia faamanuiaina ai i lo’u aiga, i le galuega, i valaauga, po o ’au. I le tele lava o tulaga, nai lo le tauva, sa matou faaatoatoaina ma faalagolago le tasi i le isi. O a tatou taumafaiga tuufaatasi ma eseesega, na faalauteleina e le Tama Faalelagi, na aumaia ai vavega—o vavega ia e na o se Atua atoatoa e mafai ona faia, o lē e silisili i le tuufaatasia o manaoga, eseesega, ma meaalofa i se auala e faamanuiaina ai Ana fanau.
Ou te iloa o o’u uiga ma amioga e mafai ona fatuina pe faaleagaina ai le lotogatasi. Ou te iloa foi ou te manao e fatu. Ou te manao ia maua le saogalemu lea e oo mai faatasi ma le lotogatasi ia Keriso. Ou te fia lagona le latalata atu i le Tama Faalelagi ma Iesu Keriso ma faataga perofeta e taitai a’u ia i La’ua. Ma ou te manao e fesoasoani ma fesoasoani mai isi i la’u malaga iinei i le olaga nei.
Ou te fia filifili le lotogatasi ia Keriso. Ou te mautinoa o le faia faapea o le a aumaia ai le olioli sili atu!