E Na’o Tusiga Faaeletonika: Talavou Matutua
O Ai o Loo Faaosofia Oe e Ola i le Talalelei?
O le tusitala e sau mai Taipei, Taiuani.
Ina ua ou iloaina sa ou faalagolago i isi e faamalosia la’u molimau, sa ou filifili e tatau ona ou taulai atu i la’u sootaga patino ma le Faaola.
Ina ua amata la’u semesa muamua i le kolisi i le Iunaite Setete, sa ou matua fiafia lava. Sa ou auai i se aoga e toatele o tagata o le Ekalesia, ma e lei siomia lava a’u e le toatele o tagata o la’u tupulaga o e na talitonu i mea lava ia na ou faia! Sa ou faamoemoe o le a tutusa uma lava o tatou tulaga faatonuina ma fesoasoani le tasi i le isi e tuputupu ae faaleagaga ma faaleatamai.
Ae peitai, sa ou tei ina ua le tusa ma lo’u faamoemoe.
I lo’u aai i Taiuani, sa foliga mai e manatu mamafa lava tagata o le Ekalesia i le talalelei. Latou te lei misia lava se avanoa e fesootai ai ma Iesu Keriso, ma ou te lei misia foi. O iina, ou te alu ai i le malumalu i masina uma ma lo’u uso laitiiti (o le sa faaosofia i taimi uma a’u ou te alu), ou te lei misia lava sauniga lotu (ona o o’u matua), ma sa ou taumafai lava e faia faaiuga sa faatumauina ai lo’u fesootai atu i le Agaga, e pei lava ona faia e tagata na siomia a’u.
Ae i le aoga, e ui e leai se tasi na solia ma le loto i ai poloaiga, mo nisi tagata, ae sa foliga mai sa maualalo le talalelei i a latou lisi o mea e fai. O nisi o i latou na faia ni filifiliga sa na o le faataamilo lava i le faatausiusiuga i le va o le lalolagi ma le talalelei. I le i ai na’o a’u mo le taimi muamua, sa ou pisi ai ma maua ai mea sa faia e isi tagata uma na siomia a’u. E lei umi ae ou iloaina le faigofie ona tosina e le lalolagi o siomia ai oe pe a e le faamuamuaina le talalelei.
Toe Faamumuina o Lo’u Malosiaga Faaleagaga
Pe a faia e uo na siomia a’u ni faaiuga e le ogatasi i taimi uma ma tulaga faatonuina o le talalelei, sa amata ona ou mafaufau pe o ou ola i se auala ua faaleagaga tele. Sa ou mafaufau pe o a’u o se tagata ese—pe ua ou matua manatu mamafa ea i le talalelei. Sa amata ona ou lagonaina le tuuatoatasi, aemaise lava i le lotu. Sa ou lagona le faaosoosoina e sui ou tulaga faatonuina ina ia fetaui ma tagata na siomia ai a’u.
Ae peitai, i lena taimi, na faasoa mai ai e Peresitene Russell M. Nelson se savali mamana i le konafesi aoao:
“E lei sili atu ona tatou manaomiaina muamua se malosiaga faaleagaga lelei nai lo le taimi nei. … O le malosiaga faaleagaga e mafai ona fesoasoani ia i tatou ia tetee atu i osofaiga leaga ma fouvale a le fili ma taofia ana taumafaiga e faatamaia lo tatou faavae patino faaleagaga.
“… Ou te uunaia outou ia o i le ala o le feagaiga ma tumau ai iina. Ia lagonaina le olioli o le salamo i aso taitasi. Aoao e uiga i le Atua ma le auala e galue ai o Ia. Saili ma faamoemoeina vavega. …
“A o outou faatinoina nei sailiga, ou te folafola atu ia te outou le tomai e agai ai i luma i luga o le ala o feagaiga faatasi ma se malosiaga faateleina, e ui i soo se faafitauli tou te fetaiai.”
O le taimi la lena na taia ai loa a’u.
Sa sili atu lo’u fiafia i mea sa faia e isi nai lo la’u lava sootaga patino ma le Faaola. Sa ou iloaina foi o la’u aoga sa i autafa tonu lava o se malumalu ma ou te lei i ai lava iina! Na manino mai foi le tele o lo’u faalagolago i isi e tosina ai lo’u faaleagaga i Taiuani.
Sa manaomia ona ou faia le galuega e toe faamumu ai lo’u malosiaga faaleagaga ma taulai atu ia Keriso—o le e tatau ona avea ma ou faaosofiaga sili e ola ai i Lana talalelei.
Mauaina o le Faaosofiaga e ala i le Taulai Atu i le Faaola
Sa amata ona ou faia ni suiga.
E tusa lava pe ou te lei lagonaina le faaosofia e alu i le lotu pe auai i le malumalu pe faia soo se mea faaleagaga i nisi aso, ae sa ou filifili lava e faia ma taulai atu i lo’u Faaola. Sa le afaina po o le a le mea o fai e isi tagata uma.
E faigofie i le lalolagi ona le amanaiaina faamanuiaga o le talalelei, ae a ou taulai atu ia te Ia, ou te manatua le mea e sili ona taua.
Nai lo le faavaivai i le tuuatoatasi ma taulai atu i eseesega i le auala o loo tatou ola ai i o tatou olaga, ua ou aapa atu nei i isi. Ou te taumafai e fai ni uo ma matau fegalegaleaiga lelei uma sa ou faia ma i latou, e pei o se ataata faigofie po o se talanoaga agalelei.
Ou te le o toe faatusatusaina lo’u avea ma soo i isi. Nai lo lena, ou te taulai atu i le tausia o o’u mausa faaleagaga ia tumau ma faamalosia la’u sootaga ma le Tama Faalelagi ma Iesu Keriso. Pe a ou faamuamuaina la’u sootaga ma i La’ua, ou te manatua le tele o Lo La alofa atoatoa ia i tatou taitoatasi, ma e faamanatu mai ai ia te a’u e ofo atu le alofa tunoa i isi e pei lava ona La ofoina mai le alofa tunoa ia te a’u.
Na saunoa mai Peresitene Russel M. Nelson: “Ia pulea e oe lau lava molimau ia Iesu Keriso ma Lana talalelei. Galue i ai. Faafailele ina ia tuputupu ae. Fafaga i upumoni. … A o e faia le faamalosiga faifai pea o lau molimau ia Iesu Keriso ma au faamuamua e sili ona maualuga, vaavaai mo ni vavega e tutupu i lou olaga.
Ua faigofie i le lalolagi ona faasamasamanoa i lou avea ai ma soo, aemaise lava pe a e na o oe mo le taimi muamua a o avea oe ma se talavou matua. Ae peitai, ou te fautuaina outou ia talia le valaaulia a lo tatou perofeta e faamalosia lo outou faavae o le faatuatua ia Iesu Keriso.
O le faamuamuaina o Ia e faatumauina ai lo’u agai i luma i le ala o le feagaiga.