Aisea e taua ai le Uluai Faaaliga?

I le tautotogo o le 1820, sa faaali mai ai le Atua le Tama ma Lona Alo o Iesu Keriso, i le Perofeta o Iosefa Samita. O lenei faaaliga, lea na faailogaina ai le amataga o le Toefuataiga o le talalelei, o le mea aupito sili lea ona taua ua tupu talu mai le Toetu o Iesu Keriso. O le tatalo faamaualalo a Iosefa Samita sa oo ai i le toefuataiga mai o upumoni o le talalelei, pule o le perisitua, ma sauniga faaola. “O le faaaliga e tasi ua tali ai [fesili] uma e uiga i le Atua ma lona uiga faalelagi. … O Lona manatu mai i tagata e ala i le pule ua faasafua mai i le tagata ua manino lea. Ua mautinoa lava le lumanai o le galuega. O nei upumoni ma isi upumoni matagofie ua faamanino mai i lena uluai faaaliga” (Aoaoga a Peresitene o le Ekalesia: Tavita O. MaKei [2003], 93).

Saunia oe lava ia faaleagaga

Na faapefea ona e maua se molimau e faapea sa vaai Iosefa Samita i le Atua le Tama ma Lona Alo, o Iesu Keriso? Ua faapefea ona faamanuiaina lou olaga ona o lenei molimau? O le a le taua o le Uluai Faaaliga ia te oe?

E mafai faapefea e le suesue i le Uluai Faaaliga ona faalolotoina molimau a alii talavou taitoatasi o lau korama? E mafai faapefea ona e fesoasoani i alii talavou ia malamalama i le taua o lenei mea maoae na tupu?

A o e sauniuni, ia suesue ma le agaga tatalo ia mau ma punaoa nei ma isi mea e te filifilia. O le a se mea e te lagona o le a sili atu le anoa i alii talavou e te aoaoina?

Iosefa Samita—Talafaasolopito 1:11–19, 24–25

Vitio: “O Le Toefuataiga”

19:15

Dieter F. Uchtdorf, “O Fua o le Uluai Faaaliga Vaaaia,” Ensign po o le Liahona, Me 2005, 36–38

Aoao atu i le ala a le Faaola

Sa valaaulia e le Faaola tagata e mulimuli ia te Ia e molimau atu i isi i le moni o Ana aoaoga. A o latou faia, sa pai atu le Agaga i o latou loto. E mafai faapefea ona e uunaia alii talavou e faasoa atu a latou molimau i le tasi ma le isi?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tuu atu i tagata taitoatasi o le korama se avanoa e ta’u atu ai se mea se tasi na te manatua mai le lesona o le vaiaso talu ai.
Ia usu faatasi o se korama le viiga “O Le Talosaga Muamua a Iosefa Samita” (Viiga, nu. 14) Ia valaaulia alii talavou e faasoa atu o latou lagona e uiga ia Iosefa Samita ma le mea na oo i ai ina ua ia vaai ma talanoa atu i le Atua le Tama ma Iesu Keriso.

Aoao faatasi

O gaoioiga taitasi o loo i lalo e mafai ona fesoasoani i tagata o le korama e aoao ai e uiga i le Uluai Faaaliga ia Iosefa Samita. O le mulimuli ai i le taiala a le Agaga, ia filifili se mea se tasi pe sili atu o le a sili ona aoga i lau korama:

Fai i alii talavou e tusi i lalo nisi o faamanuiaga ua latou maua ona o le Uluai Faaaliga. Fai atu ia i latou e vaavaai mo isi faamanuiaga o le Uluai Faaaliga a o latou faitauina parakalafa mulimuli e 10 o le lauga a Peresitene Dieter F. Uchtdorf “O Fua o le Uluai Faaaliga Vaaia.” Fai atu ia i latou e faasoa atu mea ua latou maua ma o latou lagona i le taua o le Uluai Faaaliga.
Ia faitau faatasi o se korama e uiga i le Uluai Faaaliga ia Iosefa Samita i le Iosefa Samita—Talafaasolopito 1:7–20. Fai atu i alii talavou e vaavaai mo upumoni e mafai ona tatou aoao mai le aafiaga a Iosefa (mo se faataitaiga, o le Tama ma le Alo e moni, o ni tagata eseese; o Satani ma lona mana e moni, ae e sili atu le malosi o le mana o le Atua; e faafofoga ma tali mai le Atua i tatalo; ma e le’i muta faaaliga). Fai atu i se alii talavou e tusi upumoni i luga o le laupapa. E faapefea ona ese mai nei upumoni mai mea e talitonu i ai isi tapuaiga? O le a se eseesega o o tatou olaga pe ana tatou le iloa nei mea?
Fai atu i alii talavou e faitau filemu ma mafaufau loloto i le Uluai Faaaliga ia Iosefa Samita ma lana molimau o loo i le Iosefa Samita—Talafaasolopito 1:11–19, 24–25 (pe matamata i le vitio “O Le Toefuataiga”). Fai atu ia i latou e mafaufau pe aisea ua taua ai le Uluai Faaaliga i le talafaasolopito o le lalolagi. Aisea e taua ai ia i tatou o ni tagata taitoatasi? Faasoa atu lau molimau e uiga i le taua o le Uluai Faaaliga, ma fai atu i alii talavou e faasoa atu o latou manatu ma molimau.

19:15
Fai atu i alii talavou e toe faamanatu tala faatusi paia o le faaalia mai e le Atua le Tama ma Iesu Keriso o i Laua lava i tagata i luga o le fogaeleele (e pei o le Mataio 3:13–17; Galuega 7:54–60; 3 Nifae 11:3–10). E mafai foi ona e faaali atu ni ata o nei mea na tutupu (tagai i le Tusi Ata o le Talalelei,35, 63, ma le 82). Fai atu ia i latou e otooto ia tala taitasi. Ona fai atu lea i ai e faitau le Iosefa Samita Talafaasolopito 1:17 (tagai i le Tusi Ata o le Talalelei,90). Na faapefea ona tutusa le Uluai Faaaliga ia Iosefa Samita ma isi faaaliga [mai a le Atua le Tama ma Iesu Keriso]? O le a le mea sa tulaga ese ai? Fai atu i alii talavou e faasoa atu pe aisea e taua ai ia i latou le Uluai Faaaliga.

Fai atu i alii talavou e faasoa atu se mea ua latou aoaoina i le asō. Pe ua tele atu so latou malamalama i le Uluai Faaaliga ia Iosefa Samita? O a ni o latou lagona po o ni uunaiga o i ai? E i ai nisi a latou fesili faaopoopo? Mata e aoga le toe faaalu o se isi taimi i lenei aoaoga faavae?

Motugaafa faafaiaoga

“Fesili atu ia i latou na e aoaoina po o le a sa latou tala e fai pe afai ua manao se tasi e fia iloa po o a mea na latou aoaoina mai le lesona” (O Le Aoao Atu, E Leai Se Isi Valaauga E Sili Ai [1999], 101).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu ona lagona e uiga i le taua o le Uluai Faaaliga.
Valaaulia tagata o le korama e faasoa atu mea na latou aoaoina nei i se uo po o se tagata o le aiga.