O le a le matafaioi a Iosefa Samita i le Toefuataiga?

I le mavae ai o seneturi o le liliuese, na toefuatai mai ai e le Alii Lana Ekalesia ma le atoatoaga o le talalelei e ala i le Perofeta o Iosefa Samita. O lenei Toefuataiga sa amata i le Uluai Faaaliga ia Iosefa, lea sa faaali mai ai le Tama Faalelagi ma Iesu Keriso. E ala mai i le Perofeta o Iosefa, na aumai ai e le Alii le Tusi a Mamona ma isi tusitusiga paia, toefuatai mai le pule o le perisitua, ma faatuina Lana Ekalesia.

Saunia oe lava ia faaleagaga

Ua faapefea ona uunaia lou olaga i le soifuaga ma le misiona a Iosefa Samita? Na faapefea ona e maua lau molimau ia Iosefa Samita?

O i ai ni molimau a alii talavou e uiga i le Perofeta o Iosefa Samita? E mafai faapefea ona e fesoasoani ia i latou e faamalolosia [a latou molimau]?

A o e suesue ma le agaga tatalo i mau ma punaoa nei, o le a se lagona o musuia ai oe e faasoa atu i alii talavou?

2 Nifae 3:3–25 (Sa muai silafia e perofeta anamua le misiona a Iosefa Samita o se perofeta ma se talifaaaliga)

MF&F 35:17–18 (O le Perofeta o Iosefa Samita, na toefuatai mai ai e le Alii le atoatoaga o le talalelei)

MF&F 76:22–24 (Molimau a Iosefa Samita ia Iesu Keriso)

MF&F 135:3 (O le Perofeta o Iosefa Samita, na tuuina mai ai e le Alii ia tusitusiga paia faaopoopo)

Iosefa Samita—Talafaasolopito 1:11–25 (Sa faaali mai le Atua le Tama ma Iesu Keriso ia Iosefa Samita)

Craig C. Christensen, “O Le A Ou Faatu Mai Se Tagatavaai Filifilia,” Ensign po o le Liahona, Nov. 2016, 27–30

Neil L. Andersen, “O Le Faatuatua e le Tupu Faafuasei, ae e ala i Filifiliga,” Ensign po o le Liahona, Nov. 2015, 65–68

Neil L. Andersen, “Iosefa Samita,” Ensign po o le Liahona, Nov. 2014, 28–31

“Iosefa Samita,” Faamaoni i le Faatuatua (2004), 83–84

Vitio:“Iosefa Samita: O Le Perofeta o le Toefuataiga”

12:50

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu, pe mafaufau i ni ou lava manatu, e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i se alii talavou e tusi se ata i luga o le laupapa e faatusa i mea sa aoaoina e le korama i le vaiaso na te’a, ma tuu atu i isi alii talavou e mate le mea sa ia tusia.
I luma atu, masalo o le lua po o le tolu vaiaso ao lei faia le fonotaga a le korama, valaaulia ia alii talavou e talia le lui a Elder Neil L. Andersen: ”Ia maua sau oe lava molimau e uiga i le Perofeta o Iosefa Samita. Tuu atu lou leo e fesoasoani i le faataunuuina o upu faavaloaga a Moronae ina ia tautala i upu lelei e uiga i le Perofeta.“ Uunaia ia alii talavou ia mulimuli i le fautuaga a Elder Andersen ina ia faasoa atu ma a latou uo ma aiga ia mau o i le Tusi a Mamona, ”faailoa atu o Iosefa sa avea ma se meafaigaluega i aao o le Atua,“ ma faitau i le molimau a le Perofeta. (Tagai “Iosefa Samita,” Ensign po o le Liahona, Nov. 2014, 30.) I le amataga o le fonotaga a le korama, fai atu ia i latou e faasoa mai ni mau sa latou filifilia ma soo se uunaiga sa latou mauaina ao latou faitau i le molimau a Iosefa Samita.

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama ai i le matafaioi a Iosefa Samita i le Toefuataiga. O le mulimuli ai i le taiala a le Agaga, ia filifili se mea se tasi pe sili atu o le a sili ona aoga i lau korama:

Valaaulia alii talavou e faitau le saunoaga a Elder Craig C. Christensen “O Le A Ou Faatu Mai Se Tagatavaai Filifilia,” ma saili mo faamanuiaga ua tatou maua ona o le Perofeta o Iosefa Samita. Fai atu ia i latou e tusi mea latou te maua i luga o le laupapa. O a nisi faamanuiaga ua tatou maua ona o Iosefa Samita e mafai ona mafaufau i ai alii talavou? Mafaufau e faasoa atu pe faapefea ona e mauaina lau molimau ia Iosefa Samita ma pe faapefea ona avea le Toefuataiga o le talalelei ma faamanuiaga i lou olaga.
Fai atu i uso o le korama e mafaufau faapea o se uo o se isi lotu ua fesili mai, “Aisea e taua tele ai Iosefa Samita i lau Ekalesia?” Valaaulia i latou e vaavaai mo ni tali talafeagai i le fesili lenei i le vitio “Iosefa Samita: O Le Perofeta o le Toefuataiga.” E mafai foi ona e faitauina le vaega o faaautuina “Fesili Faamaoni” mai le saunoaga a Elder Neil L. Andersen “O Le Faatuatua e le Tupu Faafuasei, ae e ala i Filifiliga” ina ia fesoasoani ia i latou i le ala e tali atu ai i faitioga e uiga ia Iosefa Samita.

12:50
Valaaulia ni uso o le korama e faia se lisi o mea na tuuina mai e le Alii ia i tatou e ala mai ia Iosefa Samita. Mo manatu e faaopoopo i la latou lisi, fai atu ia i latou e faitau le Mataupu Faavae ma Feagaiga 135:3 ma itulau 83–84 i le Faamaoni i le Faatuatua. O le a le mea ua ese ai o tatou olaga ona o le galuega sa fai e le Alii e ala mai ia Iosefa Samita?
Fai i alii talavou e faitau le Iosefa Samita—Talafaasolopito 1:7–20, ma vaavaai mo upumoni sa aoaoina e Iosefa Samita e ala mai i le Uluai Faaaliga. O le a le mea sa iloa e Iosefa e uiga i le Tama Faalelagi ma Iesu Keriso? e uiga ia te ia lava? e uiga i le fili? Aisea e taua ai ia i tatou ona tatou malamalama i nei upumoni i aso nei?
Faaali le vitio “Iosefa Samita: O Le Perofeta o le Toefuataiga”, ma fai atu i alii talavou e faasoa atu se mea ua latou aoaoina po o se mea ua faagaeetia ai i latou e uiga i le Perofeta o Iosefa Samita. Mafaufau e faamatala le auala na maua ai lau molimau o Iosefa Samita o se perofeta.

12:50

Fai i alii talavou e faasoa atu mea ua latou aoaoina i le asō. Pe ua latou malamalama i le matafaioi a Iosefa Samita i le Toefuataiga o le talalelei? O a ni o latou lagona po o ni uunaiga o i ai? E i ai nisi a latou fesili faaopoopo? Mata e aoga le toe faaalu o se isi taimi i lenei aoaoga faavae?

Motugaafa faafaiaoga

“O fesili e tusia i luga o le laupapa ae lei amataina le vasega o le a fesoasoani i tagata o loo aoaoina e amata ona mafaufau e uiga i autu ao lei amataina le lesona” (O Le Aoao Atu, E Leai Se Isi Valaauga E Sili Ai, 100).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu ona lagona i le pogai ua taua ai Iosefa Samita i lona olaga ma valaaulia isi tagata o le korama e fai le mea lava lea e tasi.
Ia talanoa ma le korama lo tatou tiute faaleperisitua o le aoao atu o isi e uiga i le misiona a Iosefa Samita.