Na faapefea ona toefuatai mai le perisitua?

Sa toefuatai mai le perisitua ia Iosefa Samita e ala i le faaee mai o lima o i latou o e sa umiaina i aso anamua. Ia Me 1829, sa toefuatai mai ai e Ioane le Papatiso le Perisitua Arona, ma i se taimi e le’i mamao mai ai, sa toefuatai mai ai le Perisitua Meksisateko e Peteru, Iakopo, ma Ioane, o le toatolu o uluai Aposetolo a le Faaola. I le aso 3 o Aperila, 1836, sa toefuatai mai ai e Elia, ma Elaia ki faaopoopo o le perisitua.

Saunia oe lava ia faaleagaga

Na faapefea ona e maua se molimau i le toefuataiga o le perisitua? Ua faapefea ona faia e lenei molimau se eseesega i lau auaunaga faaleperisitua?

O a ni mea ua iloa e alii talavou e uiga i le toefuataiga o le perisitua? O a ni aafiaga na latou maua sa faapea ona fesoasoani e fausia ai a latou molimau i le pule o le perisitua?

Ia suesue ma le agaga tatalo ia mau ma punaoa nei. O le a se mea e musuia ai oe e uiga i le toefuataiga o le perisitua?

Eperu 5:4; Mataupu Faavae o le Faatuatua 1:5 (E ao ona valaauina se tagata e le Atua ia maua le perisitua)

MF&F 1:20 (Sa toefuatai mai le talalelei ina ia mafai ona tautatala tagata uma i le suafa o le Alii)

MF&F 2 (O Elia e faaalia maia le perisitua; o folafolaga i tama ua totoina i loto o le fanau)

MF&F 13; Iosefa Samita—Talafaasolopito 1:66–72 (Na toefuatai mai e Ioane le Papatiso le Perisitua Arona)

MF&F 27:12–13 (Na toefuatai mai e Peteru, Iakopo, ma Ioane le Perisitua Mekisateko)

MF&F 110 (O Mose, Elia, ma Elaia na toefuataia mai nisi ki o le perisitua)

David A. Bednar, “O Mana o le Lagi,” Ensign po o le Liahona, Me 2012, 48–51 (tagai foi i le vitio “Pule ma le Mana o le Perisitua”)

Jeffrey R. Holland, “O Le Mea ua Sili Ona Tulaga Ese ai i Tatou,” Ensign po o le Liahona, Me 2005, 43–45.

Vitio: “O Le Toefuataiga o le Perisitua”

Vitio: “O le Perisitua Vaega 4: O le Toefuataiga o le Perisitua”

Aoao atu i le ala a le Faaola

Sa silafia e le Faaola mea e gafatia e Ona soo ma maua ni auala tulaga ese e fesoasoani ai ia i latou e aoao ma tutupu ae ai—auala e sili ona lelei mo i latou. Ua ia te oe se avanoa tulaga ese e fesoasoani ai i alii talavou taitoatasi ia maua se molimau i le toefuataiga o le perisitua. O lenei molimau e mafai ona faamanuiaina ai e faavavau o ia, lona aiga, ma isi.

Tuu atu i alii talavou e taitai

Tagai i se faataitaiga o le lisi o mataupu talanoaina o le fonotaga a le korama.

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Tagai i isi manatu e aoao mai ai ma aoao atu.

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

• Fai i ni nai alii talavou e tusi se fuaiupu se tasi i luga o le laupapa e otooto ai le taua o le upumoni sa latou aoaoina i le vaiaso ua te’a.

• Afai e mafai, ia faasoa atu lou laina o le faasologa o le pule o le perisitua i le korama ma faamatala atu po o le a lea mea (pe valaaulia se alii talavou e faasoa atu lana laina o le perisitua). O le a se mea o loo aoao mai i le laina o le pule [o le perisitua] i alii talavou e uiga i le toefuataiga mai o le perisitua? (E mafai e e o umia le Perisitua Mekisateko ona talosagaina se kopi o le latou laina o le faasologa o le pule o le perisitua i le auina atu o se imeli i le [e-mail].) Mafaufau e sailiili i tagata o i le laina o le pule [o le perisitua]. O le a se mea na e aoaoina o uunaia ai oe e faamamalu le pule o le perisitua?

Aoao faatasi

Tagai i isi manatu e aoao mai ai ma aoao atu.

O gaoioiga taitasi o loo i lalo e mafai ona fesoasoani i tagata o le korama ia malamalama i le toefuataiga mai o le perisitua. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

• Ia valaaulia se tagata o le korama e aoao atu se vaega o le lesona lenei. E mafai ona ia faia lenei mea o se vaega o lana fuafuaga o le Tiute i le Atua e aoaoina ma aoao atu e uiga i le toefuataiga o le perisitua (tagai i le “Malamalama i Aoaoga Faavae,” itulau 18, 42, po o le 66).

• Ia faaali atu ni ata e faaalia ai mea na tutupu i le toefuataiga o le perisitua (tagai i le Tusi Ata o le Talalelei, 93–95), pe matamata le vitio “Toefuataiga o le Perisitua.” Tuu atu i alii talavou e faailoa atu tagata autu sa auai i nei mea na tutupu (e pei o Iosefa Samita, Ioane le Papatiso, Elia, ma isi). Faitau mau e uiga i mea na tutupu (e pei o na o loo fautuaina atu i le otootoga lenei), ma fai atu i alii talavou po o a ni a latou fesili o i ai. Fai atu i alii talavou taitoatasi e faasoa atu se auala se tasi ua faamanuiaina ai o ia i le perisitua.

• Tuu atu i alii talavou ia fesili sa tali e Elder L. Tom Perry i le “O le Perisitua, Vaega 4: O le Toefuataiga o le Perisitua.” Tuu atu i alii talavou e tusi a latou tali i fesili ae latou te le’i matamataina le vitio; ona faaali lea o le vitio ma valaaulia i latou e faasoa atu soo se manatu faaopoopo latou te maua mai tali a Elder Perry. Fai atu ia i latou e faasoa atu po o a ni o latou lagona i le taimi na latou mauaina ai le perisitua.

• Vaevae le lauga a Elder Jeffrey R. Holland “O Le Mea ua Sili Ona Tulaga Ese ai i Tatou” i alii talavou. Fai atu i alii talavou e su’e a latou vaega o le lauga, vaavaai mo tali i fesili “E faapefea ona faaee mai le perisitua?” ma le “Aisea e tuuina mai ai le perisitua i le faiga lenei?” O se vaega o lenei talanoaga, ia fai atu i alii talavou e faitau le Eperu 5:4 ma le Mataupu Faavae o le Faatuatua 1:5. Aisea e taua ai i e umia le Perisitua Arona ona iloa e uiga i le toefuataiga mai o le perisitua?

• Faaali atu le vitio “Pule ma le Mana o le Perisitua,” ma talanoa o se korama ia fesili sa fesili ai le tamā o Elder David A. Bednar (pe fai atu i le alii talavou e faitau lenei aafiaga i le lauga “O Mana o le Lagi”). O a ni auala e tatau ona ese ai i tatou mai isi alii i le lalolagi ona ua tatou umia le perisitua?

Fai i alii talavou e faasoa mai mea ua latou aoaoina i le asō. Pe ua latou malamalama lelei i le toefuataiga mai o le perisitua? O a ni o latou lagona po o ni uunaiga o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Afai e toatele ni tagata e i ai ni o latou manatu e uiga i se mataupu, atonu e te manao e tuuina atu se faamatalaga faapenei, ‘O le a tatou faalogo muamua atu i ou manatu, ona sosoo ai lea ma oe.’ Ona nonofo lelei ai lea o i latou o loo e aoaoina aua ua latou iloa o le a latou maua se avanoa e tautatala ai” (O Le Aoao Atu, E Leai Se Isi Valaauga E Sili Ai [1999], 72).

Valaaulia e faatino

Tagai i isi manatu e aoao mai ai ma aoao atu.

E faaiuina e le uso o le au peresitene o le korama lea o loo taitai le fonotaga. E mafai ona ia:

• Faasoa atu ona lagona e uiga i le toefuataiga o le perisitua pe valaaulia isi e faia le mea lava lena e tasi.

• Valaaulia tagata o le korama e fatufatu se otootoga e aoao atu ai isi e uiga i le toefuataiga o le perisitua (tagai i le Tiute i le Atua,18, 42, po o le 66).