Aisea na alagatatau ai se toefuataiga?

I le taimi o Lana auaunaga i le olaga nei, sa faatuina ai e Iesu Keriso Lana Ekalesia i le pule o le perisitua. Sa taitaia e perofeta ma aposetolo o e sa aoaoina atu aoaoga faavae moni ma maua mai faaaliga ia sa tusifaamaumauina o ni tusitusiga paia. Ina ua maliliu aposetolo, sa aveeseina le pule o le perisitua mai le lalolagi, sa le toe i ai ni faaaliga, ma sa leiloloa aoaoga faavae taua pe ua faafenumia’ia. O le Ekalesia sa faatuina e Iesu Keriso sa toefuataiina mai e ala i le Perofeta o Iosefa Samita.

Saunia oe lava ia faaleagaga

O a aafiaga o le Liliuese ua e vaaia i le lalolagi? Ua faapefea ona faamanuiaina oe e le Toefuataiga o le talalelei?

O le a se mea e tatau ona iloa e alii talavou e uiga i le Liliuese ma le Toefuataiga? E mafai faapefea e le malamalama i le Liliuese ma le Toefuataiga ona fesoasoani ia i latou?

Ia suesue ma le agaga tatalo i mau ma punaoa nei. O le a se mea e te lagona o le a fesoasoani i alii talavou e malamalama ai i le pogai na manaomia ai se toefuataiga?

Efeso 4:11–14; Mataupu Faavae o le Faatuatua 1:6 (O le Ekalesia i aso nei ua tutusa lava le faatulagaga ma le Ekalesia i aso o le Faaola)

Isaia 29:13–14; Amosa 8:11–12; 2 Tesalonia 2:3; 1 Nifae 13:24–29 (Sa aveesea le Ekalesia ona o le liliuese)

MF&F 1:17–23, 30 (Sa toefuatai mai e Iesu Keriso ia Lana Ekalesia e ala ia Iosefa Samita)

Iosefa Samita—Talafaasolopito 1:6–20 (Uluai Faaaliga ia Iosefa Samita)

D. Todd Christofferson, “E Manaomia i Se A le Ekalesia,” Ensign po o le Liahona, Nov. 2015, 108–11

Robert D. Hales, “Sauniuniga mo le Toefuataiga ma le Afio Mai Faalua: “E i Ou Luga Ai Pea Lo’u Lima,’” Ensign po o le Liahona, Nov. 2005, 88–92

“Liliuese,” Faamaoni i le Faatuatua (2004), 92–93

“Toefuataiga o le Talalelei,” Faamaoni i le Faatuatua, 175–78

Talai La’u Talalelei (2004), 35–38, 45

Vitio: “O Se Sailiga mo le Upumoni”

15:57

Aoao atu i le ala a le Faaola

Sa faaaoga e le Faaola tusitusiga paia e aoao atu ai ma molimau atu e uiga i Lana misiona. Sa ia aoaoina tagata e mafaufau e uiga i tusitusiga paia mo i latou lava ma faaaoga e su’e ai tali i a latou lava fesili. E mafai faapefea ona e fesoasoani i alii talavou e faaaoga tusitusiga paia e tali ai a latou fesili?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i se alii talavou e faasoa atu pe na faapefea ona uunaia o ia i se mea sa ia aoaoina i le vaiaso ua te’a i le aiga, i le aoga, po o uo.
Faaaoga se mea faitino e aoao ai alii talavou i le manaomia o le Toefuataiga (e pei o se mea ua gau ma e le mafai ona toe lipeaina ae e manaomia lava ona i ai se mea e sui ai). O a isi mea faitino e mafai ona mafaufau i ai alii talavou e faaaoga i le aoaoina o isi e uiga i le manaomia o le Toefuataiga?

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama ai i le mafuaaga ua alagatatau ai le Toefuataiga o le talalelei. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

Valaaulia ia alii talavou e saili i le saunoaga a Elder D. Todd Christofferson “E Manaomia i Se A le Ekalesia,” vaavaai mo ni malamalamaaga e uiga i le Toefuataiga ma le matafaioi a le Ekalesia i aso e gata ai. E mafai ona e valaaulia mamao atu ni nai alii talavou e o mai saunia e faasoa mai pe aisea latou te faafetai ai mo le Ekalesia toefuataiina. Faatasi ai ma se faatagaga mai le epikopo, e mafai foi ona e valaauliaina se tagata faatoa papatiso i totonu o lau vasega e faasoa mai sana molimau i le Ekalesia ma le talalelei toefuataiina.
Valaaulia se tasi o le korama e aoao atu se vaega o le lesona lenei. E mafai ona ia faia lenei mea o se vaega o lana fuafuaga o le Tiute i le Atua ia aoaoina ma aoao atu e uiga i le Liliuese ma le Toefuataiga (tagai i le “Malamalama i le Aoaoga Faavae,” itulau 18, 42, po o le 66).
Faaali atu le vitio “O Se Sailiga mo le Upumoni,” ma tuu atu i alii talavou e ta’u mai le mea sa sue e Uilifoti Uitilafi i le Ekalesia moni. Aisea e taua ai le i ai o nei mea? Na faapefea ona faamanuiaina alii talavou ona o le toefuataiga mai o nei mea? Fai atu ia i latou e faasoa atu nisi mea ua faagaeetia ai i latou e uiga i le sailiga a Uilifoti Uitilafi mo le upumoni.

15:57
Vaelua le korama, ma fai atu i le tasi vaega e aoao atu i le korama e uiga i le ala na faatuina ai e Iesu Keriso ia Lana Ekalesia ma le auala na leiloa ai ona o le Liliuese. Fai atu i le isi vaega e aoao atu e uiga i le Toefuataiga. Tuu atu ia i latou se taimi e sauniuni ai e faaaoga ai le Talai La’u Talalelei (itulau e 35–37 ma le 41), Faamaoni i le Faatuatua (itulau e 92–93 ma le 175–79), ma mau o loo fautuaina atu i le otootoga lenei. Atonu e te manao e fai ni tofiga i nai aso a o le’i faia le fonotaga a le korama.
Tuu atu i alii talavou taitoatasi se mau e uiga i le Liliuese po o le Toefuataiga (e pei o mau o loo fautuaina atu i le otootoga lenei). Fai atu i alii talavou e tusi se ata e faatusa i se mea sa latou aoaoina mai a latou mau, ma tuu atu latou te faasoa atu i le korama. Ia talanoa o se korama ia faamanuiaga ua tatou maua ona o le toefuataiga o le talalelei.
Tuu atu i alii talavou taitoatasi se igoa o se tagata o loo ta’ua i le saunoaga a Elder Robert D. Hales “Sauniuniga mo le Toefuataiga ma le Afio Mai Faalua: ‘E i Ou Luga Ai Pea Lo’u Lima’” (pei o Viliamu Tinitale, Johannes Gutenberg, po o Matini Luteru). Fai atu i alii talavou e faitau pe matamata i le lauga ma sue po o le a le mea sa fai e lena tagata e saunia ai le lalolagi mo le Toefuataiga. Valaaulia i latou e faasoa atu mea ua latou maua.

Fai atu i alii talavou e faasoa atu mea ua latou aoaoina i le asō. Pe ua latou malamalama i le manaomia o le Toefuataiga o le talalelei? O a ni o latou lagona po o manatu o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E mafai ona e faataitaia o loo e faalogo atu e ala lea i lou faaaliina atu o se uiga o le naunau. E mafai ona e vaai i le tagata o loo tautala nai lo anomea o le lesona po o nisi mea o loo i totonu o le potu. E mafai ona e uunaia le tagata o loo tautala e faauma ona manatu e aunoa ma le faalavelaveina. E mafai ona e aloese mai le faasalaveia o talanoaga ae le’i taitai i ni fautuaga po o ni faaiuga” (O Le Aoao Atu, E Leai Se Isi Valaauga E Sili Ai [1999], 69).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Ta’u atu le mafuaaga na manaomia ai le Toefuataiga ma le mafuaaga ua taua ai ia te ia.
Valaaulia isi sui o le korama e faasoa atu o latou manatu e uiga i mea ua latou aoaoina.