Tiute i le Atua
E mafai faapefea ona ou valaaulia tagata uma e o mai ia Keriso?
I le aso sa faatulagaina ai le Ekalesia toefuataiina, sa tuuina mai ai e le Alii i e umia le Perisitua Arona le tiute o le valaaulia o tagata uma e o mai ia Keriso (tagai i le MF&F 20:59). A faataunuu e i latou e umia le Perisitua Arona lenei tiute, latou te aumaia faamanuiaga o le talalelei toefuataiina i fanau a le Tama Faalelagi. Latou te faamalolosia foi a latou molimau ma saunia i latou lava mo se auaunaga faafaifeautalai i le olaga atoa.
Saunia oe lava ia faaleagaga
O a ni aafiaga sa e maua i le valaauliaina o isi e aoao e uiga i le talalelei? Na faapefea ona fesoasoani isi ia te oe e te sau ia Keriso?
O le toatele o alii talavou latou te le iloa i le avea ai ma e umia le Perisitua Arona ua ia i latou se tiute faaleperisitua e valaaulia tagata uma e o mai ia Keriso. O le a se mea e mafai ona e faia e fesoasoani ia i latou ia malamalama ma faataunuu ai lenei tiute paia? O le a se mea e musuia ai i latou e faasoa atu le talalelei ia latou uo ma aiga?
Ia suesue ma le agaga tatalo ia mau ma punaoa nei. O a ni lagona e te maua a o e suesue?
Faataunuuina o Lo’u Tiute i le Atua (2010), 28–29, 52–53, 76–77
1 Timoteo 4:12 (Fai ma faaa’oa’o i e ua faatuatua)
Alema 17:2–3 (Sa saunia e atalii o Mosaea i latou lava e faasoa atu le talalelei)
Moronae 10:32–33 (O le valaaulia a Moronae e o mai ia Keriso)
MF&F 4 (O uiga faaalia e agavaa ai i tatou mo le auauna atu i le Alii)
MF&F 20:46–59 (Ua i ai i e umia le Perisitua Arona se tiute e valaaulia tagata uma e o mai ia Keriso)
MF&F 42:6 (Tala’i atu le talalelei e ala i le mana o le Agaga)
M. Russell Ballard, “Toe Tulitatao,” Ensign po o le Liahona, Me 2014
Richard G. Scott, “Ua Ou Avatu le Faaa'oa'o ia te Outou,” Ensign po o le Liahona, Me 2014
“O Le A Lo’u Faamoemoega i le Avea ai ma se Faifeautalai?” Talai La’u Talalelei (2004), 1–16
Vitio: “Valaau Atu i Tagata Uma e O Mai ia Keriso: Fetufaaiga o le Talalelei”
Aoao atu i le ala a le Faaola
Sa valaaulia e le Faaola isi e molimau atu i upumoni sa latou aoaoina ina ia mafai ona pai atu le Agaga i o latou loto. “A o outou pe se a la outou upu ia te au po o ai? ”Sa Ia fesili ai. A o tali atu Peteru, sa faamalosia ai lana molimau: “O Oe o le Keriso, o le Alo o le Atua soifua” (Mataio 16:15–16). E mafai faapefea i le faasoa atu o le talalelei ona faamalolosia molimau a alii talavou o le korama?
Gaoioiga a le Autalavou e Fesootai i ai
Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.
Tuu atu i alii talavou e taitai
E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.
Amata le aafiaga faaleaoaoga
Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:
-
Fai i alii talavou e faasoa atu se mea latou te manatua mai le talanoaga i le vaiaso ua te’a. Aisea latou te manatuaina ai pea lenei mea?
-
Valaaulia alii talavou e suesue i le Mataupu Faavae ma Feagaiga 20:59 ma faailoa mai tiute o le perisitua o loo ta’ua iina. Valaaulia ni nai alii talavou e faasoa atu se aafiaga sa latou maua i le faasoaina atu o le talalelei i se tagata o le aiga, uo e le toaga i le lotu, po o se uo i se isi tapuaiga. O le a le taunuuga?
Aoao faatasi
O le faamoemoega o lenei lesona o le fesoasoani lea i alii talavou taitoatasi e fai se fuafuaga e faataunuu ai lona tiute faaleperisitua e faasoa atu i se isi tagata le talalelei a Iesu Keriso. Tuu atu i alii talavou se taimi i le taimi o le fonotaga a le korama e tusi ai fuafuaga i a latou tusi o le Tiute i le Atua. Uunai i latou e faasoa atu a latou fuafuaga i le tasi ma le isi, ma i fonotaga o lumanai a le korama, ia valaaulia i latou e faasoa atu o latou aafiaga i le valaauliaina o isi e o mai ia Keriso.
-
Fai i alii talavou e sue mau o loo faaaogaina fuaitau e pei o le “o mai ia Keriso” po o le “o mai ia te a’u” (tagai i le Mataio 11:28; Moronae 10:32; MF&F 20:59). O le a le uiga o le “o mai ia Keriso?“ O a ni mea latou te aoaoina mai nei fuaitau e musuia ai i latou e valaaulia isi e o mai ia Keriso? (Tagai i le Tiute i le Atua,28.) Fai i alii talavou e su’e i le vaega “Galue” o a latou tusi o le Tiute i le Atua (itulau 29, 53, po o le 77) ma fai ni fuafuaga e valaaulia ai se tagata e sau ia Keriso.
-
Faitau faatasi le Mataupu Faavae ma Feagaiga 20:53, ma fai se lisi o auala e mafai ai e faiaoga o aiga ona “leoleo i luga o le ekalesia e le aunoa, ma faatasi ma faamalosi i latou.”E mafai faapefea ona agai i luma alii talavou i le avea ai o ni faiaoga o aiga? Fuafua e valaaulia le peresitene o le korama a le au toeaina e talanoa i le korama pe faapefea ona avea ma se faiaoga lelei o aiga. (Tagai i le Tiute i le Atua,52, 76.) Fai i alii talavou e su’e a latou tusi i le vaega “Galue” o a latou tusi o le Tiute i le Atua (itulau e 53 po o le 77) ma fai ni fuafuaga e avea ai ma ni faiaoga lelei atu o aiga.
-
Faaali atu se ata o Amona, ma fai atu i le korama e fai se aotelega o le tala ia Amona o loo aoaoina sa Lamana (tagai i le Alema 17–19). Ia faatusatusa le tala lenei i le mea na oo i ai Korianetona (tagai i le Alema 39:1–11). E aafia faapefea o tatou tomai e aoao atu ai le talalelei i isi ona o a tatou faataitaiga? (Tagai i le Tiute i le Atua,28.) Fai i alii talavou e su’e i le itulau e 29 o a latou tusi Tiute i le Atua ma fai fuafuaga e faasoa atu ai le talalelei e ala i le avea ma se faataitaiga lelei.
-
Tusi ia mea nei i luga o le laupapa: “O le tuuina atu o se valaaulia e aunoa ma le tulitatao e pei lava _______.” Valaaulia ia uso o le korama e suesue i le saunoaga a Elder M. Russell Ballard “Toe Tulitatao,” vaavaai mo se upusii lea e faamaeaina ai lenei fuaiupu. O a nisi faatusatusaga e mafai ona mafaufau i ai uso o le korama e faamaea ai le fuaiupu? O a nisi mea ua latou mauaina i lenei lauga o le a fesoasoani ia i latou ia malamalama i le taua o le toe tulitatao pe a latou valaauliaina isi e o mai ia Keriso?
-
Faaali le vitio “Valaau Atu i Tagata Uma e o Mai ia Keriso,” ma fai atu i tagata o le korama e vaavaai mo mea sa fai e i latou e umia le Perisitua Arona i totonu o le vitio e fesoasoani ai i le latou korama ia tuputupu ae. Talanoa ni mea e mafai ona latou faia ina ia maua ai ni aafiaga faapena i a latou korama. Tuu atu i sui taitasi o le korama se vaega o le lauga a Elder Richard G. Scott “Ua Ou Avatu le Faaa'oa'o ia te Outou.” Fai i sui o le korama e saili ni mataupu faavae po o se fautuaga mai le lauga e mafai ona fesoasoani ia i latou ia latou taumafaiga e valaaulia isi e o mai ia Keriso. Fai i ai e faasoa mai mea ua latou maua.
4:24
Fai i alii talavou e faasoa atu mea ua latou aoaoina i le asō. Po o latou malamalama i lo latou tiute faaleperisitua o le valaaulia o tagata uma e o mai ia Keriso? O a ni o latou lagona po o ni uunaiga o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?
Motugaafa faafaiaoga
“Faalogo atu ma le faamaoni i manatu o tagata o loo aoao. O lau faataitaiga o le a uunaia ai i latou e faalogo lelei i isi. Afai e te le malamalama i le manatu o se tasi, ia tuu atu se fesili. E mafai ona e faapea atu, ‘Ou te le o mautinoa pe ua ou malamalama. E mafai ona e toe faamalamalamaina mai le mea lena?’ po o le ‘E mafai ona e tuuina mai se faataitaiga o le mea lena e te fai mai ai?’” (O Le Aoao Atu, E Leai Se Isi Valaauga E Sili Ai [1999], 67).
Valaaulia e faatino
O le alii talavou o loo taitai e faaiuina le fonotaga. E mafai ona ia: