Sau, Mulimuli Mai ia te A’u
E mafai faapefea ona ou auai i le faanatinatiina o le galuega a le Alii?

E mafai faapefea ona ou auai i le faanatinatiina o le galuega a le Alii?

Ua tatou ola i aso e gata ai, ua faataunuu ai e le Alii Ana folafolaga: “Faauta, o le a Ou faanatinatiina la’u galuega i lona taimi” (MF&F 88:73). Ua i ai se matafaioi taua a e umia le perisitua i lenei galuega. E mafai ona tatou auai e ala i le valaau atu i tagata uma ia o mai ia Keriso e ala i le faasoaina atu o le talalelei, tuuina atu o le auaunaga faaKeriso, faataunuuina ma le agavaa o sauniga faaleperisitua, faamalosia o tagata fou, laveaiina o e ua le toaaga mai, ma faia sauniga faaola mo e ua maliliu.

Saunia oe lava ia faaleagaga

O a ni mau ma isi punaoa o le a uunaia ia alii talavou ina ia auai i le faanatinatiina o le galuega a le Alii?

Isaia 11:9; 1 Nifae 13:37; 14:14 (Valoaga e uiga i le galuega a le Alii)

Mosaea 28:1–3 (Ua mananao atalii o Mosaea e talai le talalelei)

Mose 1:39 (Ua faamalamalama mai e le Atua Lana galuega)

MF&F 20:46–60 (Tiute o e umia le Perisitua Arona)

MF&F 138:56 (O fanau faamaoni a le Atua na saunia i le muai olaga ina ia galulue i le tovine a le Alii)

Thomas S. Monson, “Naunau ma Agavaa e Auauna atu,” Ensign po o le Liahona, Me 2012, 66–69

Dieter F. Uchtdorf, “O E Moe i Lenei Taimi o le Toefuataiga?” ” Ensign po o le Liahona, Me 2014, 58-62

S. Gifford Nielsen, “Faanatinatiina o le Fuafuaga o le Taaloga a le Alii,” Ensign po o le Liahona, Nov. 2013, 33–35

Aoao atu i le ala a le Faaola

Na fai atu e le Faaola fesili na uunaia ai Ona soo e mafaufau ma faalogo lelei. Na latou iloa e alofa o Ia ia te i latou, ma na latou lagonaina le saogalemu e faasoa atu o latou manatu ma lagona patino. A o e faalogo ma le alofa ma faaali atu le naunau i tali ma manatu o uso o le korama, o le a e fesoasoani ia i latou e lagonaina le alofa o le Faaola.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu, pe mafaufau i ni ou lava manatu, e iloilo ai le lesona o le vaiaso ua tea ma faalauiloa atu le lesona o lenei vaiaso:

  • Valaaulia alii talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea na latou aoaoina i le lesona o le vaiaso ua tea.

  • Tusi i luga o le laupapa O le a le galuega a le Alii? Valaaulia tagata o le vasega e o mai e tusi a latou tali o lenei fesili i le laupapa. Uunaia i latou e faaopoopo i lenei lisi ao latou aoao nisi mea i le aluga o lenei lesona.

Aoao faatasi

O gaoioiga taitasi nei o le a fesoasoani i alii talavou ia iloa le auala e mafai ai ona latou auai ao faanatinatiina e le Alii Lana galuega. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

  • Tusi le upu faanatinati i le laupapa, ma fai atu i se tasi e faitau le Mataupu Faavae ma Feagaiga 88:73. Fai atu i le korama e talanoaina po o le a le uiga o le faanatinatiina o se mea (afai e manaomia, e mafai ona latou sueina le upu i se lolomifefiloi). Fesili atu i alii talavou pe aisea latou te manatu ai e manaomia ona faanatinatiina le galuega a le Alii i o tatou aso. Fai atu ia i latou e saili mo tali i le fesili lenei i mau o loo fautuaina mai i le otootoga lenei po o nisi mau e mafai ona latou mafaufau i ai.

  • I ni nai aso o i luma, fai atu i alii talavou e asiasi i le vaega o le Faanatinatiina o le Galuega o le Faaolataga i le LDS.org ma iloilo nisi o punaoa iina. Valaaulia i latou e o mai saunia i le fonotaga a le korama e faasoa mai se mea mai le saite lea na musuiaina i latou ia auai atili atoatoa i le galuega a le Alii.

  • Valaaulia alii talavou e iloilo se tasi o lauga o le konafesi o i le otootoga lenei, vaavaai mo ni faamatalaga lea na musuiaina i latou ia auai atili atoatoa i le galuega a le Alii. Fai atu ia i latou e faasoa mai faamatalaga na ma faamatala mai pe aisea latou te iloa ai e musuiaina.

  • I le avea ai ma se korama, faitau le faamatalaga o le fuafuaga o le taaloga a Elder S. Gifford Nielsen i lana lauga “Faanatinatiina o le Fuafuaga o le Taaloga a le Alii.” Valaaulia le peresitene o le korama e taitaiina se talanoaga e uiga i se “fuafuaga o le taaloga” mo le korama ina ia auai atili atoatoa ai i nisi o vaega o le galuega a le Alii, e pei o le faasoaina atu o le talalelei, laveaiina o se uso o le korama, po o le faia o galuega o le malumalu ma le talafaasolopito o aiga.

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga? O latou malamalama i le auala e mafai ai ona latou auai i le faanatinatiina o le galuega a le Alii? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

O le alii talavou o loo taitai e faaiuina le fonotaga. E mafai ona ia:

  • Faasoa atu i le korama o le faia o le galuega a le Alii o le a faamalosia ai lana molimau ma le mea na uunaia o ia e faia o se taunuuga o lenei lesona.

  • Valaaulia uso o le korama e filifili se mea faapitoa o le a latou faia—faatasi o se korama ma taitoatasi—e faanatinati ai le galuega a le Alii.