Te u kau fēfē ʻi he fakavaveʻi ʻo e ngāue ʻa e ʻEikí?

ʻOku tau moʻui ʻi he ngaahi ʻaho fakaʻosí, ʻi he taimi ʻoku fakahoko ai ʻe he ʻEikí ʻa ʻEne talaʻofá: “Vakai, te u fakavavevaveʻi ʻa ʻeku ngāué ʻi hono taimí” (T&F 88:73). ʻOku fakahoko ʻe he kau maʻu Lakanga Taulaʻeiki Faka-ʻĒloné ha fatongia mahuʻinga ʻi he ngāué ni. Te tau lava ʻo kau ʻaki hano fakaafeʻi ʻo e kakai kotoa pē ke nau haʻu kia Kalaisi ʻaki hano vahevahe ʻo e ongoongoleleí, fai ha tokoni anga faka-Kalaisi, fakahoko ʻi he moʻui taau ʻa e ngaahi ouau ʻo e lakanga fakataulaʻeikí, fakamālohia ʻa e kau mēmipa foʻoú, fakahaofi ʻa e kau māmālohí, mo fakahoko ʻa e ngaahi ouau fakamoʻuí maʻá e kau pekiá.

Teuteuʻi fakalaumālie koe

Ko e hā ha ngaahi potufolofola mo ha ngaahi maʻuʻanga tokoni kehe te nau ueʻi fakalaumālie ʻa e kau talavoú ke nau kau ʻi he fakavavevaveʻi ʻo e ngāue ʻa e ʻEikí?

ʻIsaia 11:9; 1 Nīfai 13:37; 14:14 (Ko e ngaahi kikite kau ki he ngāue ʻa e ʻEikí)

Mosaia 28:1–3 (ʻOku holi ʻa e ngaahi foha ʻo Mosaiá ke malanga ʻaki ʻa e ongoongoleleí)

Mōsese 1:39 (ʻOku fakamatalaʻi ʻe he ʻOtuá ʻa ʻEne ngāué)

T&F 20:46–60 (Ngaahi fatongia ʻo e kau maʻu Lakanga Taulaʻeiki Faka-ʻĒloné)

T&F 138:56 (Naʻe mateuteu ʻa e fānau faivelenga ʻa e ʻOtuá ʻi he maama fakalaumālié ke ngāue ʻi he ngoue vaine ʻa e ʻEikí)

Thomas S. Monson, “Loto Vēkeveke Pea Taau ke Ngāue,” Ensign pe Liahona, Mē 2012, 66–69

Dieter F. Uchtdorf, “‘Okú ke Mohe Nai Lolotonga Hono Fakafoki Mai ʻo e Ongoongoleleí?” Ensign pe Liahona, Mē 2014, 58–62

S. Gifford Nielsen, “Ko Hono Fakavaveʻi e Palani Vaʻinga ʻa e ʻEikí,” Ensign pe Liahona, Nōvema 2013, 33–35

Ko e faiako ‘i he founga ‘a e Fakamo‘uí

Naʻe fai ‘e he Fakamoʻuí ‘a e ngaahi fehuʻi naʻá ne ueʻi Hono kau muimuí ke nau fakakaukau mo ongoʻi moʻoni. Naʻa nau ‘iloʻi naʻá Ne ‘ofa ‘iate kinautolu, pea naʻa nau ongoʻi fiemālie ke fakamatalaʻi ‘enau ngaahi fakakaukaú mo ‘enau ngaahi ongo fakatāutahá. Kapau te ke fakafanongo fakamātoato mo fakahā hoʻo mahuʻingaʻia ‘i he ngaahi tali mo e ngaahi ‘ilo ‘a e kau mēmipa ʻo e kōlomú, te ke tokoniʻi kinautolu ke nau ongoʻi ‘a e ‘ofa ‘a e Fakamoʻuí.

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú (pe ko ha ʻasisiteni ki he pīsopé ʻi he kōlomu ʻo e kau taulaʻeikí). Te ne tataki e kau talavoú ʻi hono aleaʻi fakataha e ngaahi meʻa ʻa e kōlomú, akoʻi kinautolu ki honau ngaahi fatongia fakataulaʻeikí (mei he folofolá mo e tohi Fatongia ki he ʻOtuá), poupouʻi kinautolu ke vahevahe ʻenau ngaahi aʻusia ʻi hono fakahoko honau fatongia ki he ʻOtuá, pea fakaafeʻi ha ʻetivaisa pe mēmipa kehe ʻo e kōlomú ke akoʻi ha lēsoni ʻi he ongoongoleleí. ʻE lava ke ne teuteu ʻaki haʻane fakafonu ha ʻasenita ʻo e fakataha ʻa e kōlomú he lolotonga e fakataha fakapalesitenisī.

Kamata ʻa e akó

Filifili mei he ngaahi fakakaukau ko ʻení, pe ko haʻo fakakaukau pē ʻaʻau, ke fakamanatu ʻaki e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

Fakaafeʻi e kau talavoú ke nau vahevahe, akoʻi, mo fakamoʻoni ki he ngaahi aʻusia ne nau maʻu ʻi hono fakaʻaongaʻi ʻo e meʻa ne nau ako ʻi he lēsoni ʻo e uike kimuʻá.
Hiki he palakipoé Ko e hā ʻa e ngāue ʻa e ʻEikí? Fakaafeʻi e kau mēmipa ʻo e kōlomú ke nau ō mai ki he palakipoé ʻo hiki ha ngaahi tali ki he fehuʻi ko ʻení. Poupouʻi kinautolu ke nau tānaki atu ki he lisi ko ʻení ʻi heʻenau ako lahi ange he lolotonga e lēsoni ko ʻení.

Ako fakataha

ʻE tokoni ʻa e ngaahi ʻekitivitī takitaha ʻi laló ke ʻilo ʻe he kau talavoú ʻa e founga te nau lava ai ʻo kau ʻi he fakavaveʻi ʻe he ʻEikí ʻa ʻEne ngāué. Muimui ʻi he ue’i ‘a e Laumālié, pea fili ha ʻekitivitī ʻe taha pe lahi ange ʻe ‘aonga taha ki hoʻo kalasí:

Tohiʻi e foʻi lea ko e fakavaveʻi ʻi he palakipoé, pea kole ki ha taha ke ne lau ʻa e Tokāteline mo e Ngaahi Fuakava 88:73. Fakaafeʻi ʻa e kōlomú ke nau aleaʻi ʻa e ʻuhinga ʻo e fakavaveʻi ha faʻahinga meʻa (kapau ʻoku fie maʻu, te nau lava ke kumi ʻa e foʻi leá ʻi ha tikisinali). ʻEke ki he kau talavoú pe ko e hā ʻoku nau pehē ai ʻoku fie maʻu e ngāue ʻa e ʻEikí ke fakavaveʻi ʻi hotau kuongá. Fakaafeʻi kinautolu ke nau kumi e tali ki he fehuʻi ko ʻení ʻi he ngaahi potufolofola ʻoku ʻoatu ʻi he fokotuʻutuʻu ko ʻení pe ʻi ha ngaahi potufolofola kehe ʻoku nau lava ʻo fakakaukau ki ai.
Kole ki he kau talavoú ʻi ha ngaahi ʻaho siʻi ki muʻa ʻa e kau talavoú ke nau vakai ki he konga Ko Hono Fakavaveʻi e Ngāue ʻo e Fakamoʻuí ʻi he LDS.org ʻo toe vakaiʻi ha niʻihi ʻo e ngaahi maʻuʻanga tokoni aí. Fakaafeʻi kinautolu ke nau omi mateuteu ki he fakataha fakakōlomú ke vahevahe ha meʻa mei he uepisaití kuó ne ueʻi fakalaumālie kinautolu ke nau kau kakato ange ʻi he ngāue ʻa e ʻEikí.
Fakaafeʻi ʻa e kau talavoú ke nau toe vakaiʻi ha taha ʻo e ngaahi lea ʻo e konifelenisí ʻi he fokotuʻutuʻu ko ʻení, ʻo kumi ʻa e ngaahi fakamatala ʻoku nau ueʻi kinautolu ke nau kau kakato ange ʻi he ngāue ʻa e ʻEikí. Kole ange ke nau vahevahe ʻa e ngaahi lea ko iá pea fakamatalaʻi ʻa e ʻuhinga ʻoku nau pehē ai ʻoku fakalaumālié.
Lau mo hoʻomou kōlomú ʻa e fakamatala ʻa ʻEletā S. Kīfooti Nilasoni ʻo e ngaahi palani vaʻinga ʻi heʻene lea “Ko Hono Fakavaveʻi e Palani Vaʻinga ʻa e ʻEikí.” Fakaafeʻi e palesiteni ʻo e kōlomú ke ne tataki ha fealēleaʻaki fekauʻaki mo ha “palani vaʻinga” ke kau kakato ange ai ʻa e kōlomú ʻi ha tafaʻaki ʻo e ngāue ʻa e ʻEikí, hangē ko hono vahevahe ʻo e ongoongoleleí, fakahaofi ʻo ha mēmipa ʻo e kōlomú, pe fakahoko ʻo e ngāue fakatemipalé mo e ngāue ki he hisitōlia fakafāmilí.

Kole ki he kau talavoú ke nau vahevahe ʻa e meʻa ne nau ako he ʻaho ní. Ko e hā haʻanau ngaahi ongo pe fakakaukau? ʻOku mahino nai kiate kinautolu ʻa e founga te nau lava ai ʻo kau ʻi he fakvaveʻi ʻo e ngāue ʻa e ʻEikí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ki he tefito ko ‘ení?

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. Te ne lava ke:

Vahevahe mo e kōlomú ʻa e founga kuo fakamālohia ai ʻene fakamoʻoní ʻi hono fakahoko ʻo e ngāue ʻa e ʻEikí mo e meʻa naʻá ne ongoʻi ke fai ko e tupu mei he lēsoni ko ʻení.
Fakaafeʻi e kau mēmipa ʻo e kōlomú ke nau fili ha meʻa pau te nau fai—fakakōlomu mo e fakafoʻituitui—ke fakavaveʻi ai ʻa e ngāue ʻa e ʻEikí.