Ko e hā ʻoku mahuʻinga ai ke faitotonú?

ʻOku ʻuhinga ʻa e faitotonú ki he fili ke ʻoua ʻe loi, kaihaʻa, kākā pe fakakeheʻi ʻi ha faʻahinga founga pē. ʻI heʻetau faitotonú, ʻoku tau fakatupulaki ai ha mālohi te ne ʻai ke tau tokoni lahi ki he ʻOtuá pea mo e niʻihi kehé. ʻOku tāpuekina ʻaki kitautolu ʻa e nonga ʻo e fakakaukaú mo e fakaʻapaʻapaʻi kitá pea ʻe falalaʻiaʻi ʻe he ʻEikí mo e niʻihi kehé.

Teuteuʻi fakalaumālie koe

Ako ʻi he faʻa lotu ʻa e ngaahi folofola ko ʻení mo e ngaahi maʻuʻanga tokoni kehé, fili e taha ʻoku kaunga lelei taha ki he kau talavoú ke akoʻi kinautolu kau ki he faitotonú.

Saame 101:7; Lea Fakatātā 12:22; 2 Kolinitō 4:2; ʻEfesō 4:29; ʻAlamā 27:27; Ko e Ngaahi Tefito ʻo e Tuí 1:13 (Faitotonu pea tuʻu maʻu ʻi he meʻa kotoa pē)

Ngāue 5:1–10 (He ʻikai ke tau lava ʻo loi ki he ʻEikí)

2 Nīfai 9:34; ʻAlamā 12:1–6 (Ko e taʻe faitotonú ko ha angahala ʻoku ʻi ai hono ngaahi nunuʻa mamafa)

Siosefa Sāmita—Hisitōlia 1:21–25 (Ko e faitotonu ʻa Siosefa Sāmita ʻi he uhouhonga ʻo e fakatangá)

Thomas S. Monson, “ʻOku ʻOmai ʻe he Teuteú ʻa e Ngaahi Tāpuakí,” Ensign pe Liahona, Mē 2010, 64–67

Robert C. Gay, “Ko e Hā ʻe Foaki ʻe ha Tangata ke Fetongiʻaki Hono Laumālié?” Ensign pe Liahona, Nōvema 2012, 34–36

Richard C. Edgley, “Three Towels and a 25-Cent Newspaper,” Ensign pe Liahona, Nov. 2006, 72–74

“Faitotonú mo e Angatonú,” Ki Hono Fakamālohia ʻo e Toʻu Tupú (2011), 19

“Faitotonú,” Tuʻu Maʻu ʻi he Tuí (2004), 16

Vitiō: “Faitotonú: Tui Leva Ki ai”

Tuku ke taki e kau talavoú

ʻE hanga ʻe ha mēmipa ʻo e kau palesitenisī ʻi he kōlomú (pe ko ha ʻasisiteni ki he pīsopé ʻi he kōlomu ʻa e kau taulaʻeikí) ʻo tataki e fakataha fakakōlomú. ʻOkú ne tataki e kau talavoú ʻi he fealeaʻaki fakataha kau ki he ngaahi meʻa ʻa e kōlomú, akoʻi kinautolu ki honau ngaahi fatongia fakataulaʻeikí (mei he folofolá mo e tohi Fatongia ki he ʻOtuá), fakalotolahiʻi kinautolu ke vahevahe ʻenau ngaahi aʻusia ʻi hono fakahoko honau fatongia ki he ʻOtuá, pea fakaafeʻi ha ʻetivaisa pe mēmipa kehe ʻo e kōlomú ke akoʻi ha lēsoni ʻo e ongoongoleleí. Te ne lava ʻo teuteu ʻaki hano fakafonu ha ʻasenita ʻo e fakataha fakakōlomú lolotonga ha fakataha ʻa e kau palesitenisií.

Kamata ʻa e akó

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

Fakaafeʻi ʻa e kau talavoú ke nau vahevahe ha aʻusia ne nau maʻu ʻoku fekauʻaki mo e lēsoni ʻo e uike kuoʻosí.
ʻAi e kau talavoú ke tohi ʻi ha laʻi pepa (ʻikai ʻilo ki ai ha taha) ha ngaahi tūkunga kehekehe ne ʻahiʻahiʻi ai ke nau taʻe faitotonu (te nau ala vakai ki he tuʻunga moʻui ʻi he Ki Hono Fakamālohia ʻo e Toʻu Tupú ki ha ngaahi fakakaukau). Tānaki ʻenau ngaahi laʻi pepá pea vahevahe ha niʻihi ʻo e ngaahi tūkunga mo e kōlomú. Ko e hā e meʻa ne nau mei fai ʻi he ngaahi tūkunga pehení? Ko e hā e ngaahi ola ki he faitotonú pe taʻe faitotonú?

Ako fakataha

ʻE tokoni ʻa e ʻekitivitī takitaha ʻi laló ki he kau mēmipa ʻo e kōlomú ke mahino e ʻuhinga ʻoku mahuʻinga ai ke faitotonú. Muimui ʻi he ueʻi ʻa e Laumālié ʻo fili ha taha pe toe lahi ange ʻe ngāue lelei taha ki hoʻo kōlomú:

Fakaafeʻi ʻa e kau talavoú ke mamataʻi e “Faitotonú: Tui Leva Ki ai” pe lau e talanoa kau ki hono fakatau ʻo e ngaahi tikite heleʻuhilá ʻi he lea ʻa ʻEletā Lōpeti C. Keí “Ko e hā ʻe Foaki ʻe ha Tangata ke Fetongiʻaki Hono Laumālié?” Kole ange ke nau hiki e ngaahi founga te nau lava ʻo teuteu ai he taimí ni ke ikunaʻi ʻa e ʻahiʻahi ke taʻe faitotonú kimuʻa pea toe kovi ange e tūkungá. Fakaafeʻi ke nau vahevahe ʻenau ngaahi fakakaukaú mo e toenga ʻo e kōlomú.
Lau ko ha kōlomu e “Faitotonú mo e Angatonú” ʻi he Ki Hono Fakamālohia ʻo e Toʻu Tupú. Kole ki he kau talavoú ke fakahaaʻi mai e ngaahi tāpuaki ʻo e faitotonú pea lisi kinautolu ʻi he palakipoé. ʻOku uesia fēfē ʻe he faitotonú ʻenau malava ke fai lelei maʻá e niʻihi kehé mo e ʻEikí? Ko e hā ʻoku mahuʻinga ai ʻa e faitotonú kiate kinautolu ko ha maʻu lakanga fakataulaʻeiki, ko ha foha, tokoua, kaungāmeʻa, taki pe ha tokotaha ngāue?
Lau e Siosefa Sāmita—Hisitōlia 1:21–25 ko ha kōlomu pea fehuʻi ki he kau talavoú pe ko e hā e meʻa ne nau ako kau ki he faitotonú mei he talanoa ko ʻení. ʻOku tāpuekina fēfē kinautolu tuʻunga he fai pau ʻa Siosefa ki he meʻa naʻá ne aʻusiá pea mo e meʻa ne kole ange ʻe he Tamai Hēvaní mo Sīsū Kalaisi kiate iá? Ko fē nai e taimi ne fie maʻu ai ke lototoʻa ʻa e kau talavoú ke nau faitotonu? Naʻe tāpuekina fēfē kinautolu ʻi heʻenau faitotonú?
Tā ha foʻi laine vetikale he vaeuaʻanga ʻo e palakipoé. Tohi ʻi he tafaʻaki ʻe taha, “Kapau te u faitotonu …” pea tohi ʻi he tafaʻaki ʻe tahá, “Kapau te u taʻe faitotonu …” Kole ki he kau talavoú ke nau fekumi ki he ngaahi founga ke fakakakato e ngaahi sētesí ʻi heʻenau lau e konga ʻoku fakataumuʻa ko e “Faitotonú” ʻi he Tuʻu Maʻu ʻi he Tuí pea mo e talanoa kau ki he tokotaha ako taʻe faitotonu ʻi he lea ʻa Palesiteni Tōmasi S. Monisoní “ʻOku ʻOmai ʻe he Teuteú ʻa e Ngaahi Tāpuakí.” Ko e hā ha ngaahi fakakaukau kehe te ke lava ʻo tānaki ki ai? Fakaafeʻi e kau talavoú ke nau vahevahe e founga ʻoku nau mamata ai ʻi he ngaahi meʻa ko ʻení ʻi heʻenau moʻuí. Kole ki he kōlomú ke nau vahevahe ha ngaahi founga ʻoku faʻa kumi ʻuhinga ai ha kakai ki heʻenau taʻe faitotonú. Te nau fakamatalaʻi fēfē ki he niʻihi kehé e ngaahi ʻuhinga ʻenau faitotonú?
Vahe ki he talavou takitaha ha taha ʻo e ngaahi potufolofola mei he lēsoni ko ʻení. Kole ki he talavou takitaha ke ne hiki ha foʻi lea ʻe taha ki he fā ʻokú ne fakafofongaʻi e meʻa ʻoku akoʻi ʻe he potufolofolá kau ki he faitotonú. Fakaafeʻi ʻa e kau talavoú ke nau vahevahe e meʻa kuo nau hikí pea fakahaaʻi ʻenau ngaahi ongó mo e aʻusia kau ki he faitotonú.

Kole ki he kau talavoú ke nau vahevahe e meʻa ne nau ako he ʻaho ní. ʻOku mahino nai kiate kinautolu e mahuʻinga ʻo e faitotonú? Ko e hā ʻa e ngaahi ongo pe ngaahi fakakaukau ʻoku nau maʻú? ʻOku ʻi ai haʻanau toe ngaahi fehuʻi kehe? ʻE ʻaonga ke fakamoleki ha toe taimi ʻi he tokāteline ko ʻení?

Fakaafeʻi ke ngāue

ʻOku fakaʻosi ʻa e fakatahá ʻe he talavou ʻoku tatakí. Te ne lava ʻo:

Vahevahe ʻene fakamoʻoni ki he meʻa naʻá ne ako he ʻahó ni mei he lēsoní.
Fakatukupaaʻi ʻa e talavou kotoa ke faitotonu ʻi he meʻa kotoa pē.