E faapefea e mea ou te tautala ai ona aafia ai au ma i latou o loo siomia au?

O le auala tatou te tautatala ai e atagia ai lo tatou malamalama i ituaiga tagata e i ai i tatou o ni fanau a le Atua. O la tatou gagana e mafai, a lē o le siitia ma faamalosiauina ai isi, pe e mafai foi ona faamanualia ma faatiga ai i isi. A tatou faaaogaina gagana faagaeetia, tatou te valaaulia le Agaga Paia e faatasi ma i tatou.

Saunia oe lava ia faaleagaga

E faapefa ona atagia i le gagana e te faaaogaina ia lou malamalamaaga po o ai oe? Na faapefea ona e faaaogaina ni upu e musuia ai, aoao atu ai, faamafanafana ai, ma talanoa ai? O le a se suiga o tulaga faatonuina a le lalolagi e uiga i gagana talafeagai i le aluga o lou olaga?

Pe o le gagana o loo faaaoga e alii talavou e faagaeetia ma faamalosiau, pe e faatiga ma faamanualia ai isi? E mafai faapefea ona uunaia e alii talavou ia isi o loo siomia i latou e faaaoga le gagana e valaaulia ai le Agaga?

O a ni mau ma tautalaga o le a fesoasoani i alii talavou ia lagona ai le taua o upu latou te faaaogaina e talanoa ai i isi?

Faataoto 15:1–4; 16:24; 1 Timoteo 4:12; Iakopo 3:2–10; Alema 31:5; MF&F 108:7 (O a tatou upu e mafai ona i ai se aafiaga malosi i isi)

Mataio 12:36; 15:11; Efeso 4:29–32; Mosaea 4:30 (E tatau ona tatou faaeteete i upu tatou te faaaogaina)

Jean B. Bingham, “O Le A Ou Aumaia le Malamalama o le Talalelei i totonu o Lo'u Aiga,” Ensign po o le Liahona, Nov. 2016, 6–9

Jeffrey R. Holland, “O Gagana a Agelu,” Ensign po o le Liahona, Me 2007, 16–18

W. Craig Zwick, “O Le A Sou Manatu?” Ensign po o le Liahona,Me 2014

“Gagana,” Mo Le Malosi o le Autalavou (2011), 20–21

“Gagana Masoā,” Faamaoni i le Faatuatua (2004), 75

Vitio: “Kalapu a le Au Le Palauvavale”; “Fia Malosi—Ia Taofia”

4:57

10:13

Aoao atu i le ala a le Faaola

I soo se tulaga lava, o le Faaola o loo avea ma se faataitaiga ma se faiaoga. Sa Ia aoaoina Ona soo i le tatalo e ala i le tatalo faatasi ma i latou. Sa Ia aoaoina i latou e alolofa atu ma auauna atu e ala i le auala sa Ia alofa atu ai ma auauna atu ai. Na Ia aoaoina i latou pe faapefea ona aoao atu Lana talalelei i le ala na Ia aoao atu ai. A o e saunia e aoao atu, mafaufau i auala na fetalai ai le Alii ma auala e mafai ona tatou talanoa atu ai i se auala e siitia ma uunaia ai isi ma valaaulia ai le mafutaga a le Agaga Paia.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama.Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei.E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia ni alii talavou e faasoa atu se mea na faagaeetia ai i latou e uiga i le lesona o le vaiaso talu ai.
Tusi ia fasifuaitau nei i luga o le laupapa: Upu tatou te faitau i ai.Upu tatou te faalogo i ai. Upu tatou te tusia. Upu tatou te tautatala ai. Fai atu i alii talavou e faitau le Efeso 4:29–32 ma faamatala pe faapefea ona faatatau lenei fuaitau i fasifuaitau e fa o loo i luga o le laupapa. Fai atu i alii talavou e mafaufau loloto i fesili nei: O a ni ou lagona e uiga i le ituaiga gagana e te faitau, faalogo, ma faaaogaina? E faapefea ona valaaulia pe faalotovaivai e upu le taitaiga mai le Agaga Paia?

Aoao faatasi

O gaoioiga taitasi o loo i lalo o le a fesoasoani i alii talavou ia malamalama i le taua o le faaaogaina o gagana lelei. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Fai atu i le afa o le korama e faitau le tala o le paopao i le saunoaga a Sister Jean B. Bingham “O Le A Ou Aumaia le Malamalama o le Talalelei i totonu o Lou Aiga.” Fai atu i le isi afa o le korama e faitau le tala o le alii talavou lea na ulagia a o talavou. Ona tuu atu lea i vaega taitasi e aoao le tasi ma le isi i mea na latou aoaoina mai i a latou tala e uiga i aafiaga o a tatou upu i isi. Valaaulia alii talavou e mafaufau i se tasi latou te faamemelo i ai ma fai se fuafuaga e faaali atu la latou faamemelo i lena tagata.
Tusi i luga o le laupapa le “Afai e mafai e se tagata ona pulea lona laulaufaiva, e mafai ona ia pulea ________.”Fai atu i alii talavou e sue le Iakopo 3:2–10 ma faatumu le avanoa. Ia tofi alii talavou taitasi e faitau se faaupuga faafaatusa o loo faaaogaina i le Iakopo (faagutu solofanua, fuaiupu e 2–3; vaa, fuaiupu e 4; afi e mu ai vao laau e tele, fuaiupu e 5–6; faupuega o amio leaga, fuaiupu e 7–8; puna vai mama, fuaiupu e 10–11). Valaaulia alii talavou e sauni e aoao atu le korama atoa i le mea ua aoao mai e a latou tala faafaatusa e uiga i le pulea o a latou faamatalaga. Fai atu ia i latou e faasoa atu mea e mafai ona latou faia e pulea ai a latou faamatalaga.
I nai aso e muamua atu, fai atu i alii talavou e aumai i le fonotaga a le korama a latou upusii musuia e sili ona fiafia i ai. Fai atu i alii talavou taitoatasi e faasoa atu lana upusii ma faamatala le aafiaga ua faia ai i lona olaga. Fai atu i le korama e sue ni faataitaiga i tusitusiga paia ua faaalia ai aafiaga malolosi ma lelei e mafai ona faia e a tatou upu i isi (mo se faataitaiga, Taitaiau Moronae ma le tagavai o le saolotoga [tagai Alema 46:11–22], o le Faaola ma le fafine sa molia i le mulilua [tagai Ioane 8:1–11], po o Apinati ma Alema [tagai Alema 5:9–12]). O a mea e aoao mai e nei faataitaiga i alii talavou e faatatau i le aafia o isi i le malosi o a latou upu?
Tuu atu i alii talavou taitoatasi se vaega o le lauga a Elder Jeffrey R. Holland “O Gagana a Agelu,” ma fai atu ia te ia e faamamafa le savali autu mai lena vaega (aua le tuuina atu i alii talavou le autu o le lauga). Tuu atu i alii talavou taitasi e lisi i luga o le laupapa le mea sa ia faamamafaina ma faamatala pe aisea. Fai atu i tagata o le korama e fautua atu ni autu fuafuaina mo le lauga e faavae i savali autu sa latou faailoaina mai. Fai atu i ni nai alii talavou e faasoa atu se taimi sa latou faia ai se faamatalaga sa faagaeetia ai se tasi tagata pe o se taimi foi na faagaeetia ai e se tasi i latou.
Faaali se tasi o ata vitio o loo i le otootoga lenei, ma fai atu i alii talavou e faasoa mai ni mea sa latou aoaoina mai le ata vitio. Valaaulia i latou e mafaufau loloto i mea e mafai ona latou faia e faatosinaina ai isi ina ia fesootai i auala e valaaulia ai le Agaga o le Alii. Mo se faataitaiga, e faapefea ona latou fesoasoani i se uo o loo i ai se vaisu o le faaaogaina o gagana lē lelei? Pe e faapefea ona latou faaaogaina fesootaiga faaeletonika e siitia ai ma faamalosiau atu i isi? Valaaulia i latou e vaavaai mo ni tali ao latou faitauina le “Gagana” i le Mo le Malosi o le Autalavou. Fai atu ia i latou e faasoa mai ni o latou manatu.
Valaaulia ia alii talavou e faitau le 1 Nifae 5:1–7 ma faasoa mai mea sa latou aoaoina mai faataitaiga a Sarai ma Liae e faatatau i le aafia o i tatou lava ma isi i a tatou upu. Fai atu ia i latou e faitau mai ni faamatalaga a Elder W. Craig Zwick e faatatau i lenei tala i lana lauga “O Le a Sou Manatu?” O a nisi malamalamaaga na maua e alii talavou mai lenei lauga? Uunaia i latou e faasoa mai ni auala e mafai ai ona latou mulimuli i le faataitaiga a Liae ia latou fesootaiga ma tagata o le aiga faapea ma isi.

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o le faaaogaina o gagana mama, ma musuia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu lana molimau e uiga i le faaaogaina o gagana talafeagai e mafai ona siitia ma uunaia ai isi ma valaaulia ai le mafutaga a le Agaga Paia.
Ia faatautino alii talavou ia faaaoga gagana e atagia ai lo latou valaauga paia o e o loo umia le Perisitua Arona.