O a ni matafaioi a le Agaga Paia?

E molimau le Agaga Paia i le upumoni. O Ia o le puna o se molimau patino ma faaaliga. E mafai ona ia taialaina i tatou i a tatou filifliga ma puipuia i tatou mai le matautia faaletino ma faaleagaga. O Ia o Le Faamafanafana, ma Na te faatoafilemuina o tatou popolega ma faatumulia i tatou i le faamoemoe. O Lona mana, ua faamamaina ai i tatou pe a tatou salamo, maua sauniga faaola, ma tausia a tatou feagaiga. Ina ia tatou auauna atu ma le faamaoni o e umia le perisitua, e taua lo tatou faalagolago atu e faalogo ma mulimuli i musumusuga a le Agaga Paia.

Saunia oe lava ia faaleagaga

O a ni aafiaga patino e mafai ona e faasoa atu i alii talavou o le a mafai ai ona aoaoina i latou e uiga i matafaioi a le Agaga Paia?

Aisea e taua ai mo alii talavou le aoao ia iloa ma mulimuli i musumusuga a le Agaga? E mafai faapefea ona e fesoasoani ia i latou ina ia agavaa mo Lana mafutaga ma sailia?

Ao e suesue i nei mau ma isi punaoa e uiga i le Agaga Paia, saili mo Lana taitaiga ia iloa ai po o le a se mea e aoao atu i alii talavou e uiga i le taua o le Agaga Paia

Ioane 14:26–27 (E aoao mai i tatou e Le Faamafanafana ma aumaia mea uma i lo tatou manatua)

Ioane 15:26; MF&F 42:17; Mose 1:24 (O le Agaga Paia e molimau e uiga i le Tama ma le Atalii)

Kalatia 5:22–23 (Faamatalaina e Paulo le fua o le Agaga)

2 Nifae 32:5 (O le a faaali mai e le Agaga Paia ia i tatou mea e ao ona tatou faia)

3 Nifae 27:20 (O le taliaina o le Agaga Paia e faapaiaina ai i tatou)

Moronae 8:26 (O le a faatumuina i tatou e le Agaga Paia i le faamoemoe ma le alofa)

Moronae 10:5 (Ua aoaoina i tatou e le Agaga Paia i le upumoni)

Gary E. Stevenson, “E Faapefea ona Fesoasoani le Agaga Paia ia te Oe?” Ensign po o le Liahona, Me 2017, 117–20

Henry B. Eyring, “Ou Te Tuuina Atu Ia Te Outou Le Manuia,” Ensign po o le Liahona, Me 2017, 15–18

Juan A. Uceda, “Ua Aoao Mai i Tatou e le Alii o Iesu Keriso ina ia Tatalo,” Ensign po o le Liahona, Nov. 2016, 30–32

Robert D. Hales, “O Le Agaga Paia,” Ensign po o le Liahona, Me 2016, 105–7

Vitio: “Leo o le Agaga”, “Teritori a le Fili”

3:54

3:38

Aoao atu i le ala a le Faaola

Na faasoa atu e le Faaola ni tala faigofie, faataoto, ma ni faataitaiga moni o le olaga e aoao atu ai i se auala na malamalama lelei ai Ona soo. O le a se aafiaga patino e mafai ona e faasoa atu i alii talavou e fesoasoani atu ai ia i latou ia malamalama i matafaioi a le Agaga Paia ma lagona se naunautaiga e sailia ma ia agavaa ai mo ia ituaiga aafiaga?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e toe iloilo ai le lesona o le vaiaso ua tea ma faalauiloa atu le lesona o lenei vaiaso:

Tuu atu i alii talavou se taimi e mafaufau ai ma faasoa atu se mea se tasi latou te manatuaina mai le lesona o le vaiaso ua tea. Mafaufau pe faapefea ona e faafesootaia a latou tali i le lesona o lenei aso.
Valaaulia ia alii talavou e tusi se mea e uiga i se taimi na latou lagonaina ai le uunaiga a le Agaga Paia. O le a se mea na latou faia e talia ai Lana uunaiga?O le a se eseesega na faia e Lana uunaiga? Afai e talafeagai, tuu atu i nisi o i latou e faasoa mai ni o latou aafiaga.

Aoao faatasi

O gaoioiga taitasi nei o le a fesoasoani i tagata o le korama ina ia malamalama i matafaioi a le Agaga Paia. I le mulimuli ai i musumusuga a le Agaga, filifili se gaoioiga se tasi po o le sili atu foi o le a sili ona aoga mo lau korama:

Tusi le fesili lenei i luga o le laupapa: Aisea tatou te manaomia ai le Agaga Paia? E faapefea ona fesoasoani le Agaga Paia ia i tatou? Valaaulia ia tamaitai talavou e saili i le saunoaga a Elder Gary E. Stevenson “E Faapefea ona Fesoasoani le Agaga Paia ia te Oe?” pe matamata i le vitio “Voice of the Spirit,” e vaavaai ai mo ni tali o fesili o i luga o le laupapa. Pe a talafeagai, faasoa mai ni aafiaga sa e mauaina i le faalogo i le uunaiga mai le Agaga Paia, ma valaaulia alii talavou e faasoa mai soo se aafiaga sa latou mauaina. E mafai foi ona latou faaosa mai ni mea o le a latou faia ina ia lelei atili ai le faalogo mo ma mulimuli i musumusuga a le Agaga Paia.

3:54
Saili ni tala mai lauga o le konafesi aoao talu ai nei lea o loo faaalia ai matafaioi eseese a le Agaga Paia. Mafaufau e faaaofia ia aafiaga a Peresitene Henry B. Eyring ma lona atalii pe faatasi ai ma le Au Paia i Auseteria i le “Ou Te Tuuina Atu Ia Te Outou Le Manuia” po o le aafiaga a Elder Juan A. Uceda o se faifeautalai i Peru i lana saunoaga “Ua Aoao Mai i Tatou e le Alii o Iesu Keriso ina ia Tatalo.” Valaaulia alii talavou taitasi e faitau se tasi o tala, toe faamatala i le korama i ana lava upu, ma faailoa mai po o le a le matafaioi a le Agaga Paia na faia i lena tala. Uunaia ia alii talavou e faasoa mai ni o latou lava aafiaga i le fesoasoani atu o le Agaga Paia ia i latou.
Valaaulia se tasi o le korama e aoao atu se vaega o lenei lesona. E mafai ona ia faia o se vaega o lana fuafuaga o le Tiute i le Atua e aoao mai ma aoao atu ai e uiga i le Agaga Paia (tagai “Malamalama i le Aoaoga Faavae,” itulau 18, 42, po o le 66).
Valaaulia ia alii talavou e suesue i mau nei, faailoa mai le matafaioi a le Agaga Paia i mau taitasi, ma faasoa mai pe faapefea ona faamanuiaina i latou e Lana faatosinaga: Ioane 14:26; 15:26; Kalatia 5:22–23; 2 Nifae 32:5; 3 Nifae 27:20. E mafai foi ona sailiili ia alii talavou i vaega o le lauga a Elder Robert D. Hales “O Le Agaga Paia” e aoao ai e uiga i matafaioi a le Agaga Paia. Valaaulia ia alii talavou e lisi mai ni taimi i o latou olaga o le a latou manaomia ai le uunaiga a le Agaga Paia? O le a le taimi o le a taua ai i le Agaga Paia e faailoa atu ia i latou mea e tatau ona latou faia? O le a le taimi e ono tatau ai ona lagona e alii talavou le uunaiga faamafanafana a le Agaga Paia? Mafaufau e faasoa atu se aafiaga patino na e mauaina ai le fesoasoani a le Agaga Paia.
Faaali atu se tasi o vitio o loo lisiina i lenei otootoga, ma fai atu i alii talavou e faalogo po o le a se mea o loo aoao atu e le vitio ia i latou e uiga i le mauaina o le taitaiga e ala atu i le Agaga Paia. Fai atu i alii talavou taitasi e faasoa atu se mea sa ia aoaoina. Ona tusi lea o le faamatalaga lenei mai ia Julie B. Beck i luga o le laupapa: “O le agavaa e maua ai ma galue i faaaliga patino o se tomai e tasi e sili ona taua lea e mafai ona tatou maua i lenei olaga. O le i ai o lena tulaga o le a le mafai ai ona tatou toilalo; a aunoa ma lena, o le a le mafai ona tatou manumalo” (“‘Ou te Liligi Ifo foi lo’u Agaga i Auauna Fafine i La Ona Aso,’” Ensign po o le Liahona, May 2010, 11). Valaaulia i latou e mafaufau e uiga i ai ma tusi i lalo pe faapei ni o latou lagona e uiga i lenei upusii faapea ma le taua o le ola agavaa mo le ma mulimuli i le Agaga. Uunaia i latou e manatunatu i mea e mafai ona latou faia ina ia saili atili ai ma le atoatoa i le mafutaga a le Agaga Paia.
Valaaulia ia alii talavou e tagai i le tusipese i le faasinoupu “Autu” i lalo o le “Agaga Paia” e saili ai se viiga o loo aoao atua le auala o fesoasoani ai le Agaga Paia ia i tatou. Fai i ai e faasoa mai ni fuaiupu o le pese na latou filifilia. Mafaufau e usu faatasi o se korama se tasi o pese.

Fai i alii talavou e faasoa mai ni mea sa latou aoaoina i le aso. O a ni lagona po o ni uunaiga sa latou mauaina? Pe ua latou malamalama i matafaioi o le Agaga Paia? Pe o i ai nisi a latou fesili? Pe e aoga le faaaluina atili o le taimi i lenei autu?

Motugaafa faafaiaoga

“Ao e sauni ma le agaga tatalo e aoao atu, …e mafai ona taitaiina oe e faamamafa atu ni mataupu patino. E mafai ona e maua se malamalama i le auala sili e tuu atu ai ni manatu faapitoa. E mafai ona e maua ni faataitaiga, lesona faatino, ma ni tala musuia i gaoioiga faigofie o le olaga. Atonu e te lagonaina le faagaeetia ina ia valaaulia se tagata faapitoa e fesoasoani i le lesona. Atonu o le a toe faamanatu atu ia te oe se mea na e oo i ai lea e mafai ona e fetufaai atu” (O Le Aoao Atu, E Leai Se Isi Valaauga E Sili Ai [1999], 49, 50).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Pe a talafeagai ai, faasoa atu se aafiaga na ia lagonaina ai le uunaiga a le Agaga Paia i se tasi o auala na talanoaina i le fonotaga a le korama.
Valaaulia ia alii talavou i le korama ina ia agavaa mo le mafutaga a le Agaga Paia ma sailia.