Ko e hā ʻoku mahuʻinga ai e fāmilí?

Naʻe tuʻutuʻuni ʻe he ʻOtuá ʻa e fāmilí pea ko e uho ia ʻo ʻEne palani ki he ikuʻanga taʻengata ʻo ʻEne fānaú. ʻOku fakafaingofuaʻi ʻe he palani fakalangi ko ʻení ke lava e niʻihi fakafoʻituituí ʻo foki ki Hono ʻaó pea fakatahaʻi e ngaahi fāmilí ke taʻengata.

Teuteuʻi fakalaumālie koe

Ko e hā ʻokú ke fakakaukau ai ko e fāmilí ʻa e uho e palani ʻo e fakamoʻui ʻa e Tamai Hēvaní? Naʻá ke ʻilo fēfē ʻa e mahuʻinga ʻo e fāmilí?

Ko e hā ha ngaahi pōpoaki ʻoku maʻu ʻe he kau talavoú mei he māmaní ʻoku fehangahangai ia mo e meʻa ʻoku tala ʻe he kau palōfitá kau ki hono mahuʻinga ʻo e fāmilí? Te ke tokoni fēfē ke mahino ki he kau talavoú e mahuʻinga taʻengata ʻo e fāmilí?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení, pea fili e niʻihi ʻe tokoni ke mahino ki he kau talavoú e ʻuhinga ʻoku mahuʻinga ai e fāmilí.

Loma 8:16–17; Hepelū 12:9 (Ko e fānau kitautolu ʻa e Tamai Hēvaní)

Sēnesi 2:18–24; T&F 131:1–4; 138:48 (Ko e ngaahi moʻoni ʻo e ongoongoleleí kau ki he fāmilí)

Mōsaia 4:14–15; T&F 68:25, 27–29; 93:40, 48–50 (ʻOku ako ʻe he fānaú e ongoongoleleí mei heʻenau mātuʻá)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129 (vakai foki, Tuʻu Maʻu ʻi he Tuí [2004], 56-59)

Carole M. Stephens, “ ʻOku ʻa e ʻOtuá ʻa e Fāmilí,” Ensign pe Liahona, Mē 2015, 11–13

D. Todd Christofferson, “ ʻUhinga ʻo e Malí, ʻUhinga ʻo e Fāmilí,” EnsignpeLiahona, Mē 2015, 50–53

L. Tom Perry, “Ko e Hoko ko e Mātuʻa Leleí,” Ensign pe Liahona, Nōvema 2012, 26–28

Vitiō: “ʻE Lava ke Taʻengata ʻa e Fāmilí”; “Ko e ʻApí ko ha Faʻunga Fakalangi”

3:11

1:49

Musika ki he kaveinga ʻo e toʻu tupú: “Nothing Can Separate Us”

Ko e faiako ‘i he founga ‘a e Fakamo‘uí

Naʻe fakaafeʻi ʻe he Fakamoʻuí ʻEne kau ākongá ke nau fakamoʻoni, ʻi heʻenau fai iá, naʻe ueʻi honau lotó ʻe he Laumālié. ʻI hoʻo akoʻi e kau talavoú kau ki he mahuʻinga ʻo e fāmilí, fakaafeʻi kinautolu ke vahevahe ʻenau fakamoʻoni ki he mahuʻinga ʻo e fāmilí ʻi he palani ʻo e fakamoʻui ʻa e ʻOtuá.

Tuku ke taki e kau talavoú

ʻE hanga ʻe ha mēmipa ʻo e kau palesitenisī ʻi he kōlomú (pe ko ha ʻasisiteni ki he pīsopé ʻi he kōlomu ʻa e kau taulaʻeikí) ʻo tataki e fakataha fakakōlomú. ʻOkú ne tataki e kau talavoú ʻi hono aleaʻi fakataha e pisinisi ʻa e kōlomú, akoʻi kiate kinautolu honau ngaahi fatongia he lakanga fakataulaʻeikí (mei he folofolá pea mo e tohi Fatongia ki he ʻOtuá, poupouʻi kinautolu ke vahevahe ʻenau ngaahi aʻusia ʻi hono fakahoko honau fatongia ki he ʻOtuá, pea fakaafeʻi ha ʻetivaisa pe mēmipa ʻo ha kōlomu kehe ke ne akoʻi ha lēsoni mei he ongoongoleleí. Te ne lava ʻo teuteu ʻaki hano fakafonu ha ʻasenita ʻo e fakataha fakakōlomú lolotonga ha fakataha fakapalesitenisī.

Kamata ʻa e akó

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

Fakaafeʻi e kau talavoú ke nau tauhoa ʻo vahevahe e meʻa ne nau ako mei he lēsoni ʻo e uike kuo ʻosí mo e founga te nau lava ʻo fakaʻaongaʻi ia ʻi heʻenau moʻuí.
Fakaafeʻi e kau talavoú kimuʻa he fakataha fakakōlomú ke nau ʻomi ha meʻa ʻokú ne fakafofongaʻi ha taha ʻo ʻenau ngaahi manatu melie ki honau fāmilí (hangē ko ha ngaahi tukufakaholo fakafāmili, mālōlō ʻeveʻeva, pe ngaahi ʻekitivitī kehe). Fakaafeʻi e talavou takitaha ke ne vahevahe e meʻa naʻe haʻu mo iá mo fakamatalaʻi e ʻuhinga ʻoku mahuʻinga ai hono fāmilí kiate iá.

Ako fakataha

ʻE lava ke tokoni e ngaahi ʻekitivitī takitaha ʻi laló ke mahino ki he kau mēmipa ʻo e kōlomú e mahuʻinga ʻo e fāmilí. Muimui ʻi he tataki ʻa e Laumālié ʻo fili ha taha pe lahi ange ʻe ngāue lelei taha ki hoʻo kōlomú:

Fakaafeʻi e kau talavoú ke nau lau ʻa e lea ʻa ʻEletā D. Todd Christofferson “ ʻUhinga ʻo e Malí, ʻUhinga ʻo e Fāmilí” pe ko e ngaahi palakalafi ʻe valu fakamuimuitaha ʻo e lea ʻa ʻEletā L. Tom Perry”Ko e Hoko ko e Mātuʻa Leleí,” ʻo kumi e tali ki he fehuʻi ”Ko e hā ʻoku mahuʻinga ai ʻa e fāmilí?” Fakaafeʻi e kau mēmipa ʻo e kōlomú ke nau vahevahe e meʻa ʻoku nau ʻiló. Ko e hā ha meʻa ʻe lava ke fai ʻe he kau talavoú ke fakahaaʻi ʻoku mahino kiate kinautolu e mahuʻinga ʻo e fāmilí? ʻE kaunga fēfē nai e mahino ʻoku nau maʻu ki he mahuʻinga ʻo e fāmilí ki heʻenau tauhi ki he kau mēmipa honau fāmilí?
Vahevahe e kōlomú ki ha kulupu ʻe fā. ʻAi ke ako ʻe he kulupu takitahga ha konga ʻo e lea ʻa Carole M. Stephen “ ʻOku ʻa e ʻOtuá ʻa e Fāmilí” (ʻoku kamata ʻa e konga takitaha ʻaki ha foʻi moʻoni ʻoku ʻasi mataʻāʻaá fekauʻaki mo e fāmilí). Kole ki he kulupu takitaha ke nau teuteu ke akoʻi ki he ngaahi kulupu kehé ʻa e meʻa ne nau ako mei heʻenau kongá. ʻE lava ke nau akoʻi mo moʻui ʻaki ʻa e ngaahi moʻoni ko ʻení ʻi honau fāmilí mo e tukui koló?
Huluʻi ha taha ʻo e ngaahi foʻi vitiō ʻoku fokotuʻu atu ʻi he fokotuʻutuʻu ko ʻení pea kole ki he kau talavoú ke fakafanongo ki he ngaahi ʻuhinga ʻoku ʻomai ai ʻe he Tamai Hēvaní e fāmilí maʻatautolú. ʻEke ki he kau talavoú pe ko e hā haʻanau tali ki ha taha ʻokú ne pehē, “ʻOku ʻikai ke u ʻilo pe koe hā ha ʻuhinga ʻoku totonu ke u mali ai” pe “ʻOku ʻikai ke u tui te u fie maʻu ha fānau ʻi heʻeku matuʻotuʻa angé.” Ko e hā te nau tala ki ha kaungāmeʻa ʻoku ʻikai ke ʻi ha tūkunga lelei hono fāmilí he taimí ni? (Vakai, “Fāmilí,” Ki Hono Fakamālohia ʻo e Toʻu Tupú, 14-15.)
Vahe ki he talavou takitaha ha taha ʻo e ngaahi potufolofola ʻi he fokotuʻutuʻu ko ʻení. Kole ki he kau nmēmipa ʻo e kōlomú ke nau fekumi ʻi he “Ko e Fāmilí: Ko ha Fanongonongo ki Māmani” mo kumi ha potufolofola ʻoku fekauʻaki mo ʻenau veesi folofolá. Fakaafeʻi e talavou takitaha ke ne vahevahe ʻene potufolofolá pea mo e konga o e fanongonongó ʻoku fekauʻaki mo iá. Kole ki he kau talavoú ke nau vahevahe haʻanau faʻahinga aʻusia ʻoku hā mei ai e mahuʻinga ʻo e fāmilí.

Kole ki he kau talavoú ke nau vahevahe ʻa e meʻa naʻa nau ako ‘i he ‘aho ní. ʻOku mahino nai kiate kinautolu e ʻuhinga ʻoku mahuʻinga ai e fāmilí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. ʻE lava ke ne:

Fai ʻene fakamoʻoní ki he mahuʻinga ʻo e fāmilí ʻi he palani ʻa e ʻOtuá.
Fakaafeʻi e kau mēmipa ʻo e kōlomú ke nau vahevahe mo ha mēmipa ʻo e fāmilí pe kaungāmeʻá e “Ko e Fāmilí: Ko ha Fanongonongo ki Māmani”.