iTavi Vua na Kalou

Au na rawa ni vukei ira vakacava eso tale mera sotava e dua na sakaramede vakaibalebale cake?

A yavutaka na sakaramede na iVakabula me dua na sala mera vakananumi Koya kina o ira na daumuri Koya ka vakavouia na nodra veiyalayalati tabu vakamacawa. Na sakaramede e vakatakarakarataka na cabori ni lewe kei na dra i Jisu Karisito mai na Nona Veisorovaki ena vukuda. Sa ikoya oqo na vuna, e dau ka tabu kina na soqoni ni sakaramede ka sa dua na gauna ni railesu vakanomodi kei na vakavoui ni bula qaqaco vakayalo. Ni da taura tu na Matabete vaka-Eroni, sa noda na madigi meda vukei ira na lewe ni vavakoso ni sotavi e dua na sakaramede vakaibalebale vakayalo. Na noda bula kilikili, ivakaraitaki, kei na ivakadinadina sa rawa ni vakayarayarataka na ka era sota kaya.

Vakavakarau Vakayalo

Vakayaloqaqataki ira na lewe ni kuoramu mera vakarautaki ira vakayalo ena lesoni oqo ena vulici ni veika e baleta na sakaramede, na vakasamataki vagumatua ni ibalebale ni sakaramede kivei ira, ka tuvakataki na sala eso e rawa ni ra vakatavulici ira kina eso tale me baleta na ka era sa vulica. Oqo ena qaqaco sara kevaka o na sureti ira rawa mera na vakavakarau taumada kina me dua na macawa ka qai veitaratara kei ira na lewe ni kuoramu ena loma ni macawa mo vakananumi ira.

Na idusidusi ni Matawilivola ni Sigatabu “Au na rawa ni cakava vakacava na sakaramede me vakaibalebale cake kivei au?” e vakarautaka na vakavakarau vinaka me baleta na lesoni oqo. O na rairai vinakata mo veitaratara vata kei na qasenivuli ni Matawilivola ni Sigatabu ni nomu lewe ni kuoramu ka tuvana me vakayacori na nomu veivosaki me baleta na sakaramede ni sa oti na nodra vulica ena Matawilivola ni Sigatabu.

E vica na siga ni se bera na soqoni ni kuoramu, sureti ira na lewe ni kuoramu mera vakarautaka e dua na idusidusi lekaleka e rawa ni ra vakayagataka mera vakatavulica kina eso tale me baleta na sakaramede ka sureti ira mera kauta mai na nodra idusidusi ki na soqoni ni kuoramu. (Sa rawa ni ra okata oqo na lewe ni kuoramu ki na nodra ituvatuva ni iTavi Vua na Kalou ni ra vulica ka vakatavulica baleta na veiyalayalati kei na cakacaka tabu vakalotu eso; raica na Qarava Vinaka na Noqu iTavi Vua na Kalou, tabana e 18, 42, se 66.)

Ni ra vakarautaka na lewe ni kuoramu na nodra idusidusi, sa rawa ni ra vakanamata ki na vidio “Always Remember Him.” Kerei ira mera wilika na Maciu 26:26–28, oka kina na Vakadewa veisemati i Josefa Simici ena ivakamacala e ra ka vakakina ena ikuri ni vakamacala ni Vola Tabu, kei na 3 Nifai 18:1–12, ena vakaraici ni inaki a solia na Kalou ni a tutaka na sakaramede.

Sa rawa ni ra navuca na veitaro oqo ni ra taracake na nodra idusidusi eso:

Na cava na inaki ni sakaramede? Na cava e vakatakarakarataka?
E rawa vakacava ni da nanuma tikoga na iVakabula?
Cava na vuna o nanuma kina ni sa ka bibi na vakayagataki ni sakaramede ena veimacawa?
E rawa vakacava ni da vakarautaki keda vakavinaka cake ni vakayagataka na sakaramede?
E rawa vakacava vei ira na tauri Matabete vaka-Eroni mera matataka na iVakabula ena qaravi ni sakaramede?

Veivakavulici ena ivakarau ni iVakabula

A nuitaki ira na Nona tisaipeli na iVakabula ka solia vei ira na madigi eso mera qarava ka vakatavulici ira tale eso. E rawa ni ra vakalougatataki vakacava na cauravou ena nomu kuoramu ni ra vakatavulica tale eso ena ka era sa vulica tiko me baleta na sakaramede?

Liutaka na soqoni ni kuoramu

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Na vakaleweni taumada ni dua na ituvatuva ni soqoni ni kuoramu ena rawa ni veivuke.

Tekivuna na gauna ni vuli-ka

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na lewe ni kuoramu mera taura e vica na miniti ena itekivu ni soqoni mera wilika vagagalu na masu ni sakaramede (raica na V&V 20:77, 79) ka vakasamataka na veivosa ni dua na sere taleitaki ni sakaramede.
Railesuva vakalekaleka vakuoramu, na ivakavuvuli eso ni veivakatavulici va-Karisito ena talevi ni ivolanikalou vaka na Vunau kei na Veiyalayalati 11:21; 12:8; 42:14. Vakayaloqaqataki ira na lewe ni kuoramu mera vakasamataka toka na veivakavuvuli oqo ni ra wasea na nodra nanuma me baleta na sakaramede nikua.

Vulica vata

Sureti ira na lewe ni kuoramu mera veivakatavulici vakaiira me baleta na sakaramede (ena veilawalawa lalai se vakuoramu taucoko) mai na idusidusi eso era sa vakarautaka. Ni ra sa cakava oti oqo, sureti ira mera veivosakitaka na ka era sota kaya ni ra wasea voli na nodra ivakadinadina. Cava na vuna e bibi kina na wasei ni veika eda sa vulica tiko vata kei ira tale eso?

Kevaka eso vei ira na cauravou e se bera ni vakarautaka na idusidusi eso, solia vei ira na gauna donuya na soqoni ni kuoramu mera cakava vakakina, ni vakamuri na ivakamacala ena “Vakarau vakayalo” ecake. Kevaka e rawa, solia na gauna vei ira eso mera wasea vakaiira na ka era sa vulica.

Veisureti me caka

Ni ra vakayaloqaqataki na lewe ni kuoramu mera wasea na ka era sa vulica, navuca na vakasama eso oqo:

Sureta yadua na lewe ni kuoramu me vakatakilai ira na tamata e rawa ni na wasea vei ira okoya na kilai deivaki kei na ivakadinadina ni vunau ni sakaramede. Me ivakaraitaki, sa rawa vua me vakatavulica na nona matavuvale, e dua na lewe ni kuoramu luluqa, e dua na kalasi ni Goneyalewa se Lalai, se na matavuvale e dau taleva vaka-dauveituberi vakavuvale. Kerea na lewe ni kuoramu yadua me tukuna ki na kuoramu o cei e sa digitaka. O na rairai navuca me ikuri ni veiwasei vakatamata, sa rawa talega vei ira na lewe ni kuoramu mera veiwasei ena vakauitukutuku raraba.
Vakarautaka e dua na gauna mera na sikova kina na lewe ni kuoramu eso na matavuvale ena tabanalevu ka vakatavulici ira me baleta na sakaramede. (Sa rawa ni vukei iko e dua na lewe ni matabisopi se iliuliu ni kaulotu ena tabanalevu me digitaka na matavuvale eso ka na yaga vei ira na veisiko vakaoqo, vakataki ira na curuvou, vuvale lewenilotu vakatikina, se matavuvale ka sega ni dau tiko vakawasoma ena soqoni ni sakaramede.) Mai na veivuke ni peresitedi ni kuoramu, vakarautaki ira vakaitokani na lewe ni kuoramu ka lesia na veitokani yadua mera sikova e dua vei ira na matavuvale vakaoqo. (Ke rawa, tuvani ira na veisiko oqo me veidonui vata e dua na itaviqaravi ni kuoramu donuya na macawa; raica na “Wasei na ka eda vulica” ena mataveilawa ni iTaviqaravi ni iTabagone). Kevaka e dredre na sala ni veitosoyaki, sa rawa ni ra lesi na lewe ni kuoramu mera vakatavulica na nodra dui matavuvale.

Ena dua tale na soqoni na kuoramu mai liu, sureti ira na lewe ni kuoramu mera wasea na veika era sa sotakaya.