Na cava me'u cakava me vakaibalebale vakalevu cake kina vei au na sakaramede?

Ena gauna ni sakaramede ena veimacawa, e dodonu meda vakadikeva mada na noda bula, vakasamataka vakatitobu na Veisorovaki ni iVakabula, ka raica na veika sa gadrevi meda cakava meda veivutunitaka kina na noda ivalavala ca. E sega ni gadrevi meda sa uasivi sara me qai rawa ni da kania na sakaramede, ia e dodonu ga me tiko e yaloda na yalo sa malumalumu ka veivutuni. Sa rawa me dua na ivurevure ni kaukauwa na sakaramede ka dua na madigi ni solibula tale me da bulataka na kosipeli.

Mo vakarautaki iko vakayalo

Na cava o na cakava me vakaibalebale cake kina na sakaramede? Eso beka na ka o sa sotava ena gauna ni sakaramede o rawa ni wasea vei ira na itabagone?

Na veivakalougatataki cava era rawa ni ciqoma na itabagone ni ra sa kila vakavinaka na ituvaki tabu ni sakaramede? Na cava eso na ka dau veivagolei tani vei ira na itabagone ni se bera se ena gauna ni sakaramede? Era na vorata rawa vakacava na veivagolei tani oqo?

Wilika ena masumasu na ivolanikalou kei na ivurevure oqo. Na cava o rawa ni wasea vei ira na itabagone ka na vukea me vakaibalebale cake kina na nodra gauna ni sakaramede?

Maciu 26:26–28; 3 Nifai 18:1–13 (E a tekivuna na sakaramede na iVakabula)

1 Korinica 11:23–29; 3 Nifai 9:20; V&V 20:37; 59:8–12 (Mo vakavakarau vakacava ena nomu kania ena bula kilikili na sakaramede)

Peter F. Meurs, “Sa Rawa ni Vueki Keda na Sakaramede Meda Vakatabui,” Ensign se Liaona, Nove. 2016, 85–87

Dale G. Renlund, “Meu Kauti Ira Mai Kina na Tamata Kecega Vei Au,” Ensign se Liaona, Me 2016, 39–42

Cheryl A. Esplin, “Na Sakaramede - na Vakavoui ni Yalo,” Ensign, se Liaona, Nove. 2014, 12–14

“Sakaramede,” Tudei ena Vakabauta (2004), 110-12

Vidio: “The Sacrament Helps Us Draw Closer to Jesus Christ”, “Upon My Holy Day—Getting Closer to God”

Veivakavulici ena ivakarau ni iVakabula

A veivuke o Jisu Karisito vei ira a vakavulica o Koya mera kunea na lesoni ni kosipeli mai na veika era sotava kei na veika ni vuravura e wavoliti ira. A tukuna o Koya na veika me baleta na qoli, na sucu ni gone, kei na cakacaka ena were. Ena rawa vakacava mo vakayagataka na veika dausotavi raraba mera vukei kina na itabagone mera kila vakavinaka na ivakavuvuli ni kosipeli?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea na gauna a mana kina na nona vakavulica e dua na qasenivuli e dua na ivakavuvuli ni kosipeli.
Kerei ira na itabagone mera vakacavara na yatuvosa “Sa rawa me vakaibalebale cake vei au na sakaramede ena noqu ___________.” Sureti ira mera vola na kena isau ena vava ni volavola ka vakuria ena lisi oqo ni vakayacori tiko na lesoni.

Vulica vata

Na itaviqaravi yadua e ra ena vukei ira na itabagone mera vulica na sala me vakaibalebale cake kina vei ira na sakaramede. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

Sureti ira na itabagone me ra vakasamataka e dua na gauna a cakava kina e dua na tamata na ka vinaka kivei ira. Na cava beka era a vakila? Me vukei ira na itabagone me ra kila vinaka ni iVakabula sa mai vakacavara na Veisorovaki kivei ira yadua, sa rawa mo sureti ira me ra wilika vata na parakaravu e tekivu toka ena “Se cava ga na vanua eda tu kina” mai na vosa nei Elder Dale G. Renlund “Meu Kauti Ira Mai Kina na Tamata Kecega Vei Au.” Na cava sa mai kila na marama e tukuni tiko ena vosa? Na cava era rawa ni cakava na itabagone me sa ka vakalou cake kina vei ira na sakaramede? Sa rawa mo solia ki na lewe ni kalasi yadua e dua na kadi lailai. Mo qai kerei ira na lewe ni kalasi me ra vola na veika era a vakasamataka ena gauna era kania kina na sakaramede. Sa rawa me ra vola eso na ka era gadreva me ra vakasamataka ena vukea me ra raica matua na iVakabula ena gauna era na kania tale kina na sakaramede.
Vakaraitaka e dua na iyaloyalo ni iVakabula ni qarava tiko na sakaramede (raica na Gospel Art Book,54). Ni ko wilika tiko na Maciu 26:26–28, kerei ira na itabagone mera raica na iyaloyalo ka raitayaloyalotaka se na vakacava beka ke ra a tiko kina. Wasea na sala eso a vaqaqacotaka kina na sakaramede na nomu lomana na iVakabula kei na ivakadinadina me baleta na Veisorovaki. Sureti ira na itabagone mera wasea na nodra ivakadinadina. Vakayaloqaqataki ira na itabagone mera vakasamataka vakatitobu na veika era sa veivosakitaka nikua ena gauna era na kania tale kina na sakaramede. Na cava eso na gauna ena nona bula na iVakabula era na rawa ni vakasamataka ena gauna ni sakaramede?
Sureti ira na itabagone mera wasea na nodra sere ni sakaramede talei (ke gadrevi, sa rawa mera raica na ulutaga e muri ena ivola ni sere ) ka vakamacalataka na vuna e vakaibalebale cake kina vei ira. Me lagati, rogoci, se wiliki e dua se sivia vei ira na serenilotu oqo, ka wiliki na ivolanikalou era toqai toka ena icavacava ni serenilotu yadua. Na cava eda sa vulica me baleta na sakaramede mai na serenilotu oqo? Era vukei keda vakacava na serenilotu meda vakavakarau ki na sakaramede?
Sureti ira yadua na lewe ni kalasi me digitaka ka wilika e dua vei ira na ivolanikalou ena ituvatuva oqo, ka vakasaqara na veika sa kerea vei keda na Turaga meda cakava meda vakavakarau kina ki na sakaramede. Kerei ira na itabagone mera wasea na veika era kunea. Na cava e gadreva kina na Turaga meda vakavakarau ki na sakaramede ena ivakarau vakaoqo? Sureti ira mera wasea na ka tale eso era cakava me vakaibalebale cake kina na sakaramede se vakaraitaka e dua na vidio era tiko ena ituvatuva oqo. Kerei ira na itabagone mera digitaka e dua na ka era na cakava mera vakavakarau ki na sakaramede ena macawa mai oqo.
Sureti ira na itabagone me ra wilika na vosa nei Elder Peter F. Meurs “Sa Rawa ni Vukei Keda na Sakaramede Meda Vakatabui” se na italanoa ni liuliu ni goneyalewa ena vosa nei Sisita Cheryl A. Esplin “Na Sakaramede — na Vakavoui ni Yalo.” Kerei ira me ra vakasaqara na isau ni taro oqo “A cava meu cakava me vakaibalebale vakalevu cake kina vei au na sakaramede?” Sureti ira me ra vola na nodra isau ni taro ena vava loaloa ka wasea e dua na ka era sa tuvanaka mera cakava me ra vakayacora kina na ivakasala era sa wilika.
Ke rawa, me gole na kalasi ki na teveli ni sakaramede ka vakakina ki na rumu ni vakavakarau. Sureti ira na lewe ni Matabete i Eroni (ivakavuvuli kei na bete) se o bisopi me vakamacalataka na kena vakarautaki na sakaramede ka wasea na nona ivakadinadina ni sa ka tabu na cakacaka vakalotu oqo. Sureti ira na lewe ni kalasi tale eso mera wasea na nodra ivakadinadina kei na nodra nanuma me baleta na veika era rawa ni cakava me rokovi vakalevu cake kina na sakaramede.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila vakavinaka beka na sala me vakaibalebale cake kina vei ira na sakaramede? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti me ra cakava me baleta na veika era sa vulica nikua. Vakayaloqaqataki ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika o rawa ni cakava.