Na cava na inaki ni galala ena kena vulici na kosipeli?

A buli keda na Tamada Vakalomalagi meda mata daucakacaka, sega ni iyaya meda vakasaurarataki (raica na 2 Nifai 2:26). E vakayagataki na ivakavuvuli oqo ena ituvaki kece ni noda bula vakayago, oka kina na noda sasaga meda vulica na kosipeli. E dodonu meda vulica vakai keda yadua na kosipeli— me kua ni dua e vulica ena vukuda. Na vulici ni kosipeli e dodonu me dua na vuli-ka taleitaki, sega ni vakawaleni tu ga. Ni da vakayacora na noda galala meda vasaqara vagumatua na ka dina, ena vakalougatataki keda na Turaga ena rarama kei na kila-ka e cecere cake.

Mo vakarautaki iko vakayalo

Vakasamataka mada e dua na ka o se qai vulica walega oqo. Na cava o a cakava mo vulica rawa kina? Na cava o a vakila?

Na cava eso na mataqali sala era rawa ni vakaitavi kina na itabagone mera vulica na kosipeli?

O cei ena nomu kalasi e gugumatua sara tiko na nona vuli? O cei e sega? Mo na cakacaka vata vakacava kei ira na qasenivuli mera vakayaloqaqataki na itabagone mera gugumatua ena vuli, ena kalasi kei na nodra dui gauna?

Vulica na ivurevure e ra. Na itukutuku se ivakaraitaki cava e rawa ni o vakayagataka mera vukei na itabagone mera kila vakavinaka na ibalebale ni gugumatua ena vakaitavi ena vuli?

Joni 7:17 (E dodonu meda vakayacora na lewa nei Tamada Vakalomalagi meda kila kina na Nona ivakavuvuli)

Jemesa 1:22 (Mo cakacakataka na vosa, ka kakua ni rogoca walega)

1 Nifai 10:19 (Kevaka eda vasaqara vagumatua na ka dina, eda na kunea)

2 Nifai 2:26 (Meda cakava yani, ka kakua ni vakasaurarataki)

V&V 50:24 (Ni da sa ciqoma na ka dina ka vakayacora sara, eda na ciqoma e so tale na ka dina)

V&V 88:118 (Eda vakasaqara na kila-ka ena vuli kei na vakabauta)

David A. Bednar, “ Seek Learning by Faith,” Ensign, Sept. 2007, 61–68

Veivakavulici ena ivakarau ni Turaga

E vakayagataka na iVakabula na italanoa e rawarawa, vosa vakatautauvata, kei na ivakaraitaki e bulataki dina ena gauna e veivakavulici kina. A vukei ira na tamata mera raica na lesoni ni kosipeli mai na veika era dui sotava. O na vukei ira vakacava na itabagone mera raica ena nodra dui bula na ivakaraitaki ni veika o vakavulica tiko?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone mera vola na veika era sa vulica mai na semineri, soqoni ni sakaramede, nodra vuli ga vakai ira, se ituvaki tale eso. Veivosakitaka va-kalasi na kena sema tiko na veika kece oqo ki na yavu ni veivakabulai.
Sureti ira na itabagone mera tukuna e dua na lesoni taleitaki era a vakaitavi vagumatua kina (me vaka, ena lotu vakamatavuvale, na veisiko, ena kalasi ni Matawilivola ni Sigatabu, se Lalai). Na cava era a cakava mera vakaitavi kina? A vukei ira vakacava na nodra vakaitavi oqo mera vuli vakavinaka cake kina? Na cava eso tale na sala ni vakaitavi ena vuli? (Sa rawa mo vakamacalataka ni veiwasei ena gauna ni kalasi e sega ni sala duadua ga ni vakaitavi.)

Vulica vata

Na itaviqaravi yadua e ra ena vukei ira na itabagone mera vakaitavitaki ira vagumatua ena vulica na kosipeli. Mai na veivakauqeti ni Yalotabu, digitaka e dua se sivia ka na ganita na nomu kalasi:

Vakayaloqaqataki ira na itabagone mera wasea eso na nodra ivakaraitaki na tamata ena ivolanikalou era a vasaqara vagumatua mera vulica na kosipeli (raica, me vakataka na, 1 Nifai 2:14–16 [Nifai], Vunau kei na Veiyalayalati 138:1–11 [Joseph F. Smith], kei na Ai Tukutuku —Josefa Simici 1:10–18 [Josefa Simici]). Na ivakavuvuli cava ni vulici na kosipeli era rawa ni raica na itabagone ni ra wilika na ivakaraitaki oqo? (Me vakataka, a vakarorogo o Nifai ki na veika a vakavulica o tamana, ka gadreva me kila vakai koya, ka vakayacora na nona gagadre oqori.) Na cava era vinakata mera vulica na itabagone me baleta na yavu ni veivakabulai? Era na vakayagataka vakacava na ivakavuvuli oqo mera dusimaki kina ena nodra vuli?
Sureti ira na itabagone mera wilika na wase ni ulutaga “Learning by Faith: To Act and Not to Be Acted Upon,” mai na vosa nei Elder David A. Bednar “Seek Learning by Faith.” Kerei ira mera raica na veika a vakatura tiko o Elder Bednar mera cakava mera gumatuataka na nodra ilesilesi ni vulica na kosipeli. Na cava era na cakava mera vakayagataka kina na nona ivakasala ki na nodra dui sasaga mera vulica na yavu ni veivakabulai?
Vola ena papa ni volavola na tiki ni ivolanikalou mai na ituvatuva oqo. Sureta yadua na lewe ni kalasi mera digitaka e dua mera wilika, ka mera raica kina na isau ni taro oqo: Na veivakalougatataki cava e yaco mai ni da vakaitavi vagumatua tiko ena vuli? Kerei ira na itabagone mera wasea na veika era sa raica. Sureti ira yadua mera vakacavara na yatuvosa oqo: “Sa noqu ituvatuva meu vakaitavitaki au vagumatua ena vulici ni kosipeli ena noqu ...” Kerea e vica na itabagone mera wasea ki na kalasi na nodra ituvatuva.
Sureti ira na itabagone mera wilika na Vunau kei na Veiyalayalati 58:26–28, mera raica kina na sala mena vakayagataki kina na ivakasala ni Turaga ki na nodra itavi ni vulica na kosipeli. Kerei ira mera vola eso na digidigi era na vakayacora vaka-gonevuli (me vakataka na nodra rawa ni vosa se sega ena gauna ni kalasi se nodra vakavakarau vakayalo ki na kalasi). Na cava so ena yaco mai na nodra digidigi oqo?

Kerei ira na itabagone mera wasea na veika era sa vulica nikua. Era sa kila vakavinaka tiko na inaki ni galala ni vulici na kosipeli? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Dau taroga na taro e dau gadrevi kina vei ira na lewenikalasi mera kunea mai na kena isau mai na ivolanikalou kei na nodra ivakavuvuli na parofita edaidai”( Veituberi, Me iLutua ni Noda Bula[1999], 70).

Veisureti mera bulataka

Na cava e rawa ni ra cakava na itabagone mera vakayagataka na veika era sa kila ni ra vulica na yavu ni veivakabulai ena nodra kalasi tale eso ena Lotu? O na tokoni ira vakacava ena nodra sasaga mera dauvuli gugumatua?
Wasea na nomu ivakadinadina ni veivakalougatataki e yaco mai ena kena vakasaqarai vagumatua na vuli.