Na madigi cava so ni vuli kei na veivakavulici e tiko ena noda itikotiko?

Na vuvale sai koya na vanua uasivi duadua ni vuli, veivakavulici, ka bulataki kina na ivakavuvuli ni kosipeli. Era sa vakamasuti tiko kina na matavuvale mai vei ira na parofita edaidai mera dau vakaliuca taumada tiko na masu vakamatavuvale, lotu vakamatavuvale, vuli kei na veivakasalataki ena kosipeli, kei na itaviqaravi vakamatavuvale e savasava.

Mo vakarautaki iko vakayalo

Na veika cava o sotava ena nomu vulica ka vakavulica na kosipeli ena nomu itikotiko? Na cava o rawa ni wasea vei ira na itabagone?

O na vakauqeti ira vakacava na itabagone me vakayaloqaqataka na vuli kosipeli ena nodra itikotiko? Na veivakalougatataki cava e yalataki ena rawa ni vakauqeti ira?

Vakayagataka na ivurevure e ra mo vakarautaki ira na itabagone mera vakavulica ka vulica na dina ni kosipeli ena nodra itikotiko. Na veika o sa sotava ena vukea me mana na nomu vakavulici ira na itabagone. Sa rawa ni vukei iko na itaviqaravi ena ituvatuva oqo mo tuvanaka kina na sala mo vakayaloqaqataki ira kina na itabagone.

Mosaia 4:14–15; V&V 68:25–28 (Sa nodra ilesilesi na itubutubu mera vakavulica na kosipeli vei ira na luvedra)

Valeri V. Cordón, “Na Vosa ni Kosipeli,” Ensign se Liaona, Me 2017, 55–57

M. Russell Ballard, “Matabose ni Matavuvale,” Ensign se Liaona, Me 2016, 63–65

Quentin L. Cook, “Sa Noqu Rarama na Turaga,” Ensign se Liaona, Me 2015, 62–66

“Lotu Vakamatavuvale,” Tudei ena Vakabauta (2004), 63–65

“Masu Vakamatavuvale,” Tudei ena Vakabauta, 74

“Na Bibi ni Vulici ni Vosanikalou ena Veisiga,” Tudei ena Vakabauta, 40– 41

“Na Vuvale kei na Lotu” iVoladusidusi 2: Veiliutaki ena Lotu, 2010, 1.4.

Vidio: “A Heaven -Inspired Program”

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na sala era a vakayacora kina ena loma ni macawa na veika era a vulica mai na lesoni ni macawa sa oti.
Kerei ira na itabagone mera raitayaloyalotaka ni ra sa itubutubu. Na cava beka e nodra ilesilesi me baleti ira na luvedra? Kerea e dua na lewenikalasi me vola sara ena vava, ka sureti ira na itabagone mera vakasaqara na ikuri ni ilesilesi eso ena Mosaia 4:14–15 kei na Vunau kei na Veiyalayalati 68:25–28. Na madigi cava era rawa ni taura na itubutubu mera vakayacora kina na nodra ilesilesi e tukuni tiko ena veitikina oqo? Na cava era rawa ni veivuke kina na itabagone?

Vulica vata

Na itaviqaravi yadua e ra ena vukei ira na itabagone mera vakavakarau ka vakasaqara na madigi eso ni vulica ka vakavulica na kosipeli ena nodra itikotiko. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ena veivakadonui nei bisopi, sureta e dua ena nomu tabanalevu a gadrevi me vulica e dua na vosa vou kei na kena itovo me mai vosa ena kalasi vei ira na itabagone ena veika a sotava. Ena matani kalasi, kerei koya me wilika na veivakatauvatani ni yali ni vosa a vakayagataka o Elder Valeri V. Cordón ena imatai ni ono na parakaravu ni nona vosa “Na Vosa ni Kosipeli.” Kerei koya me wasea na veika a sotava e tautauvata ki na veivakatauvatani nei Elder Cordón. Wasea na kalasi ki na tolu na ilawalawa ka solia ki na ilawalawa yadua e dua na iwase e vakamacalataka tiko na sala me maroroi kina na vosa ni kosipeli ena itikotiko. Sureta na ilawalawa mera wasea na veika era sa vulica kei na sala mera maroroya kina na vosa ni kosipeli ena nodra itikotiko ena gauna oqo.
Sureta na kalasi me ra wilika na vosa nei Elder M. Russell Ballard “Matabose ni Matavuvale,” ka vakasaqara ka makataka na ivakasala sa baleti ira ni ra sa gone ni matavuvale. Sureti ira na itabagone me ra wasea na veika e bibi vei ira ni ra wiliwili. Na ivakasala cava nei Elder Ballard sa baleta tiko na tekinolaji? Ena rawa vakacava vei ira na itabagone me ra tokoni ira nodra itubutubu kei na tacidra ena matabose ni matavuvale? Sa rawa mo sureti ira na itabagone me ra vakatasuasuataka e dua na matabose ni matavuvale kei na veika e dau yaco kina.
Sureti ira na itabagone me ra wilika na iwasewase ka kena ulutaga “Na Gauna Dodonu e Vale” ena vosa nei Elder Quentin L. Cook “Sa Noqu Rarama na Turaga.” Na cava beka era vulica na itabagone mai na ivakaraitaki nei Vaughn Kimball kei na nona matavuvale ena italanoa? Na cava beka era sa vulica na itabagone mai vei ira na nodra itubutubu? Era na veivuke vakacava ena vuli kei na veivakavulici ena nodra vuvale?
Vakaraitaka na vidio “A Heaven-Inspired Program,” ka kerei ira na itabagone mera raica na veika rerevaki e vuravura era rawa ni taqomaki mai kina kei na nodra rawa ni vakaukauwataki na tamata yadua kei na matavuvale era vulica vata na kosipeli. Sureti ira na itabagone mera wilika na “Lotu Vakamatavuvale” ena Tudei ena Vakabauta ka vakarautaka e dua na ituvatuva rawarawa ni dua na lesoni ni lotu vakamatavuvale ena ulutaga era digia. Sureti ira na itabagone mera veivakavulici vakaiira ena lesoni era sa vakarautaka ki na kalasi e tarava.
Na kalasi, me wilika na ikavitu ni parakaravu ni “Matavuvale: Ai Vakaro ki Vuravura Raraba.” Sureti ira na itabagone mera vola ena papa ni volavola na ivakavuvuli era sa dau vakayavutaki kina na matavuvale dau rawa-ka. Kerei ira na itabagone mera wasea eso na itaviqaravi veivakabulabulataki era dau taleitaka mera vakaitavi vata kina kei na nodra matavuvale. Sureti ira mera wasea na dina ni kosipeli era sa vulica ena nodra a vakaitavi ena itaviqaravi oqo. Me kena ivakaraitaki, na nodra vakarautaka vata e dua na kakana me vulici kina na veiqaravi kei na loloma, se qito vata me vulici kina na yalomalua kei na gugumatua. Vakayaloqaqataki ira na itabagone mera tuvanaka e dua na itaviqaravi veivakabulabulataki baleti ira nodra matavuvale ka veivosakitaka vata kei ira na kena semati tiko na itaviqaravi oqo ki na kosipeli.
Mera vakasamataka na itabagone na vakasama era rawa ni vakayagataka na tamata mera vakayaloqaqataki ira nodra matavuvale mera vakaitavi ena masu vakamatavuvale kei na vulica na ivolanikalou. Veivosakitaka na veivakalougatataki e yaco mai ki na matavuvale mai na itaviqaravi oqo. Era rawa ni wilika na itabagone me ka ni vakasama na “Masu Vakamatavuvale” kei “Na Bibi ni Vulici ni Vosanikalou ena Veisiga” ena Tudei ena Vakabauta . Me vakatasuasuataki na sala e rawa kina vua e dua na itabagone me vosa vua e dua na itubutubu ka vakayaloqaqataka na kena caka na masu vakamatavuvale kei na vulici ni ivolanikalou. Sureti ira na itabagone mera wasea e dua na ka era sotava ni ra masu tiko vakamatavuvale ka vulica na ivolanikalou.

Kerei ira na itabagone me ra wasea na veika era sa vulica nikua. Era sa kila vakavinaka beka na sala mera vakavakarau ka vakasaqara na madigi mera vuli ka veivakavulici ena nodra itikotiko? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Maqosa eso ni vulica na kosipeli

Na vulica na ivolanikalou e sega ni dau nodra ivakarau ni bula e vuqa na tamata, me vaka na taba piano se droini. Na kilai ni kena vulici vagumatua na ivolanikalou ena dau gadrevi kina na vakatorocaketaki ni kena maqosa. Na maqosa ni vulici ni ivolanikalou e vakamacalataki tiko ena ituvatuva oqo e rawa ni vukei ira na itabagone mera gonevuli gugumatua cake ni kosipeli. Vakamatatataka na maqosa oqo vei ira na itabagone, ka vakauqeti ira mera vakayagataka ni ra dui vulica vakaiira na kosipeli.

Veisureti me caka

Sureti ira na lewe ni kalasi mera vakasaqara na veivakalougatataki e dau yaco mai ni ra vakaitavi vata kei na nodra matavuvale ena vulici ni kosipeli, ena masumasu, vulici ni ivolanikalou, lotu vakamatavuvale, se itaviqaravi veivakabulabulataki.