Meu na vukei ira vakacava na tamata mera kila vakavinaka na noqu ivakatagedegede?

Era na dau taroga vakavuqa na tamata na veika ni noda ivakatagedegede. Sa rawa meda tu vakarau meda sauma na nodra taro ka vakadinadinataka na veivakalougatataki e dau yaco mai ni da talairawarawa ki na ivakaro ni Kalou. Ena sala oqo sa rawa kina meda rarama kei vuravura.

Mo vakarautaki iko vakayalo

Vulica ena masumasu na veiivolanikalou kei na veiivurevure oqo. Na cava ena vukei ira na itabagone mera kila vakavinaka na sauma na taro me baleta na ivakatagedegede ni Lotu?

Roma 1:16; 2 Timoci 1:7–8; 2 Nifai 8:7 (Kakua ni maduataka na kosipeli i Jisu Karisito)

1 Timoci 4:12 (Mo dua na ivakaraitaki ni vakabauta)

3 Nifai 11:29 (Sa mai vua na tevoro na yalo ni veileti)

V&V 11:21; 84:85; 100:5–8 (Ena vukei keda na Turaga meda kila na ka me da tukuna)

Thomas S. Monson, “Na Vakavakarau ena Kauta Mai na Veivakalougatataki,” Ensign se Liaona, Me 2010, 64

“Talairawarawa,” Tudei ena Vakabauta (2004), 121–23

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea e dua na ka era se qai sotava oti ga ka a vaqaqacotaka e dua na ka era sa vulica tiko baleta na kosipeli.
Sureti ira na itabagone mera vola eso na taro era a tarogi kina mai vei ira na nodra itokani se lewe ni nodra matavuvale me baleta na ivakatagedegede se ivakaro ni Turaga. Era a vakamacalataka beka vakacava na itabagone na nodra ivakatagedegede? Na cava beka na ka era a diva mera a vakavinakataka cake?

Vulica vata

Na itaviqaravi yadua e ra ena vukei ira na itabagone me ra vulica me ra vakamacalataka na nodra ivakatagedegede kivei ira na tamata. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi. Solia e dua na gauna kivei ira na itabagone mera vakatovotovotaka vakaiira mera vakamacalataka na nodra ivakatagedegede.

Kauta mai ki na kalasi e vica na ilavelave ni Liaona. Sureti ira na itabagone mera vakasaqara ena mekasini eso na italanoa e tukuni ira tiko na tamata era tutaka se vakamacalataka na nodra ivakatagedegede vei ira na tamata. Kerei ira mera wasea na veika era sa vulica mai na italanoa oqo. (Ena loma ni macawa ni bera na kalasi, sa rawa mo vakasaqara ena vica na ilavelave ni mekasini ni Lotu mo raica na kena era tiko kina na itukutuku e veiganiti vakavinaka vei ira na itabagone o vakavulica tiko.) E tautauvata beka na veika era sotava na itabagone ena nodra dui bula ka ra rawa ni wasea? Na cava era vulica mai na veika era sa sotava ka rawa ni vukei ira mera vakamacalataka na nodra ivakatagedegede kivei ira na tamata?
Solia kivei ira yadua na itabagone na ilavelave ni vosa nei Peresitedi Thomas S. Monson “Na Vakavakarau ena Kauta Mai na Veivakalougatataki.” Kerei ira na lewe ni kalasi mera raica vakatotolo na vosa, mera vasaqara kina na ivakatagedegede ni Lotu e vakamacalataka tiko o koya (me vakataka na rakorako, dina, kei na Vosa ni Vuku). Sureti ira yadua na itabagone mera digitaka e dua vei ira na ivakatagedegede oqo, wilika na veika e tukuna tiko kina o Peresitedi Monson, ka wasea ki na kalasi na sala e vakamacalataka kina o Peresitedi Monson na ivakatagedegede kei na veika era rawa ni kunea mera rawa ni vakayagataka mera vukei ira na tamata mera kila vakavinaka cake na ivakatagedegede oqo.
Kerei ira yadua na lewe ni kalasi mera wilika e dua vei ira na ivolanikalou ena ituvatuva oqo. Sureti ira na itabagone mera vakasaqara na vosa kei na malanivosa e tukuna tiko na ivakarau ni noda itovo ena gauna eda vakamacalataka kina na noda ivakatagedegede vei ira na tamata. Raica mera na yadua na itabagone na ilavelave Me iSakisaki ni iTabagone. Kerei ira mera digitaka e dua vei ira na ivakatagedegede e tiko ena ivolalailai, wilika, ka tuvanaka na veika era rawa ni kaya ke dua na itokani e kerei ira me cakava e dua na ka ena voroka na ivakatagedegede o ya. Era na vukei ira vakacava na nodra itokani na itabagone mera kila vakavinaka na vuna era digitaka kina mera bulataka na ivakatagedegede ni Turaga?
Sureti ira na itabagone mera wilika na ikarua ni parakaravu ni “Talairawarawa”ena Tudei ena Vakabauta (draunipepa 121–22). Era na vakayagataka vakacava na itukutuku ena parakaravu oqo me tukuni kina vua e dua na itokani e kaya ni sa rui dredre na ivakaro? Na ivolanikalou cava, ivakaraitaki, se veika era dui sotava era rawa ni wasea vei ira na nodra itokani me vukei koya me kila vakavinaka na inaki ni ivakaro ni Kalou?

Ni ra sa vakaitavi oti na itabagone ena dua se sivia na itaviqaravi oqo, solia vei ira na gauna mera vakatovotovotaka na nodra vakamacalataka na nodra ivakatagedegede. Me kena ivakaraitaki, ni sa rawa mera vakatasuasuataka na veika era na rawa ni sotava, se me ra vola na sala mera vukei ira kina na nodra itokani mera kila vakavinaka na vuna era digitaka kina mera bulataka na ivakatagedegede ni Turaga.

Kerei ira na itabagone mera wasea na veika era sa vulica nikua. Era sa kila beka na sala mera vukei ira na tamata mera kila vakavinaka na nodra ivakatagedegede? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Veisureti me caka

Sureti ira na itabagone mera vakasamataka mada ni dua na gauna era na sotava mera na vakamacalataka kina na nodraivakatagedegede vei ira na tamata. Ena vukei ira vakacava na nodra lesoni nikua mera cakava vagumatua cake oqo?