Meu na vakatorocaketaka vakacava na noqu vulica na ivolanikalou?

Na ivakaro vakaivolanikalou mo “dou tugana ki lomamudou na vosa i Karisito” (2 Nifai 32:3) e tukuna meda kakua ni wilika wale tikoga na ivolanikalou. Meda vakasaqara sara ga vagumatua, meda vakasamataka vakatitobu na ka era vakavulica tiko ka meda vakatauvatani keda ki na ivakavuvuli oqo. Meda masulaka meda kila vakavinaka ka vakamuria na veivakauqeti cava ga eda ciqoma mai vua na Yalo Tabu. Sa rawa me tara cake na noda vakabauta ni vakaibalebale cake na noda vulica na ivolanikalou, taqomaki keda mai na veitemaki, ka vukei keda meda toro voleka vua na Tamada Vakalomalagi.

Mo vakarautaki iko vakayalo

E sa vakauqeta vakacava na nomu bula na ivolanikalou? Na cava o sa cakava me vakaibalebale vakalevu cake kina na nomu vulica na ivolanikalou?

Era sa sotava tiko beka ena ivolanikalou na itabagone ni nomu kalasi na veika e vakaibalebale cake vakalevu? O na vukei ira vakacava mera vakatorocaketaka na nodra vuli ivolanikalou?

Vulica ena yalomasumasu na veiivolanikalou kei na ivurevure oqo. Na cava o sa raica ena vukei ira na itabagone mera vakatorocaketaka na nodra vuli ivolanikalou?

1 Nifai 10:19; V&V 88:63, 118 (Ni da vakasaqara, eda na kunea)

1 Nifai 19:23 (Meda dau vakatauvatani keda ki na ivolanikalou)

2 Nifai 4:15–16; V&V 138:1–11; Josefa Simici—Ai Tukutuku 1:11–13 (Ni da vakasamataka vakatitobu na ivolanikalou ena kauta mai na ivakatakila)

2 Nifai 32:3 (E dodonu meda tugana ki lomada na vosa i Karisito)

Devin G. Durrant, “Dau Nanuma Voli Ga e Yaloqu,” Ensign se Liaona, Nove. 2015, 112–15

Vidio: “Face to Face with President Eyring and Elder Holland: How can I better understand and feast on the scriptures?”

Veivakavulici ena ivakarau ni Turaga

E vakayagataka na iVakabula na ivolanikalou me veivakavulici kina ka vakadinadinataka. E vakavulici ira na tamata mera vakasamataka vakatitobu na ivolanikalou ka vakayagataka mera kunea kina na isau ni taro. O na vukei ira vakacava na itabagone mera vakayagataka na ivolanikalou mera kunea kina na isau ni nodra vakatataro?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veigauna eso (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea na veika era sa vulica mai na ivolanikalou ena nodra vuli yadua ena macawa oqo.Na cava na nodra ituvatuva ni vuli ivolanikalou? Na cava na nodra nanuma mera na vakatorocaketaka kina na nodra vuli ivolanikalou?
Vola ena papa ni volavola, “Sa ka bibi sara na noda dromuci keda ena ivolanikalou meda vakabulabulataki kina vakayalo” (Quentin L. Cook, “ A Cava Dou sa Nanuma ena Gauna Oqo?” Ensign se Liaona, Nove. 2012). Tarogi ira na itabagone ena nodra nanuma baleta na ibalebale ni noda dromuci keda ena ivolanikalou. Na cava na kena duidui mai na noda wilika wale tu ga? Vakayaloqaqataki ira mera nanuma tiko na itukutuku oqo ni ra vulica na vuli ivolanikalou ena gauna ni lesoni oqo.

Vulica vata

Na itaviqaravi yadua e ra ena vukei ira na itabagone mera vakatorocaketaka na nodra vulica na ivolanikalou. Mai na veivakauqeti ni Yalotabu mo digitaka e dua se sivia ka na ganita na nomu kalasi:

Kerei ira na itabagone mera raitayalotaka mada e dua na kana magiti levu. Na kakana cava so beka ena tiko kina? Sureti ira na itabagone mera wasea na gauna eso era a vakasinaiti kina vakayalo. Ena vakatauvatani vakacava na wiliki ni ivolanikalou ki na kana magiti? Sureti ira na itabagone mera wasea na sala era rawa ni kana magiti kina ena ivolanikalou. Era rawa ni kunea na vakasama eso ena 2 Nifai 31:20 kei na vidio “Face to Face with President Eyring and Elder Holland: How can I better understand and feast on the scriptures?”
Dua na sala ni kena vakatorocaketaki na vulici ni ivolanikalou o ya mo raica e dua na tikina ni ko vulica tiko na ivolanikalou mo raica vakatabakidua ena loma ni macawa (raica na vosa nei Devin G. Durrant “Dau Nanuma Voli Ga e Yaloqu.”) Ni vo e dua na macawa me caka na kalasi, sureta e vica na lewe ni kalasi me ratou wilika na vosa nei Baraca Durrant ka “vakasamataka vakatitobu” e dua na tiki ni ivolanikalou. Ena kalasi, solia na gauna mera wasea kina na veika era sa sotava. Vola ena vava “Meda na vakatorocaketaka vakacava na noda vulica na ivolanikalou?” ka sureti ira na itabagone mera wasea na vakatutu mai na vosa nei Baraca Durrant kei na nodra vulica yadua kei na matavuvale.
Vola ena papa ni volavola na vosa vakasaqara, vakasamataka vakatitobu, kei na masu. Sureti ira yadua na itabagone mera wilika e dua na ivolanikalou sa vakaturi tiko ena ituvatuva oqo ka wasea vei ira na kalasi na ka sa vulica mai na ivolanikalou. Kerei ira na itabagone mera vola na nodra tiki ni ivolanikalou ena yasa ni vosa ena papa ni volavola e vakamacalataka tiko na ivakavuvuli era vakavulica tiko. Na cava so tale na ivakavuvuli mana ni vulici ni ivolanikalou era vakasamataka rawa na itabagone? Era kila tiko beka e dua na ivolanikalou e vakamacalataka na ivakavuvuli o ya?
Vakaraitaka vei ira na itabagone na veivuke ni vuli sa vakarautaki tu ena ivolanikalou vakarautaki ni YDE. Vukei ira mera raica na sala e rawa ni vukei ira kina na veivuke ni vuli oqo mera vakavinakataka kina na nodra vulica na ivolanikalou. Ena veivakadonui nei bisopi, sureti ira na lewe ni tabanalevu mera gole mai ki na kalasi mera mai veivakatarogi kei ira na itabagone ena sala e vakaibalebale cake kina vakalevu na nodra vulica na ivolanikalou.
Kerei ira na itabagone mera digitaka e dua na wase mai na ivolanikalou ka mera wilika me vica na miniti, ka mera vakayagataka na ivakavuvuli ni ivolanikalou era sa vulica rawa nikua. Sureti ira mera wasea na veika titobu eso era sa raica ni ra vulica tiko.

Kerei ira na itabagone mera wasea na veika era sa vulica nikua. Era sa kila vakavinaka beka na sala mera vakatorocaketaka kina na nodra vuli ivolanikalou? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Tuvanaka vinaka na idabedabe e na loma ni nomu kalasi mo rawa ni raica vinaka kina na matadra na nomu lewenikalasi ka me ra raica talega mai na matamu” ( Veituberi, Me iLutua Ni Noda Bula, [1999], 82).

Veisureti mera bulataka

Sureti ira na itabagone mera vakasamataka na nodra ituvatuva yadua ni vuli ivolanikalou. Na veika cava era sa vulica nikua e rawa ni vukei ira mera vakatorocaketaka kina na nodra ituvatuva?