Na cava e tiki bibi kina ni yavu nei Tamada Vakalomalagi na vuli?

E dua vei ira na inaki bibi a vakauti keda mai kina ki vuravura na Tamada Vakalomalagi o ya me da mai bula sotava na veika me vukea na noda vuli ka yaco meda vakataki Koya cake sara. Kevaka eda sa talairawarawa ka vakavulici rawarawa, ena vukei keda o Koya meda vulica na veika e gadrevi meda kila, vosa ena vosa, ena gauna taucoko ni noda bula.Sa namaki keda tiko na Tamada Vakalomalagi meda vakayagataka na kila-ka eda sa rawata meda vakalougatataki ira kina na tamata ka tara cake na Nona matanitu.

Mo vakarautaki iko vakayalo

Na veimadigi cava era tiko mo tomana kina na nomu vuli? O sa kalougata vakacava ena nomu vakayacora?

O na vukei ira vakacava na itabagone mera kila vakavinaka na bibi ni kena tomani tikoga na vuli ena nodra bula taucoko? Na cava o rawa ni cakava mera raica na yaga ni nodra vulica na veika ni vuravura kei na kosipeli?

Wilika ena masumasu na ivolanikalou kei na ivurevure oqo. Na cava e vakauqeti iko mo dauvuli tiko ga kina ena bula oqo?

2 Nifai 28:27–30; V&V 98:11–12 (Sa yalataka tu na Turaga me na tuberi keda ena “vosa ena vosa” ni da vulica ka bulataka na veika eda sa kila)

Alama 12:9–11; V&V 50:40 (Kevaka eda sa talairawarawa ka vakavulici rawarawa, eda na kila-ka tikoga ena noda bula taucoko)

V&V 88:77–80 (E vinakata na Turaga meda kila-ka me rawa ni da vakavakarau meda vakarabailevutaka na noda veikacivi)

Dieter F. Uchtdorf, “Noqu Turaga, Koi Au Beka?” Ensign se Liaona, Nove. 2014, 56--59.

Dallin H. Oaks and Kristen M. Oaks, “Vuli kei ira na Yalododonu Edaidai,” Ensign se Liahona, Epe. 2009, 22–27

“Vuli,” Me iSakisaki ni iTabagone (2011), 9–10

“Yavu ni Veivakabulai,” Tudei ena Vakabauta (2004), 115--117

Vidio: “You Know Enough” ( E vakavulica o Elder Neil L. Andersen ni veivakavulici e vakayacori ena vosa ena vosa)

Veivakavulici ena ivakarau ni iVakabula

A ivakaraitaki uasivi sara na iVakabula ena veika kece e vakavulica. A vakavulici ira na Nona tisaipeli ena masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina. Na cava o rawa ni cakava mo vakaraitaka kina kivei ira na itabagone o vakavulica ni ko taleitaka mo vuli?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Na veika cava era sa vulica na itabagone me baleta na yavu ni veivakabulai (me vakataka na veiyalayalati, talairawarawa, na Veisorovaki, se bula ni oti na mate)? Na veika cava e rawa ni ra veiwasei kina vakai ira?
Vola ena papa ni volavola, “ Na cava e tiki bibi kina na vuli ena yavu nei Tamada Vakalomalagi?” Solia vei ira na itabagone na gauna taucoko ni lesoni mera vakasamataka vakatitobu na taro oqo ka mera vola na isau dodonu eso. Ni tini na kalasi, sureti ira mera wasea na veika era sa vola.

Vulica vata

Na itaviqaravi yadua e ra ena vukea mera vakauqeti na itabagone mera dauvuli tikoga ena nodra bula taucoko. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vola ena papa ni volavola Na cava e tiki bibi kina ni ituvatuva nei Tamada Vakalomalagi na vuli? Kerei ira na itabagone me ra vakasamataka mada na taro oqo ni ra wilika na iwasewase ka kena ulutaga “Na Bula Vakadikevi” ena vosa nei Peresitedi Dieter F. Uchtdorf “Noqu Turaga, Koi Au Beka?” Solia na gauna mera wasea kina na nodra vakasama. Sureti ira me ra tukuna me baleta na veisau era sa vakayacora ena nodra bula me isau ni nodra vulica na ivolanikalou se na nodra ivakavuvuli na parofita bula.
Kerei ira yadua na itabagone mera wilika e dua na ivolanikalou ena ituvatuva oqo, ka mera raica kina na ivakavuvuli ni vuli. Sureti ira yadua mera droinitaka e dua na iyaloyalo se dayakaramu e vakaraitaka na tiki ni ivolanikalou o ya. Kerei ira na itabagone mera vakayagataka na nodra iyaloyalo mera veivakavulici vakai ira ena veika era sa wilika. Na cava e vakavulica na ivolanikalou oqo me baleta na bibi ni kena vulici na yavu nei Tamada Vakalomalagi?
Sureti ira na itabagone mera wilika na wase “ Vuli” ena Me iSakisaki ni iTabagone, oka kina na tiki ni ivolanikalou. Kerea e veimama na kalasi mera raica mai na veika e vinakata vei keda na Tamada Vakalomalagi meda cakava, ka kerea na ikarua ni veimama mera vakatakila mai na veivakalougatataki sa yalataka tu o Koya. Sureti ira mera wasea na veika era sa raica ka digitaka e dua na ka era nanuma mera na cakacaka kina. Veivosakitaka va-kalasi na sala mera na vakavinakataka kina na cakacaka o ya, ka vakayaloqaqataki ira na itabagone mera lavaka vakai ira yadua mera vakayagataka na ivakasala ni Turaga.
Vakaraitaka na vidio “You Know Enough,” ka sureti ira na itabagone mera wasea na veika era vulica mai vei Elder Neil L. Andersen me baleta na sala meda kila-ka kina. Na cava beka era na kaya vua e dua na itokani e sotava tiko na dredre baleta ni sega tu ni kila vakavinaka na veika e baleta na kosipeli? Era na vukei nodra itokani vakacava me kila vakavinaka na inaki ni vuli ena yavu nei Tamada Vakalomalagi?
Kerei ira na itabagone mera wilika na “Yavu ni Veivakabulai” ena Tudei ena Vakabauta (tabana e 209–12), oka kina na ivolanikalou sa laurai, ka raica e dua na ka era se bera mada ni kila. Sureti ira mera wasea na veika era sa vulica, ka veivosakitaka na vuna e vinakata kina na Tamada Vakalomalagi meda tomana tikoga na noda vuli.

Kerei ira na itabagone me ra wasea na veika era sa vulica nikua. Era sa kila vakavinaka beka na bibi ni vulici na yavu nei Tamada Vakalomalagi? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Veisureti mera bulataka

Sureti ira na itabagone mera vakasamataka mada e dua na tiki ni yavu ni veivakabulai era gadreva mera vakavulica kina e dua na itokani se lewe ni matavuvale.Na cava e rawa ni ra cakava mera vulica kina na iulutaga o ya?
Cavuta na noda ivakadinadina ni veivakalougatataki eda sa ciqoma ni da vasaqara na kila-ka ena gauna ni noda bula.