Na cava e bibi kina na vakavulici ni ivunau savasava?

Ena veiyabaki tarava na nodra mate na Tinikarua na iApositolo taumada, era sa tekivu vakatautaka na nodra kila-ka vakaiira na tamata ena kena vakadewataki na ivolanikalou. Me kena itinitini, a vakavuvulitaki na ivunau vakailasu, ka mani sikalutu na lotu ki na Vukitani. Sa noda ilesilesi vaqasenivuli ni kosipeli, meda vakatavulica na dina ni kosipeli vakalesuimai ena kena dodonu taucoko ka me kakua ni da liutaka kina vakatani e dua tale na tamata. Ni ra sa kila deivaki na dina ni ivunau o ira eda vakatavulica tiko, ena tarai na utodra ka ra na veisautaka na nodra ivakarau kei na itovo (raici Boyd K. Packer, “Kakua Ni Rere,” Ensign se Liaona, Me 2004, 79).

Mo vakarautaki iko vakayalo

E rawa vakacava vei iko va-qasenivuli mo vakadinata ni o sa vakatavulica tiko na ivunau savasava? O sa bau vakila ena gauna cava na kaukauwa e lako mai ena vakatavulici ni ivunau savasava?

Era sa vakila beka na itabagone o vakatavulica na kaukauwa ni ivunau savasava? Ena rawa vakacava mo vukei ira mera lomadei cake ena nodra sasaga ni vakatavulica na ivunau savasava.

Vulica na ivolanikalou kei na ivurevure e ra. Na cava o vakila vakabibi mo wasea vata kei ira na itabagone?

Luke 24:32; Josefa Simici—Ai Tukutuku 1:11–12 (E tara na yaloda na ivakavuvuli mai na ivolanikalou)

2 Timoci 4:3–4 (E parofisaitaka o Paula na vakatavulici ni ivakavuvuli vakailasu)

Mosaia 18:19 (Na ivolanikalou kei na vosa ni parofita era sa ivurevure ni ivunau savasava)

Alama 4:19; 31:5 (Sa kaukauwa sara na vosa ni Kalou)

Moronai 10:5 (Sa ivakadinadina ni veika dina na Yalo Tabu)

D. Todd Christofferson, “Na iVunau i Karisito,” Ensign se Liaona, Me 2012, 86–90

Veivakavulici ena ivakarau ni Turaga

A vakayagataka na ivolanikalou na Turaga me vakatavulica ka vakadinadinataka na Nona cakacaka. A dau veivakadreti wasoma o Koya ka vakatavuvulitaka na ivunau savasava. E rawa vakacava ni o vukei ira na itabagone mera vakayagataka na ivolanikalou mera vakatakila kina na ivunau savasava ka vakatavulica vei ira tale eso?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani).Ena rawa vakacava mo vukei ira mera raica na yaga ni kosipeli ena nodra bula e veisiga? Na veivakasama ka koto oqo e ra ena rawa ni veivuke:

Tukuna vei ira na itabagone mera wasea e dua na ka era a sotakaya ka ra a vakila kina na Yalotabu ena nodra vakatavulica tiko e dua na tamata me baleta na kosipeli.
Kauta mai e dua na bilo wai savasava kei na dua na bilo wai duka ki na kalasi. Vakaraitaka ni wai me na vakatakarakarataka na kosipeli ka da vakatavulica kivei ira tale eso. Ke sa vakatakarakarataka na wai savasava na kosipeli dodonu, na cava e rawa ni vakatakarakarataka na wai duka? Na cava eso na ka e rawa ni vakadukadukalitaka na ivunau savasava ni kosipeli? Ena rawa ni vukei ira vakacava na itabagone na ivakaraitaki oqo mera kila deivaki kina na bibi ni kena vakatavulici na ivunau savasava?

Vulica vata

Na veiitaviqaravi yadua e ra ena rawa ni vukei ira na itabagone ena vulici ni veika me baleta na bibi ni vakatavulici ni ivunau savasava. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Kerei ira na itabagone mera cakava e dua na ituvatuva ni veisala e saga tiko na vuravura me veisautaka kina na itovo ni tamata. Qai tukuna vei ira mera wilika na Alama 4:19 kei na 31:5, ena kena raici na sala ni veivakayarayarataki ni Turaga vei ira tale eso. Ni ra sa wasea oti na ka era kunea, sureti ira mera raica ena ivolanikalou na ivakaraitaki ni tamata ka a veisautaki na lomadra baleta ni ra a vakatavulici ena ivunau dina. Kerei ira na itabagone mera wasea na ivakaraitaki ni ivakavuvuli ni kosipeli era sa vulica ka a vakayarayarataka na ka era a cakava.
Vukei ira na itabagone mera raica ena ivolanikalou na ivakaraitaki ni tamata ka ra a vakatavuvulitaka na ivunau vakailasu (me kena ivakaraitaki, Seremi [raica na Jekope 7], Korio [raica na Alama 30], se ira na Soramu [raica na Alama 31]). A tarai ira vakacava na tamata na nodra veivakatavulici? Na ivunau cava soti era a vakatavulica na italai ni Turaga me sauma lesu kina? Na ivakavuvuli vakailasu vakatautauvata cava era sa lako curuma tiko na itabagone ena vuravura edaidai? Era na sauma lesu vakacava na itabagone ka vakatavulica na ivunau savasava?
Sureti ira na itabagone mera wilika na 2 Timoci 3:2–4 kei na 2 Nifai 9:28–29. Era sa vakayaco-ka tiko vakacava na ivolanikalou oqo ena noda gauna? Na cava eso na revurevu ni ivunau vakailasu ka da raica wavoliti keda tu e vuravura? (me so na ivakaraitaki, raica na 2 Timoci 3:1–5). Na ivakavuvuli cava ni kosipeli vakalesuimai ena rawa me vukea na ravuti ni revurevu oqo?

Kerei ira na itabagone mera wasea na veika era sa vulica nikua. Era sa kila deivaki li na bibi ni kena vakatavulici na ivunau savasava? Na cava era sa bau vakila se vakanananu kina? E tiko tale beka eso na nodra vakatataro? Ena yaga li me na tauri vakalevu cake na gauna ena iulutaga oqo?

Me Veivuke ena Veivakavulici

“Me da kakua ni dau solia na vu ni tukutuku vei ira na iliuliu ni Lotu ni bera ni o vakadeitaka na vuna se na dina ni tukutuku. Ena gauna eda dau wilika kina na ivolanikalou, meda dau qarauna vinaka na kena vakayagataki me vakatautauvatani kei na kena ibalebale se na lewena” (Veituberi, Me iLutua ni Noda Bula [1999], 60).

Veisureti me caka

Sureti ira na itabagone mera vakasamataka e dua na nodra madigi ni veivakatavulici sa roro tiko mai. Vakayaloqaqataki ira mera vakananuma na cava era na cakava me vakadeitaka ni ra vakatavulica na ivunau savasava.