Na cava au rawa ni vulica mai vei Peresitedi Monson me baleta na muria na Yalotabu?

E kaya o Peresitedi Thomas S. Monson: “Sega ni dua na siga meu sega ni veitaratara kei na Tamaqu mai Lomalagi ena masu. Oqo e dua na veiwekani au sa dau vakamareqeta sara— e dua, kau na yali kevaka meu sega ni vakayacora. Kevaka mo ni se bera ni tekivutaka na veiwekani vakaoqo kei na Tamada Vakalomalagi, au vakauqeti kemuni mo ni cakava vakakina. Ni ko sa cakava, ko ni sa na taukena na veivakauqeti levu mai Vua ena nomuni bula —na ka sara ga e vinakati me tiko vei keda meda rawa ni bula tiko vakayalo ena vuravura oqo. Oqo na mataqali solisoli ka dau veivakauqeti ka veituberi kina o Koya kevaka meda kerea. Sa na dua na iyau talei dina sara! Au dau yalomalumalumu sara ena gauna e dau veitaratara mai kina na Tamaqu Vakalomalagi ena Nona veivakauqeti. Au sa vulica meu kidava, vakararavitaka, ka vakamuria” (“Tudei ena Vanua Tabu,” Ensign se Liaona, Nove. 2011, 84).

Mo vakarautaki iko vakayalo

Sa vakalougatataki vakacava na nomu bula ena nomu vakamuria na veivakauqeti ni Yalo Tabu? O sa vakauqeti vakacava ena ivakaraitaki nei Peresitedi Monson me baleta na ka oqo?

Era sa kila tiko beka na itabagone o vakavulici ira tiko na sala mera ciqoma ka vakamuria kina na veivakauqeti vakayalo? Ena vukei ira vakacava na itabagone ena gauna oqo kei na veisiga ni mataka na nodra vulica mera vakamuria na veivakauqeti ni Yalo Tabu? Ena veivakauqeti vakacava vei ira na ivakaraitaki nei Peresitedi Monson?

Vulica ena yalomasumasu na veiivolanikalou kei na ivurevure oqo. Na cava ena vukei ira na itabagone mera vulica mai na ivakaraitaki nei Peresitedi Monson me baleta na vakayacora na veivakauqeti ni Yalo Tabu?

Vakaibalebale 3:5–6 (Kevaka eda sa vakararavi vua na Turaga, ena dusimaka o Koya na noda sala)

1 Nifai 3:7 (Sa dau vakarautaka na Turaga vei keda na sala meda rawata kina na veika sa vakarota vei keda o Koya meda cakava)

2 Nifai 32:1–5 (E vakaraitaka vei keda na Yalo Tabu na veika me da cakava)

V&V 8:2–3 (E dau vosa na Yalo Tabu ki na noda vakasama kei na lomada)

Thomas S. Monson, “Nanuma na Kena Veivakalougatataki,” Ensign se Liaona, Nove. 2012, 86–89

Thomas S. Monson, “Tu ena Veivanua Tabu,” Ensign se Liaona, Nove. 2011, 82–86 (italanoa ni nona liutaka na kena vakatabui na Valetabu e Frankfurt Jamani)

Thomas S. Monson, “Nanumi Lesu na Valecavu,”Ensign se Liaona, Me 2007, 41–42 (na italanoa ni veivakauqeti me vagolea na vosa ni koniferedi vua e dua na goneyalewa lailai e dabe tiko ena itaba dabedabe e cake)

Vidio: “Following the Promptings of the Spirit,” “Always Follow the Promptings of the Spirit”

1:51

2:40

Veivakavulici ena ivakarau ni Turaga

E vakavulica o Jisu Karisito, “Sa sega ni noqu na noqu ivakavuvuli, sa nona ga ka talai au mai. Kevaka e dua na tamata sa via cakava na lomai koya, ena kila se sa ka mai vua na Kalou nai ivakavuvuli, seu vosa vakaiau ga” ( Joni 7:16–17). Ena vukei iko vakacava na titobu ni nomu talairawarawa mo kila kina na dina ni ivakavuvuli o vakavulica tiko?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira yadua na itabagone mera raica e dua na ivolanikalou era sa wilika oti ka makataka tu mera wasea ki na kalasi.Kerei ira yadua mera wasea na veika era sa vakauqeti kina me baleta na tiki ni ivolanikalou o ya.
Wasea vei ira na itabagone na itukutuku nei Peresitedi Thomas S. Monson e tiko ena itekitekivu ni ituvatuva oqo. Na cava era sa vakauqeti kina mai na itukutuku oqo? Na italanoa cava e rawa ni ra vakasamataka na itabagone a ciqoma kina o Peresitedi Monson na veivakauqeti ni Yalo Tabu ka cakava sara?

Vulica vata

Na itaviqaravi yadua e ra ena vukei ira na itabagone mera vulica mai na ivakaraitaki nei Peresitedi Monson me baleta na muria na veivakauqeti vakayalo. Mai na veivakauqeti ni Yalo Tabu, mo digitaka ga na kena o kila ni na ganita vinaka duadua na nomu kalasi:

Lesia vei ira yadua na itabagone e dua na italanoa kei Peresitedi Monson ena nona muria na veivakauqeti ni Yalo Tabu (me vaka na kena sa vakaturi tiko ena ituvatuva oqo).Kerei ira na itabagone mera wilika ka vakamacalataka vakalekaleka na nodra italanoa kei na ka era vulica baleta na nodra vakayacora na veika era vakauqeti kina. Kerei ira naitabagone mera wasea na gauna era a vakayacora kina na veika era vakauqeti kina vakayalo ka ra vakalougatataki sara.
Sureti ira na itabagone mera wilika na ivolanikalou sa vakarautaki tiko ena ituvatuva oqo ka vola vakalekaleka na veika era vakavulica na tiki ni ivolanikalou yadua me baleta na muria na veivakauqeti ni Yalotabu.Me wiliki vata e dua se rua na italanoa me baleti Peresitedi Monson sa vakaturi tiko ena ituvatuva oqo, ka kerei ira na itabagone mera vakarogoca na sala a bulataka kina o Peresitedi Monson na ivolanikalou era wilika tiko. Na cava era rawa ni cakava na itabagone mera ciqoma vinaka cake kina na veivakauqeti vakayalo?
Kerei ira na itabagone mera vakasamataka vakatitobu na taro oqo ni ra wilika na kena italanoa o Peresitedi Monson e vakaturi tiko ena ituvatuva oqo: Na cava e dau dredre kina ena so na gauna meda vakayacora na veika sa vakauqeti keda kina na Yalo Tabu? Eda na vorata rawa vakacava na dredre oqo? Na veivakalougatataki cava e dau yaco mai ni da muria na veivakauqeti? Sureti ira mera wasea eso na veivakararamataki era rawata mai na ivakaraitaki nei Peresitedi Monson. Na cava era rawa ni cakava mera muria kina na ivakaraitaki o ya?

Kerei ira na itabagone mera wasea na veika era sa vulica nikua. Na cava era sa bau vakila se vakanananu kina? Era sa kila vakavinaka beka na vuna e bibi kina me ra vakayacora na veivakauqeti ni Yalo Tabu? E tiko tale beka eso na nodra taro? Ena yaga beka me tauri vakalevu cake na gauna ena iulutaga oqo?

Veisureti mera bulataka

Tarogi ira na itabagone, se cava era sa vakauqeti mera cakava, baleta na ka era sa vulica nikua, Vakauqeti ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika mo na cakava.