Au na vulica vakacava meu vakatulewa vakaiau?

E dua na tiki bibi ni noda rawati keda ga vakataki keda sa ikoya na noda vulica meda dau vakatulewa ga vakaikeda. Sa tu vakarau o Tamada Vakalomalagi me dusimaki keda, ia e sega ni dau tukuna vakadodonu sara vei keda na ka meda vakayacora. E solia tu vei keda na galala ka namaka meda vakayagataka noda kila-ka, na veika eda sa sotava, vakakina na noda vakabauta me dusimaki noda vakatulewa vakataki keda. Sa na qai rawa vei keda meda kerei Koya me vakadeitaka vei keda se donu noda vakatulewa.

Mo vakarautaki iko vakayalo

Na cava e so na vakatulewa bibi o sa vakayacora? O a vakayacori ira vakacava na veivakatulewa oqori? A vukei iko vakacava na Turaga?

Na veivakatulewa bibi cava soti era sotava tiko na itabagone? Na ivakavuvuli cava soti ni kosipeli e rawa ni vukea nodra vakatulewa?

Vulica ena masumasu na ivolanikalou kei na ivurevure tale eso. Na cava ena rawa ni vukei ira na itabagone mera vulica na ivakavuvuli ni kosipeli ka salavata kei na vakatulewa?

Alama 37:37 (Vakasalataki mai vua na Turaga)

V&V 9:7–9 (E dau dusimaki keda na Turaga ena noda vakatulewa ni oti na noda vakadikevi ira ena noda vakasama)

V&V 58:26–29 (E sega ni dodonu meda dau vakaroti tikoga ena veika kece; sa dodonu meda dau guta tikoga na cakavinaka)

Dallin H. Oaks, “Vinaka, Vinaka Cake, Vinaka Sara,”Ensign se Liaona, Nove. 2007, 104–8

Robert D. Hales, “Kivei Ira na Matabete i Eroni: Vakavakarau me Baleta na Vakatulewa ni Tini na Yabaki,”Ensign se Liaona, Me 2007, 48–51

Richard G. Scott, “Vakayagataki ni iSolisoli Cecere ni Masumasu,“Ensign seLiaona, Me 2007, 8–11

Vidio: “Wrong Roads”

Veivakavulici ena ivakarau ni iVakabula

A vakarautaki koya na iVakabula me vakacavara na Nona ilesilesi ena masumasu, lolo, kei na vakasaqarai ni veivuke nei Tamana Vakalomalagi. O na rawa vakacava ni vakamuria na ivakaraitaki ni iVakabula ena nomu vakavakarau mo veivakavulici?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone mera vakasamataka eso na ka sa yaco tiko oqo e vuravura ka vakaraitaka na bibi ni bula rawati ira vakayalo ka vakayago talega.
Wilika vata na Vunau kei na Veiyalayalati 58:26–29. Na cava e sega kina ni via vakaroti [keda] tiko ena veika kece ga na Turaga? Kerei ira na itabagone mera vola ena vava ni volavola na veivakatulewa bibi era na rawa ni vakayacora ena loma ni 10 na yabaki mai oqo. Sureti ira mera vakasamataka na sala era na vukei ira kina na veika era sa vulica ena lesoni oqo ena nodra vakatulewa ena veika oqo.

Vulica vata

Na itaviqaravi yadua e ra ena vukei ira na itabagone ena nodra vakatulewa ga vakataki ira. Mai na veivakauqeti ni Yalotabu, mo digitaka e dua se sivia ka na ganita na nomu kalasi:

Sureti ira na itabagone mera wilika Vunau kei na Veiyalayalati 9:7–9 kei na Alama 37:37, kerei ira mera vakanananutaka vakatitobu na sala e rawa ni ra vakayagataka kina na ivakasala ni Turaga ena veitikina oqo ena vakatulewa bibi era na vakayacora ena vica na yabaki mai qo. Na cava na kena ibalebale meda “vakasalataki mai vua na Turaga” ena veivakatulewa oqo? Na cava na kena ibalebale na “vulica ena [noda] vakasama”? Sureti ira na itabagone mera wasea na nodra vakasama kei na veika sa yaco vei ira ka ra sa vakasalataki mai kina vua na Turaga ena vuku ni vakatulewa mera vakayacora. Wasea talega na ka sa yaco oti vei iko kei na nomu ivakadinadina.
Kerea ki na kalasi mera wasea na ka era sa vulica me baleta na vakatulewa ni ra wilika tiko na italanoa nei Elder Robert D. Hales me baleta na pailate ka sega ni via tiko ena vuli ni misini yavala (ena nona vosa “Ki vei ira na Matabete i Eroni: Vakavakarau kina Tini na Yabaki ni Vakatulewa”). Kerei ira mera wasea na veika era sa raica. Sureti ira na itabagone mera wilika e dua vei ira na parakaravu ka tekivu ena “Oqo na kena Gauna” ena vosa nei Elder Hales, ka qai kerei ira mera wasea ena kalasi na ka e vakasalataki ira tiko kina o Elder Hales mera vakayacora vakakina na sala ena tara kina na nodra bula mai muri na veika era digitaka ena gauna oqo.
Sureti ira na itabagone mera wilika na iwasewase I ena vosa nei Elder Dallin H. Oaks “Vinaka, Vinaka Cake, Vinaka Cake Sara” ka wasea na ka era vulica me baleta na vakatulewa. Na veika cava soti era na rawa ni vakayagataka na itabagone mera kila rawa kina na duidui ni veika vinaka, vinaka cake kei na veika vinaka cake sara? (Sa rawa mo vagolei ira ki na malanivosa oqo nei Elder Oaks: “Sa dodonu meda biuta laivi eso na ka vinaka me rawa ni da digitaka kina eso na ka e vinaka cake se vinaka cake sara baleta ni ra vakatubura na vakabauti Jisu Karisito ka vakaqaqacotaka na noda veimatavuvale.”) Vola ena vava ni volavola na ulutaga eso oqo Vinaka, Vinaka Cake, kei na Vinaka Cake Sara, ka qai sureti ira na itabagone mera vola na veidigidigi ka ra na veidonui kei na veiulutaga oqo (kevaka era na gadreva eso na kena ivakaraitaki, dusimaki ira ki na iwase IV ni vosa nei Elder Oaks). Era na taurivaka vakacava na itabagone na veika era vulica mai na itaviqaravi oqo kina veivakatulewa me ra na vakayacora?
Wasea na kalasi ki na rua na iwasewase. Sureta e dua na ilawalawa mera wilika na iwase ka kena iulutaga “Mo Masu Vakacava?” mai na vosa nei Elder Richard G. Scott “Na Vakayagataki ni iSolisoli Cecere ni Masumasu,” ka qai sureta na ilawalawa kadua mera wilika na iwase ka kena ilulutaga “E dau Saumi Vakacava na Masu?” Kerei ira na itabagone mera vaqara na isau ni veitaro ena iulutaga ni veiwase era wilika tiko ka wasea kei ira na nodra ilawalawa na veika era sa kunea rawa. Ka qai kerei ira na ilawalawa yadudua mera vakavulica ena ilawalawa kadua na veika era sa vulica rawa me baleta na vakasaqarai ni veidusinaki ni Turaga ena nodra vakatulewa. E rawa talega ni ra sarava na vidio “Wrong Roads” ka wasea na veika e vakuria kina na veika era kila ena ivakarau e rawa ni tuberi keda kina na Turaga. Kerei ira mera wasea na ka era na vakayacora mera muria kina na ivakasala oqo ena nodra vakatulewa vakataki ira.

Kerei ira na itabagone me ra wasea na veika era sa vulica nikua. Era sa kila beka na sala mera dau vakatulewa kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena iulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.