Na cava au rawa ni vulica mai vei ira na parofita kei na iapositolo bula?

Era na dau ciqoma na parofita kei na iapositolo bula na ivakatakila me dusimaki kina na Lotu, kei na nodra ivakasala sa lewa mai ni Turaga, o Koya sa kilai keda vakavinaka sara ka kila vakavinaka na veika eda sa bolei kina. Sa rawa me vukei keda na nodra ivakavuvuli ni da sotava na bolebole ni veisiga nikua. Eda kalougata ni da liutaki tiko mai vei ira na parofita kei na iapositolo bula ka ciqoma na nodra ivakasala ena veivulaono ena gauna ni koniferedi raraba.

Mo vakarautaki iko vakayalo

Sa vukei iko beka vakacava na nodra veivakavulici na parofita kei na iapositolo mo vorata rawa kina na bolebole eso? Na veika cava o sa sotava o rawa ni wasea mera vakaukauwataki kina na itabagone o vakavulica tiko?

Na cava beka eso na bolebole era sotava tiko na itabagone nikua? Ena vukei ira vakacava na nodra veivakavulici na parofita kei na iapositolo mera vorata yani na bolebole oqori?

Ni ko veivakavulici ena ivurevure oqo, raica na dina e rawa ni vukei ira na itabagone me ra kila na yaga dina ni nodra veivakavulici na parofita bula ki na nodra bula.

Mosaia 8:16–18 (Ena rawa ni yaga sara vakalevu e dua na daurairai vei ira na wekana)

V&V 1:38; 68:3–4 (Ena gauna e vosa kina na italai ni Turaga ena Yalotabu, na veika era cavuta sa ivolanikalou)

Henry B. Eyring, “Na Tikina sa Soqoni Vata kina e Lewe Rua se Lewe Tolu,” Ensign se Liaona, Me 2016, 19–22

Ronald A. Rasband, “Loloma i Jisu,” Ensign se Liaona, Nove. 2015, 89–90

Gary E. Stevenson, “Na Dina Rawarawa ka Bibi,” Ensign se Liaona, Nove. 2015, 91–92

Dale G. Renlund, “Ena Mata ni Kalou,” Ensign se Liaona, Nove. 2015, 93–94

Vosa mai na koniferedi se qai oti toka ga mai vei iratou na lewe ni Mataveiliutaki Taumada kei na Kuoramu ni iApositolo Le Tinikarua

“Parofita,” Tudei ena Vakabauta (2004), 103–104

Veivakavulici ena ivakarau ni Turaga

Ni bera na Nona mate kei na Tucaketale, a vakavulica na iVakabula vei iratou na Nona tisaipeli ni na tala mai na Yalo Tabu me mai dusimaki iratou ki na “ka kecega e dina… ka na vakatakila vei kemudou na veika ena yaco mai muri “ ( Joni 16:13). Ena vukei iko na Yalo Tabu mo kila na sala vinaka duadua mo veivakavulici ka vukei ira kina na itabagone.

Vidio: “Kilai Keimami ka Lomani Keimami”

Sarava eso tale

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veigauna (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

• Sureti ira na itabagone mera wasea na gauna a tarogi ira kina e dua baleta na kosipeli. Na cava era a kaya?

• Kerei ira na itabagone mera wasea e dua na vosa a vakauqeti ira mai na koniferedi raraba sa oti. Taroga na vuna a vakaibalebale vakalevu cake kina vei ira.

Vulica vata

Raica eso tale na vakasama ni vuli kei na veivakavulici .

Na itaviqaravi yadua e ra ena vukei ira na itabagone mera raica na isau ni taro baleta na veibolebole kina nodra bula mai na nodra vosa na parofita bula. Mai na veivakauqeti ni Yalotabu, mo digitaka e dua se sivia ka na ganita vinaka duadua na nomu kalasi:

• Ena nona vosa “Na Tikina sa Soqoni Vata Kina e Lewe Rua se Lewe Tolu,” a vakayagataka kina o Peresitedi Henry B. Eyring na vosa vakatautauvata ni daukakaburaki me vakamacalataka kina na bibi ni kena vakarautaki na yalo me ciqoma na vosa ni Kalou. Sureti ira na itabagone me ra raica na tiki ni vosa nei Peresitedi Eyring a vakamacalataka kina na vosa vakatautauvata ka me ra droinitaka e dua na iyaloyalo ni veika era sa vulica.   Na “sorenikau” cava era rawa ni ra tea e yalodra mai na koniferedi raraba se qai yaco oti toka ga oqo? Sa rawa mo kauta tiko mai eso na ilavelave ni dua na vosa o nanuma e bibi vei ira na itabagone o vakavulici ira tiko ka kerea me ra wilika ka raica kina na sorenikau ni dina me ra na cakacakataka. 

• Vukea na kalasi ena volai rawa ni veibolebole era sa sotava tiko na itabagone nikua. Sureti ira yadua na itabagone mera digitaka e dua vei ira na ibolebole oqo ka vakasaqara na vosa mai na koniferedi raraba sa oti me kunei kina na ivakasala e rawa ni vukei kina e dua me vorata rawa na bolebole o ya. Vakatura mera vakayagataka na “iDusidusi ni Ulutaga” ena ilavelave ni Ensign se Liaona ni koniferedi sa oti.

• Vakaraitaka e dua na vosa mai na koniferedi raraba sa oti nei Peresitedi Thomas S. Monson. Kerei ira na itabagone mera vakarorogo ki na vakasala se veidusimaki e rui bibi ki na nodra yabaki ni bula ka mera vakarautaka e dua na vosa lima na miniti me baleta tiko na ivakasala era sa raica o ya. Mera vakatovotovo vunau vakaiira ena gauna ni kalasi.

• Mera sarava se vakarorogo vata na kalasi ki na dua na vosa ni koniferedi raraba ka na rawa ni vakaibalebale cake kivei ira na itabagone o vakavulica tiko. Kerei ira na itabagone mera raica na dina tawamudu, ivolanikalou, veisureti me vakayacori, kei na veivakalougatataki e yalataki tiko ena vosa o ya. (Kevaka sa lekaleka na gauna, sa rawa mo ni sarava ga vakatikina na vosa o ya.)

• Sureti ira na kalasi mera wilika vata na “Parofita” mai na Tudei ena Vakabauta. Kerei ira mera vakasaqara na nodra ilesilesi na parofita ena veika era sa wilika, ka vola na ilesilesi oqo ena vava ni volavola.. Solia ki na itabagone yadua e dua vei ira na vosa oqo: “Loloma i Jisu” mai vei Elder Ronald A. Rasband, “Na Dina Rawarawa ka Bibi” mai vei Elder Gary E. Stevenson, kei na “Ena Mata ni Kalou,” maivei Elder Dale G. Renlund. Sureti ira mera vakasaqara ka wasea na ivakaraitaki nei Elder Rasband, Elder Stevenson, kei Elder Renlund ni vakayacori na ilesilesi oqo.

Kerei ira na itabagone mera wasea na veika era sa vulica nikua. Era sa kila vakavinaka tiko beka na cava era rawa ni vulica mai vei ira na parofita kei na iapositolo bula? Na cava era sa bau vakila se vakanananu kina? E tiko tale beka eso na nodra taro? Ena yaga beka me tauri vakalevu cake na gauna ena iulutaga oqo?

Maqosa eso ni vuli ena kosipeli

Vulici tiko ni koniferedi raraba kei na veivosa tale eso. Ena lesoni oqo, sa ra sureti na itabagone mera vakasaqara na vosa eso ni koniferedi raraba. Na vakasama eso oqo ena rawa ni vukei ira ena vuli: Vakayaloqaqataki ira mera tukuna vakalekaleka na veivakasama yaga ena nodra vosa. Sa rawa ni ra tarogi ira: Na cava e vinakata na Turaga me’u vulica mai na vosa oqo? Na cava e vinakata o Koya vei au me’u cakava? E tiko e dua na ka ena vosa oqo ena vukei au ena bolebole au sotava tiko oqo ena noqu bula? Vakananumi ira na itabagone ni rawa ni ra vakayagataka na veitaro vakaoqo ni ra vulica tiko na vosa eso ena nodra vulica vakaiira se vakamatavuvale na kosipeli.

Veisureti mera bulataka

Raica eso tale na vakasama ni vuli kei na veivakavulici .

Sureti ira na itabagone mera vulica na vosa mai na koniferedi raraba sa oti me tiki ni nodra vulica na kosipeli. Vakayaloqaqataki ira mera wasea ki na kalasi na veika era sa vulica.

Me vaka ni sa roro tiko mai na koniferedi raraba e tarava, vakayaloqaqataki ira na itabagone mera vakavakarau ena nodra vola toka eso na nodra taro, ka sureti ira mera vakarorogo ka masulaka na isau ni taro ena vosa ni koniferedi.