Ena rawa vakacava niu vakamacalataka vei ira tale eso na Vukitani kei na Veivakalesuimai?

E levu vei keda ena nona na madigi me wasea na dina ni kosipeli vei ira tale eso. Baleta ni sa rui ivakavuvuli veiganiti ni kosipeli vakalesuimai na Vukitani kei na Veivakalesuimai, sa ka bibi meda kila se sala cava eda na vakamacalataka kina na veidina oqo vei ira tale eso. Sa dodonu meda wase ivakadinadina ena sala ka na sega ni rogo veivakacacani ia me vakamatatataka na ibalebale ni Veivakalesuimai ni kosipeli.

Mo vakarautaki iko vakayalo

Na madigi cava o sa bau rawata mo vakatavulici ira tale kina eso me baleta na Vukitani kei na Veivakalesuimai? Na sala mana cava o sa bau raica ni ra vakayagataka eso tale ena kena vakatavulici na ivakavuvuli oqo?

Na cava era sa bau kila oti tu na itabagone me baleta na Vukitani kei na Veivakalesuimai? Na madigi cava e tu vei ira mera vakatavulici ira tale kina eso me baleta na veidina oqo ena gauna oqo ka vakakina mai muri?

Wilika ena yalomasumasu na veiivolanikalou kei na ivurevure oqo. Na cava ena vukei ira na itabagone ena vulici ni iwalewale me rawa ni ra vakamacalataka kina na Vukitani kei na Veivakalesuimai vei ira tale eso?

Emosi 8:11–12; Cakacaka 3:20–21; 2 Cesolonaika 2:1–3 (Tukuni taumada ni Vukitani kei na Veivakalesuimai)

Efeso 2:20 (Na Lotu e taraicake ena yavu ni parofita kei na iapositolo)

“Dau Wasea na iVakadinadina,” Vunautaka na Noqu Kosipeli (2004), 225–26

Na kena vulici eso tale na ka me baleta na Vukitani kei na Veivakalesuimai, qai vakavulica toka “Na Vukitani Levu,” “Na Vakalesuimai ni Kosipeli i Jisu Karisito ki vei Josefa Simici,” Vunautaka na Noqu Kosipeli (2004), 37–40

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na yaga ni kosipeli ena nodra bula ni veisiga? Na veivakasama ka koto oqo e ra ena rawa ni veivuke:

Sureti ira na itabagone mera wasea na veitaro era vakatarogi kina me baleta na Lotu se na nodra vakabauta. Era a sauma vakacava na veitaro oqo?
Sureti ira na itabagone mera wasea na veika era a sotava ka ra vulica kina na veika me baleta na Vukitani kei na Veivakalesuimai. Na cava era a cakava o ira era veivakatavulici ena nodra vukei na itabagone mera kila deivaki kina na dina oqo ni kosipeli vakalesuimai?

Vulica vata

Na veiitaviqaravi yadua e ra ena rawa ni vukei ira na itabagone mera kila deivaki na iwalewale e rawa ni ra veivosaki kina kei ira tale eso me baleta na Vukitani kei na Veivakalesuimai. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Kerei ira na itabagone mera wasea edua na ivolanikalou era kila ka tukuna taumada na lako mai ni Vukitani Levu kei na Veivakalesuimai. Ke ra gadreva na veivuke, mera qai vakayagataka na iDusidusi ni Ulutaga, se vagolei ira ki na ivolanikalou e tuvani ena idusidusi oqo. Vakalaivi ira na itabagone mera vakatovotovotaka na vakayagataki ni ivolanikalou oqo kei na so tale e rawa ni ra kunea ka vakamacalataka na Vukitani kei na Veivakalesuimai vakaiira.
Sureti ira na itabagone mera wilika na iwase ka vakatokai “Dau Wasea na iVakadinadina” ena tabana 225–26 ni Vunautaka na Noqu Kosipeli. Vakalasi, cakava e dua na ituvatuva ni inaki e bibi kina na wase ivakadinadina ni da veivakatavulici kei na idusidusi ni wase ivakadinadina. Me vakaraitaki na bibi ni wase ivakadinadina ni vakatavulici tiko na Veivakalesuimai, sureta e dua na curuvou walega oqo me wasea ki na kalasi na nona a rawata vakacava e dua na ivakadinadina ni Matai ni Raivotu i Josefa Simici (me vakadonuya taumada o bisopi). Kerea na curuvou me wasea na cava a veivuke kina na nodra ivakadinadina eso tale ka vakavuna na nona veisau. Qai wasea na nomu ivakadinadina ni Veivakalesuimai ni kosipeli ka sureti ira na itabagone mera wasea talega na nodra ivakadinadina.
Kerei ira na itabagone mera vulica na iwase ka vakatokai na “Lesoni Vakaibalebale” ena tabana 219 ni Veituberi, Me iLutua Ni Noda Bula. Sureti ira mera vakasamataka na lesoni vakaibalebale ka na rawa ni vukei ira mera vakamacalataka na usutu ni Vukitani kei na Veivakalesuimai kivei ira tale eso. Me vakataka, ni vakamacalataki na Vukitani e rawa ni ra tara- bulokotaka e dua na lotu, ka vakayacana na buloko sara e ra “iApositolo kei na Parofita,” qai vakaraitaka ni na sega ni rawa ni duri na lotu ke sega ni yavutaki ena iapositolo kei na parofita (raici Efeso 2:20). Sureti ira mera wasea na vakasama ni nodra lesoni vakaibalebale vakaiira. Na madigi cava e tu vei ira mera vakatavulici ira tale kina eso me baleta na Vukitani kei na Veivakalesuimai?

Kerei ira na itabagone mera wasea na veika era sa vulica nikua. Era sa kila deivaki li na iwalewale e rawa ni ra vakamacalataka kina na Vukitani kei na Veivakalesuimai vei ira tale eso? Na cava era sa bau vakila se nanuma kina? E tiko tale beka eso na nodra vakatataro? Ena yaga li me na tauri vakalevu cake na gauna ena iulutaga oqo?

Me Veivuke ena Veivakavulici

“Ni o vakarautaka na veimataqali ivakarau ni veivakavulici, era na kila vinaka kina o ira na vuli tiko na ivakavuvuli ni kosipeli, ena kasa vinaka talega vei ira. Na veimataqali ivakarau ni veivakavulici ena vakamatatataka kina vakavinaka na ivakavuvuli, ka da na nanuma tikoga ena veigauna” (Veituberi, Me iLutua Ni Noda Bula [1999], 106).

Sureta na itabagone mera cakava

Tarogi ira na itabagone se cava era sa vakauqeti mera cakava baleta na ka era sa vulica nikua. Vakayaloqaqataki ira mera cakava na ka era sa vakila oqo.Vakasaqara na Yalotabu ni ovakasamataka ena masumasu na veisala e rawa ni o taleva cake.