Na cava na kena ibalebale meda cavuta na ivakadinadina?

Na ivakadinadina sai koya na ivakadinadina vakayalo, e tukuna mai na Yalotabu, me baleta na dina ni kosipeli. Ni da cavuta na noda ivakadinadina, eda sa vakaraitaka kina vei ira na tamata na veika eda kila ni sa ka dina ena kaukauwa ga ni Yalotabu. Na yavu ni dua na ivakadinadina sai koya na kena kilai ni sa bula tiko na Tamada Vakalomalagi ka sa lomani keda, ni ko Jisu Karisito sa noda iVakabula, ni sa vakalesuimai na Nona kosipeli mai vua na Parofita o Josefa Simici, ka sa lotu dina ni iVakabula na Lotu i Jisu Karisito ni Yalododonu Edaidai.

Mo vakarautaki iko vakayalo

O sa vakauqeti vakacava mai na nodra ivakadinadina eso? E sa vaqaqacotaka vakacava— na nomu ivakadinadina na nomu wasea— ena kena gauna vakadonui kei na gauna tale eso? Na cava soti ko sa sotava ka na rawa ni ko wasea vei ira na itabagone?

Ena gauna cava o sa vakadinadinataka kina na nodra cavuta na itabagone na nodra ivakadinadina— ena kena gauna vakadonui se gauna tale eso? Na gauna cava o na solia vei ira na itabagone mera wasea kina na nodra ivakadinadina?

Wilika ena yalomasumasu na veiivolanikalou kei na ivurevure oqo. Na cava ena vukei ira na itabagone mera kila vakavinaka kina na ibalebale ni kena cavuti na ivakadinadina?

Maciu 16:13–19; Mosaia 3:17; Alama 5:45–48; 7:13; V&V 76:22–24 (iVakaraitaki ni ivakadinadina ena ivolanikalou)

Alama 4:18–20 (Na kaukauwa ni cavuti na ivakadinadina)

Alama 11:39–41; 12:1; 15:12 (A vakayarayarataki sara vakaukauwa o Sisoromi mai na ivakadinadina i Amuleki)

“Bear Your Testimony Often,” Teaching in the Savior’s Way (2016), 11

Dieter F. Uchtdorf, “Na Kaukauwa ni iVakadinadina Yadua,” Ensign se Liaona, Nove. 2006, 37–39

Dallin H. Oaks, “iVakadinadina,” Ensign se Liaona, Me 2008, 26–29

“Dau Wasea na iVakadinadina,” Vunautaka na Noqu Kosipeli(2004), 225–226

Vidio: “A Man without Eloquence,” “Testimony of Thomas S. Monson”

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veigauna (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone mera wasea na gauna a vaqaqacotaki kina na nodra ivakadinadina ena dua na gauna lekaleka sa oti.
Kerei ira na itabagone mera raitayalotaka ni ra sureta e dua na itokani ki lotu ena Sigatabu ni lolo, ka veisureti kina o bisopi mera mai wasea na nodra ivakadinadina o ira na lewenilotu ena tabanalevu. Na cava beka era na kaya ke taroga o nodra itokani, “Na cava na kena ibalebale mo cavuta na nomu ivakadinadina?” Ke rawa, mera raica na itabagone na wase ena ulutaga “Cavuta Vakawasoma na Nomu iVakadinadina” in Teaching in the Savior’s Way, tabana e 11, se vosa nei Elder Dallin H. Oaks “iVakadinadina.”

Vulica vata

Na itaviqaravi yadua e ra ena vukei ira na itabagone mera kila vakavinaka na ibalebale ni kena cavuti na ivakadinadina. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

Sureti ira na itabagone mera wilika na wase ena ulutaga “Na Cava na iVakadinadina?” mai na vosa nei Peresitedi Dieter F. Uchtdorf “Na Kaukauwa ni iVakadinadina Yadua.” Kerei ira na itabagone mera vola e dua na lisi me baleta na cava na ivakadinadina kei na ivakadinadina e sega ni yavutaki mai na veika era wilika. Sureti ira mera wasea na veigauna eso era rogoca kina e dua a cavuta na nona ivakadinadina ka vaqaqacotaka na nodra vakabauta kei na ivakadinadina.
Sureti ira na itabagone mera wilika na wase II ni nona vosa o Elder Dallin H. Oaks “iVakadinadina,” mera raica kina na veika e tautauvata kei na kena e duidui kina na ivakadinadina kei na mataqali kila-ka tale eso. Na cava era rawa ni cakava na itabagone mera vaqaqacotaka kina na nodra kila-ka baleta na dina ni kosipeli?
Sureti ira na itabagone mera raica ena ivolanikalou na ivakaraitaki eso ni nodra cavuta eso na nodra ivakadinadina (me vakataka na kena sa vakaturi tiko ena ituvatuva oqo). Ni ra wasea na veika era sa raica rawa, vakayaloqaqataki ira mera veivosakitaka na sala duidui eso era rawa ni cavuta kina na nodra ivakadinadina (oka kina na kena gauna vakadonui kei na gauna tale eso). Sarava na vidio “Testimony of Thomas S. Monson.” Kerei ira na itabagone mera wasea na ka era vulica mai vei Peresitedi Monson me baleta na cavuti ni ivakadinadina.
Sureti ira na itabagone mera wilika na “Dau Wasea na iVakadinadina” ka vakacavara na itaviqaravi veitokoni ni vuli yadua ena Vunautaka na Noqu Kosipeli, draunipepa 225– 226. Kerei ira mera wasea ki na kalasi na veika era sa vakararamataki kina. Era na vakayagataka vakacava na veika era sa vulica ena nodra soli ivakadinadina e tarava (me vakataka ena soqoni ni lotu se veivosaki kei na dua na itokani)?
Vakaraitaka na vidio “A Man without Eloquence.” Kerei ira na itabagone mera wasea na gauna a tara kina na yalodra mai na nona ivakadinadina rawarawa mai vuniyalona e dua tale. Na veika cava mai na ivakadinadina o ya a tara na yalodra?

Kerei ira na itabagone mera wasea na veika era sa vulica nikua. Era sa kila vakavinaka beka na sala mera cavuta kina na ivakadinadina? Na cava era sa bau vakila se vakanananu kina? E tiko tale beka eso na nodra taro? Ena yaga beka me na tauri vakalevu cake na gauna ena ulutaga oqo?

Me Veivuke ena Veivakavulici

“E dau kaukauwa sara na ivakadinadina ke me lekaleka ga, dodonu ka me coka sara tikoga na uto ni ivakadinadina” Veituberi, Me iLutua ni Noda Bula [1999], 49).

Veisureti mera bulataka

Sureti ira na itabagone mera vakasaqara na madigi eso mera cavuta kina na nodra ivakadinadina— ena gauna vakadonui kei na veigauna tale eso— ena macawa mai oqo. Kerei ira mera wasea na veika era sa sotava ena kalasi e tarava.

Vakayaloqaqataki ira na itabagone mera vola na nodra ivakadinadina ena nodra ivolaniveisiga.