Au na bula rawati au vakayalo vakacava?

E bibi na bula rawati keda vakayalo ki na noda tiko vinaka tawamudu. Ni da sa bula rawati keda rawa vakayalo, sa na sega ni vakatau ki na nodra ivakadinadina e so tale na noda ivakadinadina. Eda na lakova ga na noda ilakolako yadudua vakayalo ena noda masumasu e veisiga, vulici ni ivolanikalou, ka vakakina ena vakabauti Jisu Karisito. Eda vuki yani vua na Tamada Vakalomalagi me baleta na Nona veivuke ena sotavi ni veika dredre eda dau sotava. Eda na rawa talega ni vukei ira tale yani eso ena nodra gauna ni dredre vakayalo.

Mo vakarautaki iko vakayalo

Na cava o sa vakayacora mo bula rawati iko vakayalo vakalevu cake kina? O a sa vakalougatataki oti beka vakacava ena nomu bula rawati iko vakayalo?

Na cava era rawa ni ra vakayacora na itabagone mera vakatorocaketaka kina na nodra bula rawati ira vakayalo? Ena yaga vakacava vei ira na itabagone na nodra bula rawati ira vakayalo vakalevu cake?

Vulica ena masumasu na ivolanikalou kei na ivurevure tale eso. Na cava ena vukei ira na itabagone mera kila vinaka kina na bibi ni bula rawati koya vakayalo?

Maciu 25:1–13 (Na vosa vakatautauvata ni goneyalewa e lewe tini)

Momani 9:27 (Meda cakacakataka vakaikeda na noda vakabulai)

Moronai 10:3–5 (Eda na rawa ni kila vakaikeda na dina)

V&V 58:26–28 (Eda sa noda mata vakaikeda ena vakayacori ni veika dodonu)

V&V 130:18–19 (Na gugumatua kei na talairawarawa ena vakavuna meda kilaka ka vuku)

Dean M. Davies, “Na Veivakalougatataki ni Sokalou,” Ensign se Liaona, Nove. 2016, 93–95

Dieter F. Uchtdorf, “Na Kaukauwa ni iVakadinadina Yadua,” Ensignse Liaona, Nove. 2006, 37–39

Jörg Klebingat, “Vakanamata ki na iDabedabe Vakatui ni Kalou ena Yalodei,” Ensign se Liaona, Nove. 2014, 34–37

David A. Bednar, “Saumaki vua na Turaga,” Ensign se Liaona, Nove 2012, 106–9

Vidio: “They That Are Wise”; raica talega na Doctrine and Covenants and Church History Visual Resource DVD

Veivakavulici ena ivakarau ni iVakabula

A veivakabauti vei ira na Nona tisaipeli na iVakabula, ka solia vei ira na itavi me ra veivakavulici, veivakalougatataki, ka qaravi ira na tani. Ena rawa ni o vakarautaki ira vakacava na itabagone mera vakavulici ira tale eso ena ka era sa vulica?

Vidio: “Know and Love Us”

Sarava eso tale

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

• Sureti ira na itabagone mera wasea e dua na ka era se qai vakayacora walega mera vakayacora kina na ka era se qai vulica ga ena Matawilivola ni Sigatabu ena nodra vulica vakaiira na kosipeli.

• Kerea e dua na lewe ni kalasi me wilika na parakaravu ena itekivu ni lesoni oqo, ka qai vakauqeti ira na vo ni lewe ni kalasi mera rogoca na isau ni taro ni “Na cava na bula rawati koya vakayalo?” Solia vei ira na lewe ni kalasi e vica na miniti mera vola kina na nodra isau ni taro, ka qai laivi ira na lewe ni kalasi mera wasea na nodra isau ni taro.

Vulica vata

Raica eso tale na vakasama ni vuli kei na veivakavulici.

Na veitavi qaravi e ra sa rawa ni vukei ira na itabagone me ra vulica mera bula rawati ira vakayalo vakalevu cake. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

• Tarogi ira na itabagone baleta na nodra nanuma ena ibalebale ni sokalou vua na Kalou, ka vola nodra isaunitaro ena vava ni volavola. Na veika vakayalo cava beka era sa sotava ena mataqali sokalou vaka oqo? Sureti ira na itabagone me ra vakasaqara ena vosa nei Bisopi Dean M. Davies “Na Veivakalougatataki ni Sokalou,” na kena ibalebale na sokalou vakaidina vua na Kalou kei na veivakalougatataki eda rawata ni da sokalou. Ena vukei keda vakacava me da bula rawati keda vakayalo na veivakalougatataki eda rawata mai na sokalou vakaidina?

• Digia eso na taro mai na imatai ni parakaravu ni vosa nei Elder Jörg Klebingat “Vakanamata ki na iDabedabe Vakatui ni Kalou ena Yalodei,” ka sureti ira na itabagone me ra sauma vuni na taro. Kerei ira yadua na itabagone me vulica e dua vei ira na ono na vakatutu nei Elder Klebingat ka vakamacalataka vei ira na vo ni kalasi na ivakarau e rawa ni vukei ira kina me ra bula rawati ira vakayalo.

• Sureti ira yadua na itabagone me wilika e dua na ivolanikalou e vakatututaki tiko ena itukutuku oqo. Ni oti nomu solia vei ira na itabagone na gauna mera wilika kina na veitikina oqo, wasewasei ira yarurua ka sureti ira mera veitarotarogi, ka taroga na veitaro vakaoqo: Na cava e tukuna tiko na ivolanikalou o sa wilika? Na cava o sa vulica rawa me baleta na bula rawati keda vakayalo e tukuni tiko ena veitikina oqo? Na cava o sa vakauqeti mo vakayacora ena vuku ni ka o sa wilika? Solia vei ira na itabagone na madigi mera veitarotarogi vakaiira ena kalasi.

• Kerei ira na itabagone me ra wilika mai na iwasewase ka kena ulutaga “Eda na Rawata Vakacava e Dua na iVakadinadina?” mai na vosa nei Peresitedi Dieter F. Uchtdorf “Na Mana ni iVakadinadina Yadua.” Na cava e bibi kina me na dui tiko na noda ivakadinadina vakaikeda? Sureti ira na itabagone mera wasea na sala era rawata rawa kina na nodra dui ivakadinadina me baleta na dina va-kosipeli. Vakadinadinataka na veivakalougatataki sa nomu ni o sa rawata na nomu ivakadinadina. Me tiki ni veivosaki oqo, sa rawa mo wasea na itukutuku oqo mai vei Peresitedi Thomas S. Monson: “Me rawa ni da tudei ka vorata rawa na idre kece ka dreti keda tiko ki na veiyasana cala se domo kece ka vakauqeti keda tiko ki na veivanua cala, sa dodonu me tiko na noda ivakaidinadina vakaikeda. Se ko yabaki 12 se 112—se dua na vanua e loma—sa rawa mo kila vakaiiko ni dina na Kosipeli i Jisu Karisito” (“Bolea Mo Tu Taudua,” Ensign se Liaona, Nove. 2011, 62). Na cava e so tale na ka e rawa ni ra vakayacora na itabagone mera bula rawati ira kina vakayalo?

• Sureti ira na itabagone me ra wilika na Maciu 25:1–13, se vakaraitaka na vidio “They That Are Wise.” Na cava era sa vulica na itabagone me baleta na bula rawati keda vakayalo mai na italanoa vakatautauvata oqo? Me tiki ni veivosaki oqo, sureti ira na itabagone mera wilika na iwase ka kena ulutaga tiko na “iVakadinadina, Saumaki, kei na Vosa Vakatautauvata ni Gone Yalewa e Lewe Tini” mai na vosa nei Elder David A. Bednar “Saumaki Vua na Turaga.” ” Na cava mera vakayacora na itabagone mera vakalevutaka kina na waiwai ni nodra cina?

Kerei ira na itabagone me ra wasea na veika era sa vulica nikua. Era sa kila deivaki li na sala mera bula rawati ira vakayalo kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Kila matau eso ni vuli kosipeli

Vakamacalataki Vakalekaleka. Ena imatai ni itaviqaravi ena iwase oqo, era sa kerei kina na itabagone mera vola e dua na ivakaleka ni ka era sa wilika ena dua na vosa ni koniferedi. Oqo ena vukei ira mera vakadeitaka ni ra sa kila vinaka na itukutuku ena vosa. Era na sureti talega mera vakayagataka na itukutuku ena nodra bula; era na rawa ni vakayacora oqo ena nodra taroga na taro me vakaoqo “Na cava e vinakata vei au na Turaga meu vulica ena vosa oqo?” Vakauqeti ira na itabagone mera dau vakayacora oqo ena gauna taucoko era vulica kina e dua na vosa ni koniferedi.

Veisureti me caka

Raica eso tale na vakasama ni vuli kei na veivakavulici.

Tarogi ira na itabagone, se cava era sa vakauqeti me ra cakava me baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala eso e rawa ni o talemuria.