Meu kila beka vakacava na ivakatakarakara e vakayagataki me vakavulici kina na iKarua ni Lesu Mai?

Ni dau vakavuvulitaka na iVakabula kei ira Nona italai me baleta na iKarua ni Lesu Mai, era dau vakayagataka vakalevu na ivakatakarakara kei na italanoa vakaibalebale. Eda rawa ni vakatitobutaka na noda kila na veika a yaco ni bera tiko na iKarua ni Lesu Mai ni da vulica me da vakaibalebaletaka na ivakatakarakara eso oqo.

Mo vakarautaki iko vakayalo

Na ivakatakarakara kei na italanoa vakaibalebale cava mai na ivolanikalou e rawa ni vukei iko mo kila vakavinaka cake na iKarua ni Lesu Mai? Sa vukei iko vakacava na veivakatautauvatataki oqo mo vakavakarau kina ki na nona lesu mai na iVakabula?

Na ivakatakarakara kei na italanoa vakaibalebale cava beka ni iKarua ni Lesu Mai era na taleitaka na itabagone o vakavulica? O na vukei ira beka vakacava me ra kila na kena vakataucokotaki na veiparofisai oqo ena vuravura vakavolivoliti ira?

Vulica ena masumasu na veiivolanikalou kei na ivurevure oqo. Na cava ena vukei ira na itabagone me ra kila na ivakatakarakara kei na italanoa vakaibalebale e veiwekani kei na iKarua ni Lesu Mai?

Maciu 13:24–30; V&V 86:1–7 (Na italanoa vakaibalebale ni sila vinaka kei na sila ca)

1 Cesalonaika 5:2–8; 2 Pita 3:10–14; V&V 106:4–5; Josefa Simici—Maciu 1:46–48 (Ena yaco na iKarua ni Lesu Mai me vaka na daubutako ena bogi)

Maciu 25:1–13; V&V 45:56–57; 63:54 (Na italanoa vakaibalebale ni tini na goneyalewa)

V&V 45:34–39; Josefa Simici—Maciu 1:38–39 (Na italanoa vakaibalebale ni vuniolive)

Josefa Simici—Maciu 1:49–54 (Na iKarua ni Lesu Mai e vakatauvatani kei na dua na turaga ni sikovi ira yani na nona tamata cakacaka yalodina kei na tamata cakacaka yaloca)

Dallin H. Oaks, “Vakavakarau ki na iKarua ni Lesu Mai,” Ensign se Liaona, Me 2004, 7–10

Vidio: “They That Are Wise”, “Be Not Troubled”

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Tukuna vei ira na itabagone mera cakava e dua na ituvatuva ni dina vakosipeli era sa vulica tiko ka veivosakitaka na kedra veisemati.

Vulica vata

Na itaviqaravi yadua e ra ena vukei ira na itabagone me ra kila na ivakatakarakara ka vakayagataki me vakavuvulitaki kina na iKarua ni Lesu Mai. Ni vakamuri na veivakauqeti ni Yalo Tabu, digitaka ga e dua se rua ena ganita na nomu kalasi:

Sureti ira na itabagone me ra wilika na ivolanikalou ena ituvatuva oqo ka vakamacalataka na italanoa vakatautauvata ni tini na goneyalewa (se vakaraitaka na vidio “They That Are Wise”). Kerei ira na itabagone me ra vola e rua na iyatu ena dua na draunipepa ka vakayacana ena “iTalanoa Vakatautauvata ni Tini na Goneyalewa” kei na “iKarua ni Lesu Mai” ka qai vakasamataka na ivakatautauvata e cakava na iVakabula. Sureti ira na itabagone me ra vola eso na lewe ni italanoa ena imatai ni iyatu, me vaka na goneyalewa vuku, na Tagane sa qai vakawati, kei na waiwai, ka vola ena ikarua ni iyatu na veika e matatataki ena veika oqo me baleta na iKarua ni Lesu Mai. Kevaka era gadreva me ra vukei, wasea vei ira “Na iTalanoa Vakatautauvata ni Tini na Goneyalewa ” (Ensign, Maji 2009, 48–49; se Liaona, Maji 2009, 20–21). Veivosakitaka vata kei ira na veika era sa vulica kei na veika era sa vakauqeti kina me ra cakava ni oti nodra vulica na italanoa vakatautauvata oqo.
Kerei ira na itabagone yadua me ra wilika na idusidusi vakaivolanikalou ena ituvatuva oqo ka vakatauvatani kina na iKarua ni Lesu Mai nei Jisu Karisito ki na dua na daubutako ena bogi. Kerei ira na itabagone me ra veitalanoataka na veika era vulica me baleta na iKarua ni Lesu Mai. O cei ena vaka vua na daubutako na iKarua ni Lesu Mai? Na cava e tukuna na ivolanikalou ni rawa me da cakava me da vakarautaki keda kina? Sureti ira na itabagone me ra vakasamataka eso na nodra ivakatautauvata ka rawa ni vakamacalataka na iKarua ni Lesu Mai ka wasea na ivakatautauvata oqo ki na kalasi.
Wilika vata vakalasi na Josefa Simici—Maciu 1:49–54. Kerei ira na itabagone me ra veivosakitaka na kedrau duidui na dauveiqaravi e rua oqo. Na sala cava era vaka kina na dauveiqaravi ca eso na tamata ena noda gauna oqo? Na cava beka eso na revurevu ca ni nodrau ivalavala na dauveiqaravi? Kerei ira na itabagone me ra digitaka e dua vei ira na ivolanikalou ena ivakamacala e ra ni tikina ka wilika. Sureti ira me ra wasea eso tale na ikuri ni vakasama era vulica me baleta na ivakatautauvata mai na nodra wilika na ikuri eso ni ivolanikalou oqo.
Kerei ira na itabagone me raitayaloyalotaka ni dua na nodra itokani e vakaraitaka na nona rerevaka na veika ena yaco mada ni bera na iKarua ni Lesu Mai. Na cava era na kaya vua na nodra itokani me solia vua na vakacegu? Vakaraitaka na vidio “Be Not Troubled,” ka kerei ira na itabagone me ra vola eso tale na ka e rawa ni ra wasea kei koya na nodra itokani, oka kina na ivolanikalou. Sureti ira na itabagone me ra vakayagataka na veika era sa vulica me ra matanataka kina nodra vakaceguya e dua na nodra itokani ka leqataka tiko me baleta na iKarua ni Lesu Mai.
Kerea na veimama ni kalasi me ra wilika na iwasewase III ni vosa nei Elder Dallin H. Oaks “Vakavakarau ki na iKarua ni Lesu Mai,” ka kerea na ikarua ni veimama me ra wilika na iwasewase IV. Kerei ira me ra raica ka wasea na ivakatakarakara e veiwekani ki na iKarua ni Lesu Mai ka vakaibalebaletaka tiko o Elder Oaks. Na cava e rawa ni ra matataka na ivakatakarakara oqo? Solia na gauna vei ira na itabagone me ra vola na nodra isaunitaro ki na veitaro oqo a taroga o Elder Oaks: “Vakacava kevaka sa siga ni Nona lako mai ni mataka? … Na cava eda na cakava nikua? Na vakatutusa cava beka eda na cakava? Na ivalavala cava beka eda sa na muduka? Na akaude cava beka eda sa na sogota? Na veivosoti cava beka eda na vakayacora? Na ivakadinadina cava beka eda na wasea?” (” Ensign se Liaona, Me 2004, 9).

Kerei ira na itabagone me ra wasea na veika era sa vulica nikua. Na cava era sa bau vakila se vakauqeti kina? Era sa kila beka na italanoa vakaibalebale kei na ivakatakarakara me baleta na iKarua ni Lesu Mai? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Kilai vakavinaka ni ivakatakarakara. Ni gadrevi me kilai vakavinaka na vosa vakatautauvata kei na ivakatakarakara ena ivolanikalou, e gadrevi kina vei ira na itabagone mera rawa ni kila na ivakatakarakara, kila na veitiki ni ivakatakarakara oqo, ka vakadewataki ira. E dua na sala me kilai kina na ivakatakarakara oqo o ya me ra laurai na vosa vakaoqo vaka, vakataki, vakataka na, me vaka se vaka tu o ya. Oti me ra qai cakava na itabagone e dua na ituvatuva me baleta na veitiki ni ivakatakarakara (me vaka na waiwai, cina, goneyalewa, kei na Tagane sa qai vakawati). Ni gadrevi me vakadewataki na ivakatakarakara, sa rawa mera raica na ivurevure tale eso ni Lotu (me vakataka na mekasini ni Lotu, vosa ni koniferedi, kei na ivolanikalou tale eso) ka raica na kena rawa ni vukei ira na ivakatakarakara mera kila vakavinaka kina e dua na ivakavuvuli ni kosipeli. Vakayaloqaqataki ira mera cakava oqo ena gauna era sotava kina e dua na vosa vakatautauvata se ivakatakarakara ni ra dui vulica tiko na nodra ivolanikalou.

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Na madigi cava beka e tu vei ira na itabagone me ra vakavulici ira eso tale me baleta na ivakatakarakara ni iKarua ni Lesu Mai?