E rawa vakacava meu vakayagataka na italanoa me ra vakavulici kina eso tale me baleta na matabete?

Na italanoa e rawa me vakatorocaketaka noda veivakavulici ka uqeta nodra taleitaka o ira eda vakavulica.Na italanoa e vakarautaka vei keda na ivakaraitaki ni yalododonu ka matanataka na veivakalougatataki ka lako mai na muria na ivakavuvuli i Jisu Karisito. E vuqa sara na italanoa ena ivolanikalou, ena nodra vosa na parofita bula, vaka kina mai na noda bula vakai keda ka rawa ni da vakayagataka ena noda vakavulici ira eso tale ena veika me baleta na matabete.

Mo vakarautaki iko vakayalo

Na cava o sotava ka sa vaqaqacotaka nomu ivakadinadina ni matabete? Na italanoa cava soti mai na ivolanikalou kei na nodra vosa na parofita bula e vukea nomu kila na kaukauwa ni matabete?

Na veika cava soti era sa sotava vata o ira na itabagone kei na matabete? Na italanoa cava soti me baleta na matabete ena vukea na vaqaqacotaki ni nodra ivakadinadina?

Vulica ena masumasu na veiivolanikalou kei na veiivurevure oqo. Na cava ena vukei ira na itabagone me ra kila na kena vakayagataki na italanoa me vakavulici ira eso tale ena veika me baleta na matabete?

Luke 10:1 (Na i Vakabula e lesi ira na vitusagavulu)

Cakacaka 3:1–9 (O Pita e vakabula e dua sa lokiloki)

Cakacaka 8:14–24 (Tovolea o Saimoni me volia na matabete ena ilavo)

3 Nifai 18:1–9 (O Jisu e qarava na sakaramede)

Dieter F. Uchtdorf, “Ena Keda iTuvaki Dina,” Ensign se Liaona, Me 2015, 80–83

David A. Bednar, “Na Kaukauwa ga Vakalomalagi,” Ensign seLiaona, Me 2012, 48–51

L. Tom Perry, “Na Matabete i Eroni,” Ensign se Liaona, Nove. 2010, 91–94.

Vidio: “Sanctify Yourselves,” “A Wartime Miracle”

4:38

3:21

Veivakavulici ena ivakarau ni Turaga

Na i Vakabula a wasea na italanoa rawarawa, vosa vakatautauvata, kei na ivakaraitaki dina ni bula ka vakaibalebale kivei ira a vakavulica o Koya. Na italanoa cava e rawa mo wasea vata kei ira na itabagone me vukei ira ena nodra kila na mana ni matabete? Na italanoa cava era kila na itabagone ni na vukei ira me ra vakavulici ira tale eso ena veika me baleta na matabete?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira me ra raica na kena yaga na kosipeli ena nodra bula ni veisiga? Na veivakasama ka koto oqo e ra ena rawa ni vukei iko:

Sureti ira na itabagone me ra wasea nodra vakayagataka vakacava na veika era vulica ena nodra vuli vakayadua, vuli vakamatavuvale, semineri, se so tale na kalasi ena Lotu.
Kerei ira na itabagone me ra wasea na veika era sotava ka sa vaqaqacotaka nodra ivakadinadina ni matabete. Vakasamataka nomu wasea e dua na ka o sotava vakai iko. Tarogi ira na itabagone se cava na vuna na kena wasei na italanoa sa ikoya e dua na ivakarau vinaka me ra vakavulici eso tale na veika me baleta na matabete.

Vulica vata

Na veiitaviqaravi yadua e koto e ra ena vukei ira na itabagone me ra kila na kena vakayagataki na italanoa me ra vakavulici kina eso tale ena veika me baleta na matabete. Ni vakamuri na veivakauqeti ni Yalo Tabu, digitaka ga na kena o kila ni na ganita na nomu kalasi:

Sureti ira na itabagone me ra raitayaloyalotaka ni ra sa kerei me ra vosa ena veika me baleta na matabete ena soqoni ni sakaramede. Kerei ira me ra vakasaqara e dua na italanoa ena ivolanikalou ka vakavulica na veika me baleta na matabete ka rawa me ra okata ena nodra vosa (me vaka na ivakaraitaki ni veivakabulai se qaravi ni cakacaka vakalotu). Kevaka e gadrevi, e rawa me ra vakaibalebaletaka ki na ivolanikalou e vakatututaki ena ituvatuva oqo. Vakayaloqaqataki ira me ra tukuna na italanoa era kunea ki na vo ni kalasi ka vakamacalataka na ka e vakavulica vei keda na italanoa me baleta na matabete ka rawa vakacava me ra vakayagataka ena nodra vosa.
Lesi ira yadua na itabagone me ra wilika e dua na italanoa me baleta na matabete mai na koniferedi raraba (me vaka na italanoa me baleta na veikorokoro nei Potemkin ena vosa nei Peresitedi Dieter F. Uchtdorf “Ena Keda iTuvaki Dina,” na italanoa me baleta na tamai Elder David A. Bednar ena vosa nei Elder Bednar “Na Kaukauwa ni Lomalagi,” se na italanoa mai na nona ivakadinadina e dua na dauvakasala ena Matabete i Eroni ena vosa nei Elder L. Tom Perry “Na Matabete i Eroni”). Kerei ira na itabagone me ra vakalekalekataka na italanoa era wilika ka vakamacalataka na cava e vakavulica baleta na matabete. Na madigi cava e rawa me tu vei ira na itabagone me ra vakavulici ira eso tale ena veika me baleta na matabete ena kena vakayagataki na italanoa oqo?
Vakaraitaka e dua se ruarua na vidio ka vakatututaki ena ivola oqo. Tarogi ira na itabagone se cava e vakavulica vei keda na italanoa ena veika me baleta na matabete. Sureti ira na itabagone me ra wasea na vidio vata kei na dua tale era kila ni rawa me vaqaqacotaki mai na itukutuku. Vakayaloqaqataki ira me ra vakatututaka na ivakarau e rawa kina me ra wasea na vidio vata kei na dua na itokani se lewe ni matavuvale, ka solia na madigi vei ira na itabagone me ra wasea na veika era sotava ena dua na kalasi mai muri.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era kila li na kena rawa ni vakayagataki na italanoa ena nodra vakavulici eso tale ena veika me baleta na matabete? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Kunea na ivakavuvuli. Na ivakavuvuli e dua na dina tawamudu ka na dusimaki kina na noda ivalavala. Ena so na gauna e dau tukuni vakamatata sara na ivakavuvuli ena ivolanikalou se ena nodra vosa na parofita, ena so tale na gauna era dau vakaibalebaletaki ena italanoa se ivakaraitaki. Ena imatai ni itaviqaravi ena iwasewase oqo, era sureti kina na itabagone me ra raica e dua na italanoa ka vakaraitaka na ivakavuvuli e baleta na matabete. Vukei ira me ra vulica na ivakarau me ra raica kina na ivakavuvuli eso oqo ena nodra taroga na taro me vaka: “Na cava beka au vulica mai na ivolanikalou oqo ka vukei au ena noqu kila na ivakavuvuli oqo? E dua beka na ka eke e vakavulici au ena ivakarau meu vaka cake kina na iVakabula?” Vakayaloqaqataki ira me ra raica na ivakavuvuli ena nodra vulica vakataki ira se vakamatavuvale na kosipeli.

Veisureti me caka

Tarogi ira na itabagone se cava era sa vakauqeti kina mera cakava baleta na ka era sa vulica nikua. Vakayaloqaqataki ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika e rawa mo na cakava.