Ena vukei au vakacava na vakarautaki ni takete meu bula rawati au kina?

Ena rawa ni vukei keda na veitakete kei na vakavakarau vakamatau ena noda rawata na cakacaka sa vakarautaka tu vei keda na Turaga. Na noda vakarautaka na takete me baleta na noda bula e tiki bibi sara ni noda yaco meda bula rawati keda vakaikeda. E levu cake sara mai na noda diva ka tatadra wale tu ga. Me vaka a vakavulica o Peresitedi Thomas S. Monson: “Na diva wale tu ga ena sega ni yaco kina. E namaka na Turaga na noda vakasamataka. E namaka na noda cakacaka. E namaka na noda sasaga. E namaka na noda ivakadinadina. E namaka meda Yalodina” (“Ki na Veivueti,” Ensign se Liaona, Me 2001, 49). Ni da navunavu ena yalomasumasu ka cakacaka vagumatua meda rawata rawa na noda takete, ena vakagumatuataki keda vakalevu cake na Turaga ka vukei keda meda yacova na ka eda rawa ni rawata.

Mo vakarautaki iko vakayalo

Na veitakete cava soti o sa tuvalaka me baleti iko ena nomu bula? Na cava o a vakayacora mo rawati ira kina? Sa vukea vakacava na nomu bula rawati iko vakalevu cake na nomu rawati ira na veitakete oqori?

Na veitakete cava soti o sa kila ni ra sa vakarautaka tiko na itabagone? O na rawa ni vakauqeti ira vakacava mera dau vakarautaka na veitakete vivinaka?

Vulica ena masumasu na ivolanikalou kei na ivurevure tale eso. Na cava ena vukei ira na itabagone mera vulica kina na bibi ni vakarautaki ni veitakete mera bula rawati ira rawa kina?

1 Tui 18:21; Maciu 6:24 (Eda na sega ni rawa ni qarava e rua na turaga)

Filipai 3:13–14 (Eda rawa ni guta yani na noda veitakete ka qai kakavaki yani ki liu vei ira)

2 Nifai 32:9 (Sa dodonu meda dau vakasaqara na veidusimaki ni Turaga ena veika kece sara eda vakayacora)

Alama 34:32–33 (Na bula oqo sa gauna ni vakavakarau meda sotava kina na Kalou)

V&V 58:27–29 (Sa dodonu meda dau guta ni cakava na veika vinaka)

M. Russell Ballard, “Lesu ka Ciqoma,” Ensign se Liaona, Me 2017, 62–65

Quentin L. Cook, “Na Cakacaka ni iVakatawa—e dua na Veivakabauti Tabu,” Ensign kei na Liaona, Nove. 2014, 46--49.

L.Tom Perry, “Toso ki na Veta-e-Cake,”Ensign se Liaona, Nove. 2007, 46–49

“iWalewale ni Vakarautaki ni Takete,” Vunautaka na Noqu Kosipeli (2004), 164

Vidio: “A Work in Progress”

Veivakavulici ena ivakarau ni iVakabula

Na Turaga e lomani ira e vakavulica. E kila na veika era taleitaka, inuinui, kei na gagadre kei na veika e yaco tiko ena nodra bula. Na cava o rawa ni vakayacora mo kauwaitaka tiko kina na veika era maleleta ka gadreva na itabagone o vakavulici ira tiko? Na sala ena veivakauqeti kina oqo ki na ivakarau ni nomu veivakavulici?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone mera wasea e so na ka se qai yaco wale vei ira ka vakaraitaka e dua na dina va-kosipeli se qai vulica tiko.
Wasea kei ira na itabagone e so na takete o sa vakarautaka me baleti iko ena nomu bula. Okata ruarua kina na takete ni gauna balavu vakakina na kena e leleka. Vakamacalataka se cava o nanuma mo vakarautaka kina na veitakete oqori, na veika o vakayacora mo rawati ira kina, kei na veisala era sa vakalougatataka kina na nomu bula na nomu sasaga. Vakauqeti ira na itabagone mera wasea talega na veika vata oqori ka sa yaco talega vei ira.

Vulica vata

Na veitaviqaravi e ra ena rawa ni vukei ira na itabagone mera bula rawati ira vakalevu cake ena nodra vulica ka vakarautaka na nodra takete vakaiira. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na itabagone mera wasea na nodra inaki era sa biuta tu baleta ira. Na cava e vukei ira me ra na rawata kina na nodra inaki? Tarogi ira na itabagone me ra wilika na imatai ni tini parakaravu ni vosa nei Elder M. Russell Ballard “Lesu ka Ciqoma” ka tuva ena papanivolavola na vei vakasala e solia me baleta na nomu vakarautaki ni naki. Me vukei na nodra vakarautaka na nodra inaki vakayalo na itabagone, me ra wase ena rua na iwasewase. Sureta e dua na ilawalawa mera wilika na “Na Matavuvale: A iVakaro ki Vuravura Raraba” na ilawalawa ka tarava me wilika na “Se Bula Na Karisito: Nodra iVakadinadina na Kuoramu le Tinikarua.” Na ilawalawa yadua me ra raica na itukutuku volai ena rawa ni vukei ira ena nodra vakarautaka na nodra inaki ka vaka tabakidua ena nodra saga mera vakai Jisu Karisito kei na nona kosipeli bula.
Lesia e veimama na kalasi mera wilika na italanoa nei Peresitedi Dieter F. Uchtdorf me baleta na vulici ni Vosa Vakavalagi, ka lesia na veimama kadua mera wilika na italanoa nei Elder L. Tom Perry me baleta na nona vakatovotovotaka tiko o luvena tagane na lade (mai na nona vosa “Laveti Cake ni iTagede”). Kerei ira na itabagone mera vakalekalekataka na nodra italanoa lesi me baleti ira na vo ni kalasi ka qai vakamacalataka na veika era vulica mai na italanoa me baleta na vakarautaki ni takete. Sureti ira mera wasea na mataqali italanoa vata oqo mai na nodra dui bula. Era na vakayacora vakacava na ka era sa vulica mai na italanoa oqo me ra mana cake kina vakalevu ena vakarautaki kei na rawati ni veitakete?
Taroga vei ira na itabagone e so na nodra takete vakakina se cava e bibi kina me tu na nodra takete. Sureti ira mera wilika na “iWalewale ni Vakarautaki ni Takete” ena Vunautaka na Noqu Kosipeli (tabana e 164), vaqara na vuni kena bibi na takete, ka qai kerei ira mera wase na veika era sa kunea rawa. Ena veivakadonui nei bisopi, sureti ira na daukaulotu tudei se dua na daukaulotu se qai suka ga mai ena bibi ni navuci ni veitakete ena cakacaka ni kaulotu. Na sala cava ena vukei ira kina na itabagone me ra daukaulotu vinaka cake na nodra vulica ena gauna oqo na vakarautaki ni takete? Navuca mo sureti ira na vo ni lewe ni tabanalevu mera veivosakitaka vata kei ira na itabagone na bibi ni vakarautaki ni takete ena veitagede tale eso ni bula.
Sureti ira na itabagone mera vola na veitakete era sa cakava tu me baleti ira. Taleva kei ira na itabagone na idusidusi ni vakarautaki ni takete ena tabana e 164 ni Vunautaka na Noqu Kosipeli. Evei vei ira na idusidusi oqo ena vukei ira na itabagone mera rawata na veitakete era sa vola tu? Sureti ira mera digia e dua mai na nodra takete ka vola na sala me vakayagataki kina na veidusidusi oqo ena nodra rawata na veitakete oqo. Sureta e vica vei ira me ra wasea na veika era sa vola.
Kerei ira na itabagone mera wilika na Vunau kei na Veiyalayalati 58:27–29, ka sureti ira mera lisitaka na veitakete era na via vakadavora ka na vukea “mera vakaitavitaki ira vagumatua ena inaki vinaka” ka “vakayaco veika dodonu.” Vakauqeti ira mera wasea na nodra lisi kei na dua tale na lewe ni kalasi ka vakamacalataka na ka era sa vakayacora tiko se rawa ni vakayacora oqo mera rawata kina na takete oqori. Sureti ira mera wilika na ikuri ni ivolanikalou ka vakaturi tiko ena idusidusi oqo ka wasea na vakasama era rawata mai na ivolanikalou me baleta na navuci ni takete.
Vakaraitaka na vidio “A Work in Progress,” ka qai solia vei ira na itabagone e vica na miniti mera vola kina na veika era sa vulica mai na vidio ena vakarautaki kei na rawati ni veitakete. Sureti ira mera wasea ena kalasi na nodra nanuma. Na cava a digitaka kina o Tyler me tomana na nona takete me kaulotu, dina ga ni na vakaleqa na nona takete ni qito basiketepolo? (Me tiki ni veivosaki oqo, o na via wilika beka na 1 Tui 18:21 kei na Maciu 6:24.) Kerei ira na itabagone mera vakasamataka e dua na ka era dau taleitaka vakalevu sara. A sa yaco mada me ra digitaka na ka oya mai na dua tale na takete yaga cake sara? Na cava era vulica rawa mai na ivakaraitaki nei Tyler?

Kerei ira na itabagone me ra wasea na veika era sa vulica nikua. Era sa kila deivaki li na iwalewale ni nodra vakarautaki takete vakaiira? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava me baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala eso e rawa ni o talemuria.