Veiitaviqaravi ni Veisemati

Na veiitaviqaravi oqo e rawa ni:

Vukei ira na itabagone mera semata vata na veika era vulica tiko e vale, e valenilotu, ena semineri, kei na veika era sotakaya ena veisiga ni nodra bula.
Vakatakila na ivunau era na vulica tiko na itabagone ena kalasi

Sa rawa mera vakaitavitaki ira vakaiira na itabagone ena veiitaviqaravi oqo, vakailawalawa lalai, se vakalasi. Mo nanuma ni na vakalasikati vei iko na vakasama uasivi ena nomu kauwaitaka tiko na nodra gagadre na itabagone o vakatavulica.

Vukei ira na itabagone mera semata vata na veika era vulica tiko e vale, e valenilotu, kei na vanua tale eso.

Cakava e dua na ituvatuva ni dina

Tukuna vei ira na itabagone mera cakava e dua na ituvatuva ni dina vakosipeli era sa vulica tiko ka veivosakitaka na kedra veisemati.

Vola e dua na vosa se malanivosa

Kerei ira na itabagone mera wasea e dua na vosa se malanivosa ka umani vata kina e dua na ka era se qai vulica wale tikoga.

Wasea e dua na ivolanikalou

Sureti ira na itabagone mera wasea e dua na ivolanikalou era se qai vulica wale tikoga ka tukuna na ka era a vulica mai kina.

Wasea e dua na ka a sotavi vakavuli

Tukuna vei ira na itabagone mera wasea e dua na ka era sotakaya ka ra vulica kina e dua na ivunau ni kosipeli ena sala vakasakiti.

Wasea e dua na ka a sotavi vakadauniveivakatavulici

Tukuna vei ira na itabagone mera wasea na ka era a sotakaya wale tikoga oqo ena vakatavulici ni kosipeli. Na cava era nanuma ni a lako vinaka? Na cava era vinakata mera vakavinakataka?

Wasea e dua na kena ivakaraitaki

Sureti ira na itabagone mera wasea na sala cava era sa bulataka tiko kina na veika era sa vulica.

Mo dau taro

Sureti ira na itabagone mera vakataroga na veika me baleta e dua na ivunau era vulica tiko.

Wasea na veitaro

Sureti ira na itabagone mera wasea na veitaro era vakatarogi kina me baleta na Lotu se na kena ivakavuvuli kei na sala cava era na sauma kina.

Vakatakila na ivunau ka ra na vulica tiko na itabagone ena kalasi

Vakaraica na ivunau ena ivolanikalou

Sureti ira na itabagone mera vakaraica e dua na tikina ena ivolanikalou ka vakatavulica na ivunau ni lesoni.

Taroga e dua na taro

Sureti ira na na itabagone mera sauma lesu e dua na taro me baleta na ivunau.

Lagata e dua na serenilotu

Sureti ira na itabagone mera lagata e dua na serenilotu ka semati ki na ivunau.

Sauma na taro ena ulutaga ni lesoni

Vola ena vava ni volavola na taro ena ulutaga ni lesoni, ka sureti ira na itabagone mera vakasamataka vagumatua na iwalewale era na sauma kina.

Matanataka

Kerei ira na itabagone mera matanataka e dua na ituvaki ka a tarogi ira kina e dua na tamata me baleta na ivunau. Era na sauma vakacava?

Vakamacalataka na ka o kila

Tukuna vei ira na lewenikalasi mera vakamacalataka na ka era kila me baleta na ivunau.

Vida vakaiwasewase na ivunau

Vida vakaiwasewase na ivunau, ka lesia na itabagone duidui mera vakamacalataka na ibalebale ni veiwasewase.

Vakamacalataka e dua na iyaloyalo se iyaya ni veivakatavulici

Vakaraitaka vei ira na itabagone e dua na iyaloyalo se iyaya ni veivakatavulici ka semati ki na ivunau ni macawa oqo, ka tukuna vei ira mera vakamacalataka.

Droinitaka e dua na iyaloyalo

Sureti ira na itabagone mera droinitaka e dua na iyaloyalo ka vakatakarakarataka na ka era kila deivaki me baleta na ivunau o na veivosakitaka tiko.

Vakaraica ka wasea na ivolanikalou

Kerei ira na itabagone mera vakaraica e dua na ivolanikalou ka vukea na saumi ni taro ena ulutaga ni lesoni.

Umana vata na ka o kila

Sureti ira na itabagone mera umana vata ena vica ga na vosa se malanivosa na cava era kila se ra sa sotava oti me baleta na ivunau.

Vakadidike tawakilai

Vota vei ira na lewenikalasi e dua na vakadidike lekaleka tawakilai ka vaqaqa na lomadra se veika era sa sotava oti ka semati ki na ivunau.

Kilakila Mada

Vota vei ira na itabagone e dua na kilakila mada lekaleka me raici kina na cava era sa kila oti tu me baleta na ivunau.

Cakava e dua na tuvavosa

Kerei ira na itabagone mera vakananuma na vosa ka semati ki na ivunau era na veivosakitaka. Na vosa se malanivosa cava e tiko kina na nodra vakatataro?