Veiitaviqaravi ni Vuli Vata

Na veiitaviqaravi oqo ena rawa ni vukei ira na itabagone mera:

• Vakasaqaqara ena ivolanikalou kei na vosa ni parofita ka vakasamataka na kedra ibalebale.

• Raica na veiivakaraitaki ni ivunau o wasea tiko.

• Wasea vata kei ira tale eso na nodra vakasama kei na nodra nanuma me baleta na ivunau.

Sa rawa mera vakaitavitaki ira vakaiira na itabagone ena veiitaviqaravi oqo, vakailawalawa lalai, se vakalasi se kuoramu. Mo nanuma ni na vakalasikati vei iko na vakasama uasivi ena nomu kauwaitaka tiko na nodra gagadre na itabagone o vakatavulica.

Vakasaqara na ivolanikalou kei na vosa ni parofita ka vakasamataka na kedra ibalebale.

Vakaraica na isau ki na veitaro

Sureti ira na itabagone mera vakaraica na isau ni nomu taro se vakatataro e tiko vei ira me baleta na ivunau ka wasea na ka era kunea.

Vakaraica na veivosa kei na malanivosa

Sureti ira na itabagone mera vakaraica na veivosa, malanivosa kei na ivakaraitaki eso ka vukei ira mera kila deivaki na ivunau.

Umana vata ena vica ga na vosa

Kerei ira na itabagone mera umana vata e dua na ivolanikalou se itukutuku mai vua e dua na parofita ena vica ga na vosa.

Tuvatuvanaki

Kerei ira na itabagone mera cakava e dua na ituvatuva ni veipoidi bibi era vulica me baleta na ivunau mai na ivolanikalou se vosa ni parofita. Sureti ira mera wasea na veika era kunea.

Vakatauvatani ni veitikina

Solia eso na iyavuduri ni ivolanikalou kei na itukutuku lekaleka vei ira na itabagone ka umani kina na veitiki ni ivolanikalou e vakavulici. Kerei ira mera wilika na ivolanikalou ka vakatauvatana yadua vata kei na kena ivakaleka ni itukutuku.

Vakatauvatana e dua na iyaloyalo

Kerei ira na itabagone mera vakatauvatana na veiyaloyalo ki na veitiki ni ivolanikalou. Sureti ira mera wasea na raiyawa era rawata mai na veitikina kei na iyaloyalo.

Vakacuruma na veivosa lutu

Vola e dua na itukutuku ka lutu kina ena so na vosa ena vava ni volavola. Sureti ira na itabagone mera vakaraica na vosa se malanivosa mai na ivolanikalou ka rawa ni vakacavara na itukutuku.

Vakatauvatana eso na ivakaraitaki

Sureti ira na itabagone mera wilika e rua se levu tale na italanoa se tikina mai na ivolanikalou ka vakatauvatana na cava era vakatavulica me baleta na ivunau.

Droinitaka e dua na iyaloyalo

Sureti ira na itabagone mera droinitaka e dua na iyaloyalo ni cava era a wilika ena ivolanikalou kei na vosa ni parofita.

Vakaraica a dua na ivolanikalou

Sureti ira na itabagone mera vakaraica e dua na tikina ni ivolanikalou me baleta na ivunau ka wasea na kena ibalebale.

Semati ni ivolanikalou veiganiti

Vukei ira na itabagone mera cakava e dua na ituvatuva ni ivolanikalou ka semati ki na ivunau, mera wiliki ira, ka vola na yavuduri ena iyatu ni ivolanikalou e baleta.

Vakaraica ka lagata na serenilotu

Sureti ira na itabagone mera vakaraica na serenilotu me baleta na ivunau ka lagati ira vakatautauvata.

Raica na ivakaraitaki ni ivunau kei na ivakavuvuli o vakatavulica tiko.

Vakatarogi ira tale eso

Tukuna vei ira na itabagone mera vakatarogi ira tale eso me baleta na veika era sa sotava oti mai na ivunau.

Raica na ivakaraitaki ena ivolanikalou

Sureti ira na itabagone mera wilika se vakarogoca me baleta eso na tamata ena ivolanikalou ka ra a bulataka na ivunau.

Raica na ivakaraitaki ni so tale na Yalododonu Edaidai

Sureti ira na itabagone mera wilika se vakarogoca me baleta eso tale na Yalododonu Edaidai ka ra a bulataka na ivunau.

Wasea na ivakaraitaki

Wasea na nomu ivakaraitaki ni tamata ka ra bulataka na ivunau, ka tukuna vei ira na itabagone mera wasea na nodra ivakaraitaki.

Veivosakitaka e dua na italanoa

Sureti ira na itabagone mera vakamacalataka se a vakatauvatanitaki vakacava e dua na italanoa (mai na ivolanikalou se vosa ni parofita) ki na ivunau.

Raitayaloyalo

Tukuna vei ira na itabagone mera raitayaloyalotaka e dua na tamata ka bulataka tiko na ivunau.

Matanataka

Sureti ira na itabagone mera matanataka se vakasamataka e dua na ituvaki ka vakaraitaka na ivunau.

Sarava na media

Sureti ira na itabagone mera raica na media vakarautaki ni Lotu (me vaka na DVD se iyaloyalo vakavidio ena LDS.org).

Rogoca e dua na mataveivosaki

Sureta eso na vulagi vakadonui mera saumitaro se veitalanoataka kei ira na itabagone e dua na ulutaga.

Vakarorogo vua na vulagi dokai

Sureta e dua na vulagi dokai vakadonui me veitalanoataka na ivunau.

Wasea vata kei ira tale eso na nodra vakasama kei na vakanananu me baleta na ivunau.

Vakarautaka e dua na vosa

Kerei ira na itabagone mera vakavakarau ni talaucaka e dua na vosa me baleta na ivunau.

Vakatavulica na lesoni

Sureta e dua na lewenikalasi se kuoramu me vakatavulica e dua na tiki ni lesoni.

Vakatavulica e dua tale na kalasi

Kerei ira na itabagone mera vakarautaka e dua na lesoni lekaleka me baleta na ivunau ka vakatavulica ki na dua tale na kalasi (me vaka na veivakadonui i bisopi).

Vakatavulica e dua na tamata

Vukei ira na itabagone mera vakasamataka eso na iwalewale me baleta na nodra rawa ni vakatavulica na ivunau ki vua tale e dua.

Vakadinadinataka na ivunau

Sureti ira na lewenikalasi se kuoramu mera wasea na nodra ivakadinadina ni ivunau.

Volavola me baleta na ivunau

Kerei ira na lewenikalasi mera vola na ka era sa vulica se na nodra nanuma kei na veika era vakila me baleta na ivunau.

Vakamacalataka na kena ibalebale

Tarogi ira na itabagone se cava na ibalebale ni ivunau vei ira.

Veitalanoataka na taro

Sureti ira na itabagone mera veitalanoataka na taro me baleta na ibalebale kei na bibi ni ivunau.

Mo dau taro

Kerei ira na itabagone mera vakasamataka na ivunau ka taroga na veitaro e baleta. Mera qai sauma vakatautauvata.

Vakamacalataka e dua na iyaloyalo se iyaya ni veivakatavulici

Sureti ira na itabagone mera vakamacalataka se a vakaraitaka vakacava na ivunau e dua na iyaloyalo se iyaya ni veivakatavulici.

Droinitaka e dua na iyaloyalo

Kerei ira na itabagone mera droinitaka e dua na iyaloyalo se dayakaramu se cakava e dua na ivolakabi ka vakaraitaka na ivunau.

Wasea e dua na ka sa sotavi oti mai na Torocake Yadudua se iTavi vua na Kalou

Sureti ira na itabagone mera wasea se vakatavulica e dua na ka era sa cakava oti ena iTavi vua na Kalou kei na Torocake Yadudua ka semati ki na ivunau.