Veiitaviqaravi me Vulici Vata

Na veiitaviqaravi oqo e rawa ni vukei ira na itabagone mera:

• Vakasaqaqaraena ivolanikalou kei na vosa ni parofita ka vakasamataka na kedra ibalebale.

• Raica na ivakaraitaki ni ivunau o wasea tiko.

• Wasea vata kei ira tale eso na nodra vakasama kei na vakanananu me baleta na ivunau.

Sa rawa mera vakaitavitaki ira vakaiira na itabagone ena veiitaviqaravi oqo, vakailawalawa lalai, se vakalasi. Mo nanuma ni na vakalasikati vei iko na vakasama uasivi ena nomu kauwaitaka tiko na nodra gagadre na itabagone o vakatavulica.

Vakasaqara na ivolanikalou kei na vosa ni parofita ka vakasamataka na kedra ibalebale

Vakaraica na isau ni taro

Sureti ira na itabagone mera vakaraica na isau ni nomu taro se vakatataro e tiko vei ira me baleta na ivunau ka veivosakitaka na ka era kunea.

Vakaraica na veivosa kei na malanivosa

Sureti ira na itabagone mera vakaraica na veivosa, malanivosa, kei na ivakaraitaki eso ka vukei ira mera kila deivaki kina na ivunau.

Umana vata ena vica ga na vosa

Tukuna vei ira na itabagone mera umana vata e dua na ivolanikalou se itukutuku mai vua e dua na parofita ena vica ga na vosa.

Cakava e dua na ituvatuva

Kerei ira na itabagone mera cakava e dua na ituvatuva ni veipoidi bibi era vulica me baleta na ivunau mai na ivolanikalou se vosa ni parofita. Sureti ira mera wasea na veika era kunea.

Vakatauvatani ni veitikina

Solia eso na iyavuduri ni ivolanikalou vei ira na itabagone kei na itukutuku lekaleka ka umana vata na cava e vakatavulica na veitiki ni ivolanikalou. Kerei ira mera wilika na ivolanikalou ka vakatauvatana yadua vata kei na itukutuku umani.

Vakatauvatana e dua na iyaloyalo

Kerei ira na itabagone mera vakatauvatana na veiyaloyalo ki na veitiki ni ivolanikalou. Sureti ira mera wasea na raiyawa era rawata mai na veitikina kei na iyaloyalo.

Vakacuruma na veivosa lutu

Vola e dua na itukutuku ka lutu kina eso na vosa ena vava ni volavola. Sureta ira na itabagone mera vakaraica na vosa se malanivosa mai na ivolanikalou ka rawa ni vakacavara na itukutuku.

Vakatauvatana eso na ivakaraitaki

Sureti ira na itabagone mera wilika e rua se levu tale na italanoa se tikina mai na ivolanikalou ka vakatauvatana na ka era vakatavulica me baleta na ivunau.

Droinitaka e dua na iyaloyalo

Sureti ira na itabagone mera droinitaka e dua na iyaloyalo ni cava era a wilika ena ivolanikalou kei na vosa ni parofita.

Vakaraica e dua na ivolanikalou

Sureti ira na itabagone mera vakaraica e dua na tikina ni ivolanikalou me baleta na ivunau ka wasea na kena ibalebale.

Semati ni ivolanikalou veiganiti

Vukei ira na itabagone mera cakava e dua na ituvatuva ni ivolanikalou ka semati ki na ivunau, mera wiliki ira, ka vola na vosa veiganiti ena iyatu ni ivolanikalou e baleta.

Vakaraica ka lagata na serenilotu

Sureti ira na itabagone mera vakaraica na serenilotu me baleta na ivunau ka lagati ira vakatautauvata.

Raica na ivakaraitaki ni ivunau o vakatavulica tiko.

Vakatarogi ira tale eso

Tukuna vei ira na itabagone mera vakatarogi ira tale eso me baleta na veika era sa sotava oti mai na ivunau.

Raica na ivakaraitaki ena ivolanikalou

Sureti ira na itabagone mera wilika se vakarogoca me baleta eso na tamata ena ivolanikalou ka ra bulataka na ivunau.

Raica eso tale na ivakaraitaki ni Yalododonu Edaidai

Sureti ira na itabagone mera wilika se vakarogoca me baleta eso tale na Yalododonu Edaidai ka rabulataka na ivunau.

Wasea na ivakaraitaki

Wasea na nomu ivakaraitaki ni tamata ka ra bulataka na ivunau, ka kerei ira na itabagone mera wasea na nodra ivakaraitaki.

Veivosakitaka e dua na italanoa

Sureti ira na itabagone mera vakamacalataka se a vakatauvatanitaki vakacava e dua na italanoa (mai na ivolanikalou se vosa ni parofita) ki na ivunau.

Raitayaloyalo

Kerei ira na itabagone mera raitayaloyalotaka e dua na tamata ka bulataka tiko na ivunau.

Matanataka

Sureti ira na itabagone mera matanataka se vakasamataka e dua na ituvaki ka vakaraitaka na ivunau.

Sarava na media

Sureti ira na itabagone mera raica na media vakarautaki ni Lotu (me vaka na DVD se iyaloyalo vakavidio ena LDS.org).

Rogoca e dua na mataveivosaki

Sureta eso na vulagi vakadonui mera saumitaro se veivosakitaka vata na kalasi e dua na ulutaga.

Vakarorogo ki na vulagi dokai

Sureta e dua na vulagi dokai vakadonui me veivosakitaka na ivunau.

Wasea vata kei ira tale eso na nodra vakasama kei na vakanananu me baleta na ivunau.

Vakarautaka e dua na vosa

Kerei ira na itabagone mera vakavakarau ni talaucaka e dua na vosa me baleta na ivunau.

Vakatavulica na lesoni

Sureta e dua na lewenikalasi me vakatavulica e dua na tiki ni lesoni.

Vakatavulica e dua tale na kalasi

Tukuna vei ira na itabagone mera vakarautaka e dua na lesoni lekaleka me baleta na ivunau ka vakatavulica ki na dua tale na kalasi (me vaka na veivakadonui i bisopi).

Vakatavulica e dua na tamata

Vukei ira na itabagone mera vakasamataka eso na iwalewale me baleta na nodra rawa ni vakatavulica na ivunau ki vua tale e dua.

Vakadinadinataka na ivunau

Sureta na lewenikalasi mera wasea na nodra ivakadinadina me baleta na ivunau.

Vola me baleta na ivunau

Tukuna vei ira na lewenikalasi mera vola na ka era sa vulica se na nodra nanuma kei na veika era vakila me baleta na ivunau.

Vakamacalataka na kena ibalebale

Tarogi ira na itabagone se cava na ibalebale ni ivunau vei ira.

Veivosakitaka na veitaro

Sureti ira na itabagone mera veivosakitaka na veitaro me baleta na ibalebale kei na bibi ni ivunau.

Mo dau taro

Tukuna vei ira na itabagone mera vakasamataka na ivunau ka taroga na veitaro e baleta. Mera qai sauma vakatautauvata.

Vakamacalataka e dua na iyaloyalo se iyaya ni veivakatavulici

Sureti ira na itabagone mera vakamacalataka se vakaraitaka vakacava na ivunau e dua na iyaloyalo se iyaya ni veivakatavulici.

Droinitaka e dua na iyaloyalo

Kerei ira na itabagone mera droinitaka e dua na iyaloyalo se dayakaramu se cakava e dua na ivolakabi ka vakaraitaka na ivunau.

Wasea e dua na ka sa sotavi oti mai na Torocake Yadudua se iTavi vua na Kalou

Sureti ira na itabagone mera wasea se vakatavulica e dua na ka era sa cakava oti ena iTavi vua na Kalou kei na Torocake Yadudua ka semati ki na ivunau.