Veiitaviqaravi me Vakatakila na iVunau

Na itaviqaravi oqo e rawa ni:

Vukei ira na itabagone mera railesuva na ivunau era a vulica ena lesoni sa oti ka vakadeitaka ni sa taudonu na nodra kila-ka.
Vakatakila na ivunau ka ra na vulica tiko na itabagone ena soqoni ni kalasi se kuoramu.

Sa rawa mera vakaitavitaki ira vakaiira na itabagone ena veiitaviqaravi oqo, vakailawalawa lalai, se vakalasi se kuoramu. Mo nanuma ni na vakalasikati vei iko na vakasama uasivi ena nomu kauwaitaka tiko na nodra gagadre na itabagone o vakatavulica.

Vukea na itabagone mera railesuva na ivunau, ka vakadeitaka ni sa taudonu na nodra kila-ka

Wasea na ka o nanuma

Mera qai wasea na itabagone na ka era nanuma se vulica mai na lesoni ena macawa sa oti.

Vola e dua na itukutuku ena vava ni volavola

Sureti ira na itabagone mera vola ena vava ni volavola e dua na itukutuku lekaleka ni ka era sa vulica.

Droinitaka na cava o vulica

Sureti ira na itabagone mera droinitaka e dua na iyaloyalo ni cava era sa vulica.

Na cava a vakurabuitaki iko?

Sureta e vica na itabagone mera wasea se cava a vakurabuitaki ira me baleta na lesoni.

Vakalekalekataka ena dua na vosa se iyatuvosa

Sureti ira na itabagone mera vakalekalekataka ena dua na vosa se iyatuvosa na ka era sa vulica.

Vakatauvatana ki na dua na iyaya ni veivakatavulici, se iyaloyalo

Vakaraitaka e dua na iyaya ni veivakatavulici se iyaloyalo ki na itabagone, ka taroga se semati vakacava ki na lesoni sa oti.

Wasea na ivakavuvuli

Wasea na ka o a cakava me bulataki kina na ka a vakatavulici ena macawa sa oti. Sureti ira na itabagone mera wasea na cava era a cakava.

Mo dau taro

Kerei ira na itabagone mera sauma na taro ka a wasei ena lesoni ni macawa sa oti.

Wasea na ivolanikalou

Sureti ira na itabagone merawasea e dua na ivolanikalou ka ra nanuma rawa mai na lesoni ni macawa sa oti.

Vakatavulica na ka o kila

Kerei ira na itabagone mera vakatavulica e dua tale na lewenikalasi se kuoramu ena cava era nanuma rawa me baleta na ivunau ka vakatavulici ena macawa sa oti.

Vakamacalataka e dua na malanivosa

Vola ena vava ni volavola e dua na malanivosa mai na lesoni ni macawa sa oti, ka tukuna vei ira na itabagone mera vakamacalataka.

Vakatakila na ivunau era na vulica tiko na itabagone ena soqoni vakalasi se kuoramu

Vakaraica na ivunau ena ivolanikalou

Sureti ira na itabagone mera raica e dua na tikina mai na ivolanikalou ka vakatavuvulitaka na ivunau ni lesoni.

Taroga e dua na taro

Sureti ira na itabagone mera sauma e dua na taro me baleta na ivunau.

Lagata e dua na serenilotu

Sureti ira na itabagone mera lagata e dua na serenilotu ka semati ki na ivunau.

Sauma na taro ena ulutaga ni lesoni

Vola ena vava ni volavola na taro ena ulutaga ni lesoni, ka sureti ira na itabagone mera vakasamataka vagumatua na iwalewale ni nodra sauma.

Matanataka

Kerei ira na itabagone mera matanataka e dua na ituvaki ka a tarogi ira kina e dua na tamata me baleta na ivunau. Era na sauma vakacava?

Vakamacalataka na ka o kila

Tukuna vei ira na lewenikalasi mera vakamacalataka na cava era kila me baleta na ivunau.

Vida vakaiwasewase na ivunau

Vida vakaiwasewase na ivunau, ka lesia na itabagone duidui mera vakamacalataka na ibalebale ni veiwasewase.

Vakamacalataka e dua na iyaloyalo se iyaya ni veivakatavulici

Vakaraitaka vua na itabagone e dua na iyaloyalo se iyaya ni veivakatavulici ka semati ki na lesoni ena macawa oqo, ka tukuna vei ira mera vakamacalataka.

Droinitaka e dua na iyaloyalo

Sureti ira na itabagone mera droinitaka e dua na iyaloyalo ka matataka na veika era kila deivaki me baleta na ivunau o na veivosakitaka.

Vakaraica ka wasea na ivolanikalou

Kerei ira na itabagone mera vakaraica e dua na ivolanikalou ka vukea na saumi ni taro ena ulutaga ni lesoni.

Umana vata na ka o kila

Sureti ira na itabagone mera umana vata ena vica ga na vosa se malanivosa na ka era kila se ra sa sotava oti me baleta na ivunau.

Vakadidike tawakilai

Vota vei ira na itabagone e dua na vakadidike lekaleka tawakilai ka vaqaqa na lomadra se veika era sa sotava oti ka semati ki na ivunau.

Kilakila Mada

Vota vei ira na itabagone e dua na kilakila mada lekaleka me raici kina na ka era sa kila oti tu me baleta na ivunau.

Tuvatuva na vosa

Tukuna vei ira na itabagone mera vakananuma na vosa ka semati ki na ivunau era na veivosakitaka tiko. Na vosa se malanivosa cava e tiko kina na nodra vakatataro?