E rawa vakacava meu vakayagataka na nodra vosa na parofita bula kei ira na iapositolo me vakaukauwataka noqu vakabauta ena Veisorovaki i Jisu Karisito?

Valenivola

Me vakataki ira na parofita ena gauna e liu, o ira na parofita kei na iapositolo nikua era vakadinadinataki Jisu Karisito ka sureti keda kece meda vakaivotavota ena Nona Veisorovaki. Era vakatokai mera “ivakadinadina uasivi” nei Jisu Karisito. Na Yalo Tabu e wasea na ivakadinadina ena gauna e vakadinadinataki Karisito kina na parofita bula kei ira na iapositolo, ka da sa vakalougatataki ena noda bulataka me vaka na nodra ivakavuvuli.

Mo vakarautaki iko vakayalo

E sa vakaukauwataka vakacava nomu vakabauti Jisu Karisito na nodra vosa na parofita bula kei ira na iapositolo? Na vosa cava, ivola, se itukutuku mai vei ira na parofita kei na iapositolo e sa vukea nomu kilai Koya vakavinaka cake?

Na vosa cava ni koniferedi walega oqo ena vukea na vakaukauwataki ni nodra vakabauti Jisu Karisito na itabagone? E rawa vakacava mo vakayaloqaqataki ira na itabagone mera vakasaqara nodra vosa na parofita bula ka mera bulataka?

Ena nomu masumasu ena vulici ni nodra vosa na parofita kei ira na iapositolo, na cava o vakila me na vakaukauwataka nodra vakabuta na itabagone o vakavulica?

Jekope 7:11–12; Mosaia 13:33–35; 15:11–12 (O ira kece na parofita era vakadinadinataki Jisu Karisito)

V&V 27:12; 107:23 (O ira na iApositolo era ivakadinadina uasivi nei Jisu Karisito)

V&V 76:22–24 (iVakadinadina i Josefa Simici baleti Jisu Karisito)

Bible Dictionary, “Apositolo”

David A. Bednar, “Kacivi me ra Tukuna Yani na Yacaqu,” Ensign se Liaona, Nove. 2015, 128–31

Jeffrey R. Holland, “Lewa Dodonu, Loloma,” Ensign se Liaona, Me 2015, 104–6

Quentin L. Cook, “Eda Muri Jisu Karisito,” Ensign se Liaona, Me 2010, 83–86

“Se Bula Na Karisito: Nodra iVakadinadina Na Kuoramu Le Tinikarua,” Ensign se Liaona, Epe. 2000, 2–3

Vidio: “Lifting Burdens”

Veivakavulici ena ivakarau ni Turaga

O Jisu e kilai ira a vakavulica o Koya ka kila nodra yaco mera vakataki cei. A kunea na ivakarau kilai tani me vukei ira mera vuli ka tubu. Na veika o sotava e rawa mo vukei ira kina na itabagone mera taukena ka na vakauqeti ira mera vakabibitaka ka nanuma na nodra vosa na parofita bula kei ira na iapositolo?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa me vukei iko:

Kerei ira na itabagone mera wasea na veika era qai vulica wale ga oqo se na veika era sotava ena veivakavulici ena taudaku ni kalasi.
Sureti ira na itabagone mera wilika na icurucuru “iApositolo” ena iDusidusi ki na iVolanikalou ka vakasaqara na malanivosa e vakamacalataka na itavi ni dua na iApositolo. Vakalasi, vakasaqara ka wilika na ivolanikalou (me vaka era vakatututaki tu ena idusidusi oqo) ka vakaraitaka ni o ira na parofita kei na iapositolo era ivakadinadina uasivi i Jisu Karisito. Na cava e vakurabuitaki ira na itabagone me baleta na ivolanikalou oqo?

Vulica vata

Na itaviqaravi yadua e koto qori e ra e rawa me vukei ira na itabagone mera kila se rawa vakacava me vakaukauwataka nodra vakabauti Jisu Karisito na nodra vosa na parofita bula kei ira na iapositolo. Muria na veidusimaki ni Yalotabu ena nomu digitaka e dua se sivia ka na ganita na nomu kalasi:

Vakarautaka vei ira na lewe ni kalasi na ilavelave ni iwasewase ka kena ulutaga “Dua na iKuri ni Lesoni” mai na vosa nei Elder David A. Bednar “Kacivi me ra Tukuna Yani na Yacaqu.” Sureti ira me ra digitaka ka wasea e dua na vosacavuti mai vua e dua na parofita ni gauna oqo se iapositolo ka vukei ira me ra kila na Veisorovaki ni iVakabula. Ni ra wasea na taro era raica, vakayaloqaqataki ira me ra tuvalaka na sala e rawa ni ra wasea kina na nodra nanuma kei na dua era kila, me vaka ena ivola, ena dua na teks, se ni vakabiri ena media ni bula veimaliwai.
Vakalasi, railesuva na vosa ni koniferedi raraba wale ga oqo, vakasaqara tiko na vanua era veivakavulici se vakadinadinataki Jisu Karisito kina kei na Nona Veisorovaki o ira na lewe ni Mataveiliutaki Taumada kei na Kuoramu ni Le Tinikarua (e rawa mo vakayagataka na ituvatuva vakamatanivola ni ulutaga ena koniferedi raraba ena ilavelave ni Ensign se Liaona). Na cava e vakurabuitaki ira na itabagone me baleta na nodra ivakadinadina na parofita kei na iapositolo? Vakasamataka nomu wasea na kena vakaukauwataki iko vakacava na ivakadinadina oqo ena nomu vakabauta vakai iko na i Vakabula.
Ena papa ni volavolavola, vola, “Na Veisorovaki i Jisu Karisito.” Solia ki na lewe ni kalasi e dua na ilavelave ni dua vei rau na vosa nei Elder Jeffery R Holland “Lewa Dodonu, Loloma” se na vosa nei Elder Quentin L. Cook “Eda Muri Jisu Karisito.” Kerei ira na itabagone me vola e dua na ituvatuva ni veika era sa vulica me baleta na Veisorovaki ni iVakabula mai na vosa oqori. Sureti ira me ra vola ena papa e dua na iyatuvosa me vakalekalekataka na veika era kunea ka tarogi ira yadua na itabagone na vuna e kunea kina ni vakaibalebale vakalevu sara na ivakavuvuli oya.
Vakaraitaka e dua se sivia na vidio ka vakatututaki tiko ena idusidusi oqo, se kerei ira na lewe ni kalasi mera vakaitavi ena kena wiliki na tiki ni “Se Bula na Karisito: Nodra iVakadinadina na Kuoramu Le Tinikarua.” Sureti ira na itabagone mera rogoca se vakasaqara na itukutuku me vakaukauwataka na nodra vakabauti Jisu Karisito. Vakauqeti ira na itabagone mera wasea na kena rawa vakacava me vakaukauwataka na itukutuku oqo na nodra vakabauta o ira na nodra itokani kei na lewe ni matavuvale.
Vakauqeti ira na itabagone mera cavuqaqataka e dua na malanivosa ka ra kunea ni vakaibalebale vakalevu ena “Se Bula na Karisito: Nodra iVakadinadina Na Kuoramu Le Tinikarua.” Tarogi ira na itabagone mera vola me baleta nodra vakabauti Jisu Karisito ena duidui vakacava kevaka e yali vei ira na nodra ivakavuvuli na parofita bula kei ira na iapositolo. Solia vei ira na gauna mera wasea na veika era vola.

Tarogi ira na itabagone mera wasea na veika era sa vulica nikua. Era kila li se rawa me na vakaukauwataka vakacava na nodra vakabauta ena Veisorovaki na nodra vosa na parofita bula? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“E rawa ni o vukei ira na nomu lewenikalasi me ra dei ena nodra vakaitavi tiko ena veivosaki vakalasi ni o sauma mai vakavinaka na [nodra vakasama]. Me kena ivakaraitaki oqo, o na vinakata beka mo na kaya, “Vinaka vakalevu na nomu isau ni taro. E dua na rai vinaka o ya’ … se ‘Oqori e dua na ivakaraitaki vinaka’ se ‘Au vakavinavinakataka na veika kece o tukuna mai edaidai’” (Na Veituberi, Me iLutua ni Noda Bula, [1999],74).

Veisureti mera bulataka

Sureti ira na itabagone mera wasea eso na veivakurabuitaki era sotava ena gauna ni kalasi. E vakaukauwataki vakacava na nodra vakabauti Jisu Karisito ena nodra vulica tiko na vosa ni parofita bula kei ira na iapositolo? E rawa vakacava mo vakayaloqaqataki ira mera cakacakataka na veika era vulica?
Wasea nomu ivakadinadina ni parofita bula kei na ira na iapositolo era ivakadinadina uasivi kei Karisito.