Meu na vakayagataka vakacava na sere kei na ivakatagi ni Lotu meu vulica kina na yavu ni veivakabulai?

E vakavulica na Mataveiliutaki Taumada: “Dau rogo vakawasoma tale ga na vosa momona e so ni vunau, mai na voqa ni sere ni lotu e so. Na sere ni lotu e saumakitaki keda meda veivutuni, me da caka vinaka, me vaqaqacotaka na noda ivakadinadina kei na vakabauta, mera tovaki kina na yalorarawa, mera vukei kina na lolosi, ka da tokoni tikoga meda dau vosota me yacova na ivakataotioti” (Sere ni Lotu, ix). E vuqa na ivakavuvuli ni kosipeli, oka kina na kena e baleta na yavu ni veivakabulai, era vakavulici vaqaqaco sara ena sere ni lotu kei na sere kei na ivakatagi tale eso ni Lotu.

Mo vakarautaki iko vakayalo

Na dina cava ni kosipeli o sa vulica mai na sere ni lotu kei na so tale na sere kei na ivakatagi ni Lotu? Sa vakauqeti iko vakacava na nomu ivakadinadina kei na vakabauta? Na veika cava o sotava sa vakavulica vei iko na kaukauwa ni sere kei na ivakatagi?

Sa veivakauqeti tiko vakacava na sere kei na ivakatagi ki na nodra bula na itabagone o vakavulica? O cei vei ira na itabagone e rawa ni vukei iko mo vakavulica e dua tale na itabagone me baleta na kaukauwa veilaveti ni sere kei na ivakatagi?

Vulica ena masumasu na ivolanikalou kei na ivurevure oqo. Na veivakauqeti cava o gadreva mo wasea vei ira na itabagone?

Kolosa 3:16 (Veivakavulici vakai kemudou ena sere ni lotu se sere kei na ivakatagi)

V&V 25:12 (Na nodra sere na yalododonu sa nodra masu vua na Turaga)

“iVakatagi kei na Danisi,” Me iSakisaki ni iTabagone (2011), 20–21

“iVakamacala ni Mataveiliutaki Taumada,” Sere ni lotu, ix–x

Veivakavulici ena ivakarau ni Turaga

Na iVakabula e vakabauti ira e vakavulica. E vakabauti ira tikoga, vakarautaki ira, ka solia vei ira na ilesilesi bibi ni veivakavulici, veivakalougatataki ka veiqaravi vei ira na tamata. Mo vakavulica vakacava vei ira na itabagone ni nomu veikacivi sa ivakadinadina ni sa vakabauti iko na iVakabula? Mo na vakaraitaka rawa vakacava vei ira na itabagone ni ko sa vakabauta tiko na nodra rawa ni veivakavulici?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea e dua na ka era vinakata mera tukuna vua e dua na itokani baleta na yavu ni veivakabulai. Na cava era rawa ni cakava mera vukea me vuli na itokani oqo?
Me wilika vata na kalasi na “iVakamacala ni Mataveiliutaki Taumada” ena ivola ni sere ni lotu (tabana e ix–x). Sureti ira na itabagone mera vola ena papa ni volavola na veika sa kerea vei keda na Mataveiliutaki Taumada meda cakava kei na veivakalougatataki e ratou yalataka.

Vulica vata

Na itaviqaravi yadua e ra ena vukei ira na itabagone mera vakayagataka na sere kei na ivakatagi ni Lotu mera vulica vakalevu cake kina na yavu ni veivakabulai. Mai na veivakauqeti ni Yalotabu, digitaka e dua se sivia ka na ganita na nomu kalasi:

Vakaraitaka vei ira na itabagone na ivakarau ni kena vakayagataki na ituvatuva vakaulutaga ni sere ni lotu se nodra sere na lalai mera raica kina na sere kei na ivakatagi e sema ki na yavu ni veivakabulai. Sureti ira yadua na itabagone mera digitaka e dua na sere ni lotu ka vulica na qaqana kei na kena isema ni ivolanikalou (e tiko ena boto ni sere yadua). Na veivakavukui cava era sa rawata me baleta tiko na yavu ni veivakabulai mai na qaqani sere ni lotu?
Kerei ira na itabagone mera wasea e dua na ka vakayalo era a sotava me baleta na sere kei na ivakatagi ni Lotu. Na cava e vakaibalebale cake kina vei ira na ka era sotava oqo? E na vukei iko vakacava na sere kei na ivakatagi mo vakavulica kina e dua tale na dina ni kosipeli?
Vola na ulutaga oqo ena papa ni volavola: “Bula Taumada,” “Bula Oqo,” kei na “Bula ni oti na Mate.” Sureti ira na itabagone mera lagata se vakarorogo ki na “I Tamaqu” ( Sere ni Lotu, naba 176). Kerei ira mera vakatakila na cava e vakavulica tiko na sere ni lotu oqo me baleta na tolu na ituvatuva ni yavu ni veivakabulai ka vola na veika era sa raica ena kena ulutaga donu e tiko ena papa ni volavola. Na veika cava tale era vulica mai na sere ni lotu oqo me baleta na yavu nei Tamada Vakalomalagi ena vukuda? Na sere ni lotu se nodra sere cava na lalai era vakasamataka rawa e vakavulica na yavu ni veivakabulai? Vakayaloqaqataki ira mera wasea na nodra nanuma kei na vakasama ena sala e rawa ni vakavulici keda kina na Yalotabu mai na sere kei na ivakatagi.

Kerei ira na itabagone mera wasea na veika era sa vulica nikua. Era sa kila vakavinaka tiko beka na sala mera vakayagataka kina na sere kei na ivakatagi ni Lotu mera vakavulica ka vulica kina na yavu ni veivakabulai? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Ni o vakarautaki ira na lewenikalasi me ra saumi taro, e na vinaka cake mo vakaraitaka vei ira ni bera ni wiliki se vakavulici e dua na ka ni o na kerea tiko na nodra vakasama ni oti na nomu vakamacala. Me kena ivakaraitaki oqo, e rawa ni o koya, ‘Ni vakarorogo mai niu wilika na tikina oqo mo ni qai solia mai na nomuni dui vakasama e na veika e vakauqeti kemuni’ se ‘Ni sa wiliki tiko na tiki ni ivolanikalou oqo, raica mada ke sa matata vei iko na ka e tukuna tiko na Turaga me baleta na vakabauta’” ( Veituberi, Me iLutua ni Noda Bula,[1999], 80).

Veisureti mera bulataka

Kerei ira na itabagone mera vakasamataka vakatitobu na veika era sa vulica nikua baleta na veivakavulici kei na vuli ena sere kei na ivakatagi. Na veika cava era sa vakauqeti mera cakava ena vuku ni ka era sa vulica? Na cava ena yaco mai na ka oqo ni ra vulica na kosipeli? na nodra nanuma baleta na sere kei na ivakatagi? na nodra madigi ni veivakavulici ena veisiga ni mataka?