Au na vakaraitaka vakacava na loloma vei ira au vakatavulica?
O Jisu Karisito a lomani ira e vakatavulica o Koya. E masulaki ira o Koya ka raica rawa na madigi eso me vakaraitaka kina na Nona loloma. Sa rawa ni da taracake na loloma me baleti ira eda vakatavulica ena noda masulaki ira ka qaravi ira. Ni ra vakila o ira eda vakatavulica tiko ni da lomani ira vakaidina, e vakamalumalumutaki na lomadra, ka ra tadolavi ira cake ki na dina eda vakatavulica tiko.
Mo vakarautaki iko vakayalo
O sa bau vakayarayarataki vakacava mai vua e dua na qasenivuli ka vakaraitaka na loloma vei iko? O sa taracake vakacava na loloma vei ira o vakatavulica?
Na cava soti na ituvaki ni Lotu ka tiko kina na madigi vei ira na itabagone mera veivakatavulici? Na gauna ni veivakatavulici cava tale e tiko vei ira ena nodra bula? Ena rawa vakacava ni vukei ira na itabagone mera qasenivuli vinaka cake na vulici ni loloma kivei ira era vakatavulica?
Vulica ena masumasu na veiivolanikalou kei na veiivurevure oqo. Na cava ena vukei ira na itabagone ni kila deivaki na bibi ni nodra lomani o ira era vakatavulica?
Joni 13:34 (Sa dodonu meda lomani ira tale eso me vaka sa lomani keda o Jisu Karisito)
Mosaia 28:1–3; Alama 17:21–39; 20:21–27 (Vakaraitaka o Amoni na loloma vei ira na Leimani ka vakatavulica tiko)
Moronai 7:45–46 (Eda sa tawayaga kevaka e sega na loloma)
Thomas S. Monson, “iVakaraitaki ni Qasenivuli Cecere,” Ensign, se –Liaona, June 2007, 74–80
Vidio: “Love Those You Teach”
Veivakavulici ena ivakarau ni iVakabula
O Jisu Karisito a lomani ira e vakatavulica. E dau masulaki ira ka dau qaravi ira vakawasoma. E rawa vakacava ni o vakaraitaka na nomu loloma kivei ira na itabagone o vakatavulica?
Semata vata
Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:
-
Sureta na itabagone mera wasea vata kei na dua tale na lewe ni kalasi e dua na ivolanikalou era se qai wilika wale tikoga ena nodra vuli vakaiira. E tu beka na nodra vakatataro me baleta na veika era vulica tiko?
-
Taroga na itabagone se iwalewale cava e rawa ni ra kila kina ni lomani ira e dua na qasenivuli. Cava na vuna e bibi kina me ivakaraitaki ni loloma e dua na qasenivuli? Era sa bau vakaraitaka mada na itabagone na loloma vua e dua era vakatavulica? Wilika na Joni 13:34, ka veivosakitaka na sala eso a vakaraitaka kina na iVakabula na nona loloma kivei ira e vakatavulica.
Vulica vata
Na itaviqaravi yadua oqo ena vukei ira na itabagone ni kila deivaki na iwalewale ni nodra lomani ira era vakatavulica ena sala va-Karisito. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:
-
Sureta na itabagone mera wilika na Moronai 7:45, vakatakila na vosa kei na malanivosa eso e vakayagataki me vakamacalataka e dua na tamata ka tu vua na loloma, ka vakamacalataka na ivalavala oqo ena nodra vosa (ke sa dodonu, vukei ira ni vakamatatataka eso na vosa matalia). Sureta yadua na itabagone me digitaka e dua vei ira na vosa se malanivosa oqo ka vakamacalataka se sala cava ena semati kina ki na veivakatavulici. Kerei ira mera vakasamataka eso na ituvaki ka ra a vakatavulica tiko kina eso tale—e valenilotu kei na so tale na gauna ni veivakatavulici (ena itikotiko, e koronivuli, kei na bula e veisiga). Na ivakarau cava soti ena Moronai 7:45 era na vinakata mera taracake me vukei ira ni yaco mera qasenivuli vinaka cake? Sureta e vica na gone me ra wasea na nodra nanuma.
-
Kerea na itabagone mera wilika na iwasewase ka vakatokai “It Is More Blessed to Give Than to Receive” ena vosa nei Peresitedi Thomas S. Monson “Examples of Great Teachers,” se vakaraitaka na vidio “Love Those You Teach.” Taroga na itabagone: Na cava era cakava na qasenivuli ena ivakaraitaki oqo me vakaraitaka na loloma vei ira era vakatavulica? Na madigi cava soti mera na vakatavulica na itabagone (ena vanua vakarautaki ni Lotu kei na gauna ni veivakatavulici eso)? Sureta na itabagone mera tuva na sala eso e rawa ni ra vakaraitaka kina na loloma vakaqasenivuli. Sureta e vica na itabagone mera wasea vata kei na kalasi na nodra ituvatuva.
5:0 -
Vakaraitaka e dua na iyaloyalo kei Amoni ni taqomaka tiko na qelenisipi nei Lamonai (iVola ni Yaloyalo Vakosipeli,78), ka sureta e dua na lewe ni kalasi me tukuna lesu na italanoa (raica na Alama 17:21–39). Kerea eso na itabagone mera wilika na Mosaia 28:1–3, ni qarai na isaunitaro eso ki na taro “Na cava a vakauqeti Amoni kei rau na tacina ni vinakata me vakatavulici na kosipeli kivei ira na Leimani?” Kerea na vo ni itabagone mera wilika na Alama 20:21–27, ni qarai na isaunitaro eso ki na taro “Na revurevu cava a vakavurea na loloma i Amoni kivua na tamai Tui Lamonai?” Sureti ira mera wasea na ka era kunea, ka kerei ira mera vakasamataka eso na ka matata e rawa ni ra cakava me vakamuri kina na ivakaraitaki nei Amoni.
Kerei ira na itabagone me ra wasea na veika era sa vulica nikua. Era sa kila deivaki li na iwalewale ni vakaraitaki loloma vei ira era vakatavulica? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?
Me Veivuke ena Veivakavulici
“E dua na cakacaka ni qasenivuli ni kosipeli oya na nodra vukei na lewenikalasi mera kila ka vakila talega na loloma ni Tamada Vakalomalagi. Na vosa duadua ena sega ni rawa ni vakayacora. E gadrevi me da tarai ira yadudua yani na tamata” (Veituberi, Me iLutua ni Noda Bula [1999], 39).
Vidio: “Applying Familiar Objects to Understand Gospel Truths”
Veisureti me caka
Vakayaloqaqataki ira na itabagone mera vakasamataki ira na tamata era vakatavulica. Sureti ira mera digitaka e dua na ka era na cakava me ivakaraitaki ni loloma vei ira na tamata oya.