Na sala cava e rawa ni'u yaco me'u qasenivuli vinaka kina?

Na veivakavulici mana e dua na tiki bibi ni kena tarai cake na matanitu ni Turaga, ka dau levu na noda madigi ni veivakavulici o keda kece. E dina beka ni na sega ni dua na noda ilesilesi ni veivakavulici eda kacivi kina, dau tu na madigi ni veivakavulici e vale vei ira noda neiba kei na noda itokani. E rawa ni da yaco me da qasenivuli vinaka cake ena noda dikeva vakadodonu sara na noda dui qaqa kei na malumalumu, vakasaqara ena yalomalumalumu na veivuke ni Turaga, ka segata vagumatua me vakatorocaketaki na noda kaukauwa kei na veika vinaka ka bibi sara ena veivakavulici ena kosipeli.

Mo vakarautaki iko vakayalo

O sa vakalougatataki beka vakacava mai vei ira na qasenivuli mana? Na cava o sa bau cakava mo qasenivuli vinaka cake kina?

Na madigi cava soti o sa vakarautaka vei ira na itabagone me ra veivakavulici? Na cava na nodra kaukauwa kei na nodra malumalumu vakaqasenivuli?

Vulica ena masumasu na veiivolanikalou kei na veiivurevure oqo. Na cava ena vukei ira na itabagone me ra kila na ivakarau me ra yaco me ra qasenivuli vinaka cake kina?

Ica 12:27 (Na Turaga ena vukei keda me yaco na qaqa mai na veika malumalumu eso)

V&V 42:14 (E dodonu me tiko vei keda na Yalo me da veivakavulici)

V&V 88:78 (Veivakavulici ena gugumatua)

Robert D. Hales, ““Lako Mai, Mo Muri Au” mo Vakayacora na Loloma kei na Veiqaravi sa va-Karisito,” Ensign se Liaona, Nove. 2016, 22–24

“iVakamacala Taumada: Veivakavulici ena iVakarau ni iVakabula,” Veivakavulici ena iVakarau ni iVakabula (2016), 4–5

Vakatorocaketaki ni Qasenivuli Vakarisito: Vakadidike Yadua,” Veivakavulici ena iVakarau ni iVakabula (2016), 37

David M. McConkie, “Veivakatavulici ena Kaukauwa kei na Lewa ni Kalou,” Ensign se Liaona, Nove. 2013

“Vakatavuvulitaka na Kosipeli,” Tudei ena Vakabauta (2004), 151–53.

Veivakavulici ena ivakarau ni iVakabula

A solia na iVakabula vei ira na Nona tisaipeli na itavi bibi ni veivakavulici, veivakalougatataki, ka qaravi ira na tani. Era na vakalougatataki vakacava na itabagone ena nodra ciqoma na madigi eso me ra vakavulici ira tale eso ena veika era sa vulica tiko?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone me ra taleva lesu vakalekaleka e dua na lotu vakamatavuvale, semineri, se lesoni ni lotu era a taleitaka.
Sureti ira na itabagone me ra vakasamataka e dua na qasenivuli era dau taleitaka ka vakauqeti ira me ra bulataka na kosipeli. Na cava na vuna e mana kina na nona veivakavulici na qasenivuli oqo? Na veika vivinaka cava soti e tu vua era na taleitaka na itabagone me ra vakatotomuria? Kerei ira na itabagone me ra wilika na iwasewase kena ulutaga “The Savior’s Way of Teaching” ena tabana e 4 ni Veivakavulici ena iVakarau ni iVakabula ka vaqara na veika vinaka vei ira na qasenivuli va-Karisito. Na ivakarau cava era veivuke kina na qasenivuli mana ni kosipeli ena kena tarai na matanitu ni Kalou?

Vulica vata

Na itaviqaravi yadua e ra ena vukei ira na itabagone me ra vulica na ivakarau me ra yaco kina me ra qasenivuli vinaka cake. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Wasea vakatolu na kalasi, ka me wilika na iwasewase yadua e dua vei ira na ivolanikalou oqo: Ica 12:27; V&V 42:14; V&V 88:78. Kerei ira me ra vakasamataka vakatitobu ka veivosakitaka na veika era vakavuvulitaka na ivolanikalou oqo me baleta na noda yaco me da qasenivuli vinaka cake. Vakayaloqaqataki ira me ra raica na ivolanikalou ena ivakamacala e ra ni veitikina oqo me rawati kina na ikuri ni vakasama eso me baleta na noda yaco me da qasenivuli vinaka cake, ka kerei ira me ra wasea na veika era sa vulica. Sureti ira na itabagone me ra wasea na iwasewase ka kena ulutaga “Vakavuvulitaka na Kosipeli” ena Tudei ena Vakabauta (151–52) ka cakava e dua na ituvatuva e rawa ni ra gugumatua kina ni ra qasenivuli.
Sureti ira na lewe ni kalasi me ra vakacavara na “Vakatorocaketaki ni Qasenivuli Vakarisito: Vakadidike Yadua” ena tabana e 37 ni Veivakavulici ena iVakarau ni iVakabula. Kerei ira me ra veivosakitaka na veika era sa vulica ena nodra iwasewase ka wasea ki na iwasewase kadua na vakasama lelevu ni veika era veivosakitaka. Kerei ira na itabagone me ra vakasamataka e dua na ka era qai sotava walega ena nodra veivakavulici tiko (me vaka beka, ena lotu vakamatavuvale, dua na kalasi ena Lotu, se ni veituberi tiko ena matavuvale). Sureta na itabagone yadua me tuvakataka me vinaka cake na nona veivakavulici ena kosipeli.
Vola ena vava ni volavola, “Na cava au rawa ni cakava meu qasenivuli vinaka cake kina?” Sureti ira na itabagone me ra wilika na tolu na parakaravu tekivu ena malanivosa “Dou veivaka[vulici] vakai kemudou e na ivakavuvuli ni matanitu” ena vosa nei Elder Robert D. Hales “‘Lako Mai, Mo Muri Au” mo Vakayacora na Loloma kei na Veiqaravi sa va-Karisito.” E rawa talega ni ra wilika “iVakamacala Taumada: Veivakavulici ena iVakarau ni iVakabula” ena Veivakavulici ena iVakarau ni iVakabula. Sureti ira me ra vakasaqara na isaunitaro oqo ka wasea na veika era kunea. Me ra na vakayagataka vakacava na veika era sa vulica ena nodra dui veivakavulici?
Sureti ira na itabagone me ra wilika na “iVakarau ni Veivakavulici” ena Tudei ena Vakabauta ka vola ena vava ni volavola na ivakarau ni veivakavulici era raica kina. Na gauna cava era a raica kina na itabagone ni vakayagataki na ivakarau oqo? Kerei ira yadua na itabagone me ra digitaka e dua na yavu ni vakabauta ka vakayagataka e vica na miniti ena kalasi me ra vakarau kina me ra vakavulica ki na dua na ilala gone, ena nodra vakayagataka e dua na ivakarau ena vava ni volavola. Kerei ira na itabagone mera wasea na veika era vakarautaka.

Kerei ira na itabagone me ra wasea na veika era sa vulica nikua. Era sa kila beka na sala e rawa ni ra yaco kina me ra qasenivuli vinaka cake? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Vakayagataki ni ivakamacala e ra. Ena imatai ni itaviqaravi ena iwasewase oqo, era vakayaloqaqataki kina na itabagone me ra vakayagataka na ivakamacala e ra ena ivolanikalou. Vukei ira me ra raica na sala e rawa ni vakatitobutaka kina na ivakamacala e ra na nodra kila na veika era wilika tiko. Vakayaloqaqataki ira na itabagone me ra dau raica na ivakamacala e ra me vukea na nodra vuli yadua mai na ivolanikalou.

Veisureti me caka

Sureti ira na itabagone mera wasea eso na veivakurabuitaki era sotava ena gauna ni kalasi. Na cava era na cakava me vinaka cake kina nodra veiqaravi vaqasenivuli? Kerei ira mera wasea na veika era sa sotava ena kalasi e tarava.