Veivakatavulici ena Kaukauwa kei na Dodonu ni Lewa ni Kalou

Mai vei David M. McConkie

Matai ni Daunivakasala ena Mataveiliutaki Raraba ni Matawilivola ni Sigatabu

Sa vakarautaka na Turaga na sala vei ira kece na Yalododonu Edaidai bula kilikili mera veivakatavulici ena ivakarau ni Turaga.

E sega ni vakamacalataki rawa na levu ni neitou vakavinavinaka vei kemuni na qasenivuli ena loma ni Lotu taucoko. Keitou lomani kemuni ka nuidei vakalevu vei kemuni. O kemuni eso vei ira na cakacaka mana cecere ni kosipeli vakalesui mai.

Sa tiko vakaidina e dua na ka vuni mo yaco kina mo dua na qasenivuli ni kosipeli mana, mo veivakatavulici ena kaukauwa kei na dodonu ni lewa ni Kalou. Au vakayagataka na vosa ka vuni baleta na veivakavuvuli ena vakatau kina na mana ni dua na qasenivuli, ena rawa ni kilai deivaki duadua ga oqori mai vei ira era taukena e dua na ivakadinadina ni ka a yaco ena dua na mataka ni siga totoka, makare, ena itekivu ni vulaitubutubu ni 1820.

Ena saumi ni masu yalomalua ni dua na gonetagane yabaki 14, a tadolavi kina na lomalagi. Rau a basika mai ka vosa vua na Parofita o Josefa Simici, na Kalou na Tamada Tawamudu kei na Luvena, o Jisu Karisito. Na waraki balavu ni gauna ena caka tale me vinaka kina na ka kecega e sa tekivu, ka sa tauyavutaki vakatawamudu na ivakavuvuli ni ivakatakila ena noda itabagauna. Na itukutuku i Josefa, kei na neitou itukutuku ki vuravura, e rawa ni vakalekalekataki ena rua na vosa: “A vosa na Kalou.” A vosa o Koya ena gauna makawa, a vosa o Koya vei Josefa, ka na vosa o Koya kivei iko. Oqo na ka o duatani kina o iko mai vei ira taucoko na qasenivuli e vuravura. Oqo na vuna o na sega ni rawa ni lutu kina.

Ko sa mai kacivi ena yalo ni parofisai kei na vakatakila ka sa mai vakatikori ena dodonu ni lewa ni matabete. Na cava na kena ibalebale oqo?

iMatai, e kena ibalebale ni o sa cakava tiko na cakacaka ni Turaga. Ko sa Nona mata, ka o sa vakadonui ka vakabauti mo matataki Koya ka cakacaka ena Vukuna. Me vaka na Nona mata, sa tiko vei iko na dodonu ki na Nona veivuke. Mo na tarogi iko mada, “Na cava ena tukuna na iVakabula kevaka a vakatavulica tiko na noqu kalasi edaidai, ka na tukuna vakacava o Koya?” Mo qai cakava vakakina o iko.

Na itavi oqo ena rairai vakavu ririko kivei ira eso se ra lomarere saraga. Na salatu e sega ni dredre. Sa vakarautaka na Turaga na sala vei ira kece na Yalododonu Edaidai bula kilikili mera veivakatavulici ena ivakarau ni Turaga.

iKarua, o sa kacivi mo vunautaka na kosipeli i Jisu Karisito. Mo kakua sara ni vakavuvulitaka na nomu vakasama ga se filosofi, ka waki vata kei na ivolanikalou. Na kosipeli e sa “kaukauwa ni Kalou ki na veivakabulai,”¹ ia na kosipeli duadua ga eda sa vakabulai kina.

iKatolu, o sa vakaroti mo vunautaka na kosipeli me vaka era kunei ena ivolayavu ni Lotu, mo vakavulica na nodra vosa na iapositolo kei na parofita ena gauna oqo, ka vakavulica na veika e vakatavulica vei iko na Yalo Tabu.

Ia meda na tekivu evei?

Na noda imatai ka itavi levu oya meda bula me rawa ni tiko vata kei keda na Yalo Tabu me noda dauveituberi ka itokani. Ena gauna a saga kina o Hyrum Smith me rawa ni vakaitavi ena cakacaka ni gauna oqo, a tukuna na Turaga, “Raica mo gumatua sara ni muria na noqu vunau ena yalomu taucoko, ena nomu kaukauwa taucoko kei na lomamu taucoko.”² Oqo na kena itekitekivu. Na ivakasala, e vakarautaka na Turaga kivei Hyrum, e sa ivakasala vataga e vakarautaka o Koya kivei ira na Yalododonu ena yabaki kecega.

Ni ratou vosa tiko kivei ira na qasenivuli edaidai, eratou tukuna na Mataveiliutaki Taumada: “Na tikina bibi duadua ni nomu veiqaravi sai koya na nomu vakavakarau vakayalo vakaiiko ena veisiga, oka kina na masu, vuli ivolanikalou, kei na talairawarawa ki na veivakaro. Keitou vakayaloqaqataki iko mo na vakadeitaki iko ki na bulataki ni kosipeli ena inaki levu cake mai na kena eliu sara.”³

E matalia toka ni ratou sega ni tukuna na Mataveiliutaki Taumada ni tikina bibi duadua ni nomu veiqaravi sa ikoya mo vakarautaka vakavinaka na nomu lesoni se mera mataitaka na iwalewale eso ni mataqali veivakatavulici. Sa dina sara, sa dodonu mo na vakarautaka vagumatua na lesoni yadua ka saga ni vulica na iwalewale o rawa ni veivakatavulici kina me rawa ni vukei ira na nomu gonevuli mera cakacakataka na nodra digidigi ka vakatara na kosipeli me curuma na lomadra, ia na imatai ni tikina bibi duadua ni nomu veiqaravi oya na nomu vakavakarautaki vakayalo. Ni o vakamuria na ivakasala oqo, eratou sa yalataka na Mataveiliutaki Taumada: “Na Yalo Tabu ena vukei iko ni kila na ka mo cakava. Ena tubu na nomu ivakadinadina, ena vakatitobutaki na nomu saumaki, ka o na vakaukauwataki mo sotava na veibolebole ni bula.”⁴

Na veivakalougatataki levu cava tale ena gadreva e dua na qasenivuli?

Tarava, sa vakarota na Turaga ni bera ni da vunautaka na Nona vosa, meda vulica taumada meda kila.⁵ Mo yaco mo turaga ka marama yalomatua ena nomu vakasaqaqara voli vagumatua ena ivolanikalou kei na nomu vakamareqeta voli e lomamu. Ni qai yaco mo na kerea na veivuke ni Turaga, ena vakalougatataki iko o Koya ena Nona Yalotabu kei na Nona vosa. Ena tiko vei iko na kaukauwa ni Kalou mera rawai kina na tamata.

E tukuna vei keda o Paula ni kosipeli e lako mai ki na tamata ena rua na sala, ena vosa kei na kaukauwa.⁶ Na vosa ni kosipeli era sa volai ena ivolanikalou, ka da na rawa ni ciqoma na vosa ena kena vakasaqarai vagumatua. Na kaukauwa ni kosipeli e lako mai ki na nodra bula o ira era sa bula mera na veitokani kei na Yalo Tabu ka muria na veivakauqeti era ciqoma. Eso era wanonova matua walega na vulici ni vosa, ka ra yaco me kenadau ena soli itukutuku. Eso tale era vakasavuligataka na nodra vakavakarau ka vakanuinui ni na vukei ira na Turaga ena dua na ivakarau mera lako curuma na iwasewase ni kalasi. E sega ni rawa ni o namaka na Yalotabu me vukei iko mo nanuma na veivolanikalou kei na veivakavuvuli o a sega ni vulica se vakasamataka. Me yaco me vakatavulici vinaka sara na kosipeli, sa dodonu me na tiko ruarua vei iko na vosa kei na kaukauwa ni kosipeli ena nomu bula.

A kila deivaki o Alama na veivakavuvuli oqo ena nona rekitaki iratou na luvei Mosaia kei na iwalewale eratou a veivakatavulici kina ena kaukauwa kei na lewa ni Kalou. Eda wilika:

“Eratou sa tamata yalomatua ka dau wilika vagumatua na ivola tabu, me ratou kila kina na vosa ni Kalou.

“Ia e sega ni o koya walega oqori; eratou sa gumatua sara ena masumasu, kei na lolo; ka sa tu vei iratou … na yalo ni veika ena yaco.”⁷

Tarava mo vulica mo dau vakarorogo. A vakavulica o Elder Jeffery R. Holland na ivakavuvuli oqo vei ira na daukaulotu. Au na tautauri mai ena veimalanivosa nei Elder Holland ia au vakaisosomitaka tiko na vosa daukaulotu kei na dauvakadidike ki na vosa qasenivuli kei na gonevuli ena kena veitaravi: “Tarava yani ena itavi vaka [qasenivuli] mera vakarorogo ki vua na Yalotabu, sa ikoya na itavi e tiko vei ira mera vakarorogo vua na [gonevuli]. … Kevaka eda na vakarorogo ena daliga vakayalo, … era na tukuna vei keda na [noda gonevuli] na veilesoni cava era na gadreva mera rogoca!”

A tomana o Elder Holland: “Na ka e yaco tiko oya ni [o ira na qasenivuli] era se vakabibitaka tikoga na kena talaucaki vakamatau, vakawasoma na lewe ni lesoni ka sega ena wanonovi ni [gonevuli] vakayadua.”⁸

Ni o sa vakarautaki iko oti kei na nomu lesoni ki na kena vinaka taudua o rawata, sa dodonu mo na vakalaiva. Ni yaco mai na veivakauqeti malua ni Yalo Tabu, sa dodonu me na tiko vei iko na yaloqaqa mo biuta vakatikitiki na nomu ituvatuva kei na nomu ivola eso ka lako ki na vanua ena kauti iko kina na veivakauqeti oqori. Ni da cakava oqo, na lesoni o talaucaka tiko e sa sega ni qai nomu lesoni, ia e sa yaco me nona lesoni na iVakabula.

Ni o soli iko ki na bulataki ni kosipeli ena inaki levu cake mai na kena eliu ka vakasaqara na ivolanikalou eso, ka tugani ira sara ki na lomamu, na Yalo Tabu vata ga, ka vakatakila na veivosa oqo kivei ira na iapositolo kei na parofita ena gauna makawa, ena vakadinadinataka vei iko na kedra dina. Me isaluwaki, na Yalo Tabu ena vakatakila vou kivei iko. Ni yaco oqo, na vosa o na wilika sa na sega tale ni qai vosa walega nei Nifai se Paula se Alama, ia era sa yaco me nomu vosa. Ia, ni o qai veivakatavulici, na Yalo Tabu sa na rawa ni kauta mai na ka kecega ki na nomu vakanananu. Vakaidina, “ena soli vei iko ena gauna ko ya, io, ena tiki ni siga ko ya, na ka mo na vosataka.”⁹ Ni yaco oqo, o na raici iko ni tukuna voli e dua na ka o a sega ni tuvakataka mo tukuna. Ia, kevaka o na qai vakatudaliga kina, o na vulica eso na ka mai na veika o tukuna ni o veivakavulici. A kaya o Peresitedi Marion G. Romney, “Au dau kila tu ga na gauna au vosa tiko kina ena veivakauqeti ni Yalo Tabu baleta au dau vulica tu ga eso na ka mai na veika au a tukuna.”¹⁰ Nanuma tiko, na qasenivuli e gonevuli talega.

Me kena itinitini, mo na tu ka ivakadinadina vakataki iko ni veika o vakatavulica ka sega walega ni dua na voqa ni veivosa ena dua na ivolavakarau se na nodra vakasama eso tale. Ni o kanamagiti ena vosa i Karisito ka segata mo bulataka na kosipeli ena inaki levu cake mai na kena eliu, na yalo Tabu ena vakadinadinataka vei iko ni ra dina na veika o vakavuvulitaka tiko. Oqori na yalo ni ivakatakila, ka na kauta yani na nomu itukutuku na yalo vata oqori ki yalodra o ira era gadreva ka ra sa tu vakarau me ra ciqoma.

Me da tinia tale ena vanua eda tekivu kina—ena loma ni Veikau Tabu. Ena vuku ni veika a yaco ena mataka totoka ni vulaitubutubu oya ena gauna sega soti ni dede oya, sa rawa mo veivakavulici ena kaukauwa kei na lewa ni Kalou. Ena veika oqo au wasea kina na noqu ivakadinadina bibi ena yaca i Jisu Karisito, emeni.