Ciqoma na Veivakalougatataki ni Nomu Veiyalayalati
Mai vei Linda S. Reeves
Karua ni Daunivakasala ena Mataveiliutaki Raraba ni Soqosoqo ni Veivukei
Ni da vakavouya ka rokova na noda veiyalayalati, ena rawa ni vakamamadataki na noda icolacola ka da na vakasavasavataki ka vaqaqacotaki tikoga.
Kemuni na taciqu, sa vakasakiti dina na soqoni vata tale kei kemuni.
Au a sota ena dua na gauna lekaleka sa oti kei na dua na marama sa vakarau papitaiso tiko. Ena Sigatabu oqo e yaco ki valenilotu ena nona taubaletaka mai e rua na maile (3 km) ena soso lolobo. A lako sara ki vale ni vakacegu ka luvata nona isulu qeleqelewa, sisili, ka veisau ki na isulu savasava ni Sigatabu. Ena soqoni ni iSoqosoqo ni Veivukei a tukuna kina na nona saumaki mai. E lauti au na nona gagadre levu me savai ka vakasavasavataki ena nona veivutuni kei na isoro ni veivakaduavatataki ni iVakabula kei na nona lomasoli me biuta laivi na nona “bula makawa” me rawa kina ni cakava na veiyalayalati tabu kei na Tamada mai Lomalagi. Rau sa veibiu kei na nona itau, sa tovolea tiko me vakamalumalumutaka na itovo veivakabobulataki me rawa kina ni bulataka na Vosa ni Vuku, sa biuta nona cakacaka ena Sigatabu, sa cavuka na isema vakaveitokani kei ira e dau lomana ena nona tukuna ni sa via papitaiso. Sa gadreva sara me biuta laivi kece na nona ivalavala ca, me rawa kina ni vakasavasavataki ka vakila na loloma veivueti ni iVakabula. Au a vakauqeti ena mataka oya ena nona gadreva me savasava vakayago ka vakayalo talega.
Keimami kila ni vuqa vei kemuni era sa vakayacora na mataqali solibula vata oya ena nomuni vakila na ivakadinadina ni Yalo Tabu ka gadreva mo ni veivutuni, papitaiso, ka vakasavasavataki. E rairai ni sega tale beka ni dua na gauna me da vakila vakalevu cake kina na nona loloma vakalou na iVakabula mai na gauna eda veivutuni kina ka vakila ni dodo mai na Ligana dauloloma me mokoti keda ka vakadeitaka vei keda na Nona loloma kei na Nona veiciqomi.
Ena vica na Sigatabu sa oti niu rogoca na masu ni sakaramede, a tarai au na ivakarau e cavuta kina mai vuniyalona na bete oya na veimalanivosa yadua. Au qai mai qirita e muri na bete oya meu vakavinavinaka ena nona veivuke me dua na gauna titobu vakayalo vei au kei ira na ivavakoso na gauna ni sakaramede. A yali mai vale o koya, ia a sauma mai na tinana, “Isa, ena marau sara o koya ni o qiri mai! Oqo na imatai ni gauna me masulaka na sakaramede, ka keirau a vakavakarau vata tiko, ena neirau veitalanotaka na bibi ni sakaramede kei na noda vakavouya ena bula kilikili na noda veiyalayalati ni papitaiso kei na iVakabula.” Sa dua na ka na noqu taleitaka na tina vinaka oqo ena nona vakavulica na luvena me baleta na mana ni veiyalayalati ni papitaiso kei na sala e rawa ni vukei ira kina na lewe ni tabanalevu me ra vakila na kaukauwa oya.
E dua tale na tina au kila e dau dabe duadua voli ena lotu ena vica vata na yabaki kei iratou na luvena gonelalai e va. Dau vakavuqa nona sega ni rawa ni dau vagoleya na yalona vua na iVakabula ena gauna ni sakaramede, sa mani nakinaki. Ena gauna oqo sa dau tovolea me taura na gauna ena vei Vakarauwai me railesuva kina na macawa ka vakasamataka na nona veiyalayalati kei na veika e dodonu me veivutunitaka. “Ni oti oya,” e kaya, “veitalia se cava ga au sotava vata kei iratou na luvequ ena Sigatabu, au sa vakarau tu meu vakaivotavota ena sakaramede, vakavouya na noqu veiyalayalati, ka vakila na kaukauwa veivakasavasavataki ni Veisorovaki.”
Kemuni na tacqiu, na cava na vuna sa rui vakabibitaka kina na iVakabula na sakaramede? Na veika bibi cava soti e dau vakayacora ki na noda bula na vakavoui vakamacawa ni veiyalayalati oqo? Eda sa vakadinadinataka beka na nona rawata na iVakabula me vakasavasavataki keda saraga vakadua e veimacawa ni da vakayagataka ena kilikili ka vakanananu vakabibi ni da vakaivotavota ena sakaramede? A vakadinadinataka o Peresitedi Boyd K. Packer, “Oqori na yalayala ni kosipeli i Jisu Karisito kei na Veisorovaki: … o ya ni sa cava na [noda bula, sa rawa vei keda] me da curuma yani na ilati ni sa veivutunitaki oti [noda] ivalavala ca ka savai me da savasava ena dra i Karisito.”1
Keitou vakila na mataveiliutaki na reki cecere ni ra sa cakava ka rokova tiko na nodra veiyalayalati na taci keitou kei na nodra matavuvale, ia e dau mosi na yaloi keitou ena vukudra o ira era sotava tiko na dredre ena nodra bula ena nodra voroka na nodra veiyalayalati eso na nodra daulomani. Na parofita o Jekope, na taci Nifai, a vakaroti koya na Turaga me vosa vei ira na tacina ena vukudra na marama buladodonu kei ira na gonelalai ena nona gauna. Au vakadinadinataka ni a maroroi tu mai na nona vosa me baleta sara ga na noda gauna. E vosa vei keda o koya me vaka sara ga ni vosa tiko na iVakabula. A “bikai voli” o Jekope “ena nona gadreva…” ni vakadinadina tiko vei ira na tagane vakawati kei na tama:
“Sa rarawa talega na yaloqu ena noqu vosa vakadodonu tiko vei kemudou … e matadra na watimudou kei ira na luvemudou, ka ni vuqa vei ira era sa yalolokomi, yalosavasava ka yalomalumalumu. …
“ … A sa tagi na yalodra ka ra beitaki kemudou vua na Kalou. … sa laubasikata ka vakamavoataka e vuqa vei kemudou.”2
Vei ira na yalewa kei na gone dau rokova na nodra veiyalayalati ni nona kei na noda gauna, sa yalataka o Jekope:
“Dou vakararavi vua na Kalou ena yalomudou taucoko ka masu vua ena nomudou vakabauta taucoko, ia ena vakacegui kemudou ko koya. …
“… Dou laveta cake na ulumudou ka vakabauta na vosa talei ni Kalou, me nomudou na nona loloma.”3
Kemuni na marama, au vakadinadinataka na qaqa kei na mana ni masu ni da vakaraitaka na noda mosi titobu kei na gagadre ki vua na Tamada Vakalomalagi kei na kena isau eda na ciqoma ni da “kanamagiti” mai na ivolanikalou kei na nodra vosa na parofita bula.
Ena voleka ni tolu na yabaki sa oti a vakacacana kina na loma ni valecavu vakairogorogo mai Provo e Utah e dua na kama. Sa dua kina na vakacalaka bibi oqo vei ira na lewe ni itikotiko kei ira na lewe ni Lotu. E vuqa era vakataroga, “Na cava e vakatara kina na Turaga me yaco? A rawa Vua me tarova na kama se muduka na kena vakacaca.”
Ena tini na vula i muri, ena koniferedi raraba ni Okotova 2011, a rorogo na vakatabuicegu ena nona kacivaka o Peresitedi Thomas S. Monson ni sa na yaco me valetabu na valecavu sa voleka tu oqo ni rusa vakadua—me dua na vale ni Turaga! Vakasauri sa rawa ni da raica na veika a dau kila tu ga na Turaga! A sega ni vakavuna o koya na kama, ia a vakatara ga me vakarusa laivi na lomanivale na bukawaqa. A raica o Koya ni na dua na valetabu vakasakiti na valecavu—me itikotiko tudei ka dau vakayacori kina na veiyalayalati tabu tawamudu.4
Kemuni na taciqu, e dau vakatara na Turaga me da yavalati ka vakatovolei, ena so na gauna me yacova sara na kena ivakatagedegede duadua e cake. Eda sa dau raica na kena vaka me kamayavu vakadua na nona bula e dua na noda daulomani—ka vakatale madaga kina na noda saraga vakaikeda—ka taroga se cava na vuna e vakatara kina na Tamada Vakalomalagi dauloloma me yaco na veika oqo. Ia e sega ni laivi keda tu ga ena dravusa; e tucake tu o Koya ka dodoka tu mai na ligana, ka sureti keda tiko me da lako mai Vua. Sa tara tiko o Koya na noda bula me valetabu vakasakiti me tiko kina na Yalona me tawamudu.
Ena Vunau kei na Veiyalayalati 58:3–4, e tukuna vei keda na Turaga:
“Ia dou sa sega ni raica rawa oqo e matamudou vakayago na veika sa vakarautaka tu na Kalou me yaco; io kei na veivakalougatataki ena rawati ni sa oti na veika rarawa.
“Io ni sa oti na veika rarawa, ena yaco na veivakalougatataki. Raica ena yaco mai na gauna dou na vakaisalataki kina ena iukuuku.”
Kemuni na taciqu, au vakadinadinataka ni tiko e dua na nona ituvatuva na Turaga me baleta na noda dui bula yadua. E sega ni dua na ka e yaco e ka vakasauri se vakidacala Vua. O Koya e kila na ka kecega ka lomana na tamata kecega. E gadreva tu o Koya me vukei keda, me vakacegui keda, ka vakamamadataka na noda mosi ni da vakararavi ena mana ni Veisorovaki ka rokova na noda veiyalayalati. Na veivakatovolei kei na veika rarawa eda dau sotava e rawa ni sai koya sara ga na ka ena tuberi keda me da lako yani Vua ka kukube toka ena noda veiyalayalati me rawa kina ni da lesu tale ki na Nona iserau ka rawata na veika e tu vei Tamana.
Ena yabaki sa oti oqo au a gadreva ka vinakata meu vakila vakatitobu cake na loloma ni Turaga, meu ciqoma na noqu ivakatakila, meu kila vakavinaka cake na noqu veiyalayalati ni valetabu, me vakamamadataki na noqu icolacola. Niu masulaka tiko vagumatua na veivakalougatataki oqo, au vakila ni vakauqeti au tiko na Yalotabu meu lako ki na valetabu ka vakarorogo vakavinaka sara ki na veimalanivosa ni veivakalougatataki e cavuti vei au. Au vakadinadinataka ena noqu vakarorogo vakavinaka cake ka tovolea meu cakacakataka noqu vakabauta, a lomani au vakalevu na Turaga ka vukea me vakamamadataki na noqu icolacola. A vukei au meu vakila na vakacegu cecere me baleta na masu eso se bera ni saumi. Eda sa vauca na Turaga me vakayacora na Nona yalayala ni da rokova na noda veiyalayalati ka cakacakataka na noda vakabauta.5 Ni lako mai ki na valetabu kemuni na taciqu, ka mai taura na nomuni veivakalougatataki!
Au vinakata meu na tara ena dua tale na sala na kena rawa ni vakadeitaka na yaloda kei na noda vakabauta. O keda ena so na gauna, me vaka ni da yalewa, eda dau lomaleqa vakalevu. Ena veigauna oqori sa dodonu me da dau vakasaqara na Yalotabu ka taroga “Sai koya beka qo na ka e vinakata vei au na Turaga meu vakasamataki au kina, se sa saga o Setani me vakarusai au?” Nanuma na nona ivakarau na Tamada Vakalomalagi, ka sa uasivi sara na Nona loloma ka tawamudu.6 E gadreva o Koya me tarai keda cake, sega ni basuraki keda sobu.
Ni da lewe ni Lotu, eda na gadreva beka ena so na gauna me da tiki ni dua na “vuvale YDE taucoko tu” me rawa kina ni ciqomi keda na Turaga. Eda dau nanuma ni sega ni ganiti keda me da lewe ni matanitu kevaka eda vakila ni sega ni da kilikili kaya na iyaloyalo oya. Kemuni na taciqu, ni sa caka ka tukuni na veika kece, na ka ga e bibi vua na Tamada mai Lomalagi na ivakarau eda dau rokova kina noda veiyalayalati kei na levu ni noda tovolea me da muria na nona ivakaraitaki na noda iVakabula lomani, o Jisu Karisito.
Au vakadinadinataka ni o Jisu Karisito na noda iVakabula ka noda Dauveivueti. Ena Nona solibula ni veisorovaki, sa rawa kina ni da savai me da savasava e veimacawa ni da vakaivotavota ena bula kilikili ena Nona sakaramede. Ni da vakavouya ka rokova na noda veiyalayalati, ena rawa ni vakamamadataki na noda icolacola ka da na vakasavasavataki ka vaqaqacotaki tikoga, me rawa kina, ni gauna sa oti kina na noda bula ena kunei ni sa kilikili me da bula vakacerecerei ka bula tawamudu. Au vakadinadinataka na veika oqo ena yaca ni noda iVakabula lomani o Jisu Karisito, emeni.