Ni Bula Vinaka Mai ki na Koniferedi
Mai vei Peresitedi Thomas S. Monson
Sa noqu masu ni da na vakasinaiti ena Yalo ni Turaga ni da vakarorogo ka vuli mai kina.
Sa qai dua na ka vinaka, kemuni na taciqu kei na ganequ, meda mai sota vata tale. Se qai mai oti wale toka ga oqo e 183 na yabaki na nona a mai tauyavutaka na Lotu na Parofita o Josefa Simici, ena veidusimaki ni Turaga. Ena soqoni o ya ena ika 6 ni Epereli, 1830, era a tiko kina e lewe ono na lewe ni Lotu.1
Au marautaka niu mai vakaraitaka oqo ni ena rua na macawa sa oti sa mai 15 na milioni kina na lewe ni Lotu. Sa gumatua tikoga na kena tubu tiko na Lotu ena kena sa veisautaki na nodra bula e vuqa vakavuqa na tamata ena veiyabaki. Sa teteva yani na vuravura taucoko na nodra sa vakasaqaqara yani na noda daukaulotu mera kunei ira era vakasaqara tiko na dina.
Se bera mada ga oqo ni yabaki dua na noqu a vakaraitaka na kena sa vakalailaitaki sobu na yabaki ni bula ni veiqaravi ni kaulotu. Vakatekivu mai na gauna o ya, sa toso cake sara na iwiliwili ni daukaulotu tudei mai na 58,500 ena Okotova ni 2012 ki na 80,333 nikua. Sa qai dua dina na vakayacoka veivakauqeti eda sa raica oqo!
E sega tale ni dua na ivakaro yaga sara, se itavi e vauci kaukauwa, se ivakasala e cavuti vakadodonu me vakataka ena ivolanikalou a solia kina na veivakaroti na Turaga sa tucaketale ena Nona a rairai mai Kalili kivei iratou na tinikadua na tisaipeli. A kaya kina o Koya, “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu.”2 A vakaraitaka kina na Parofita o Josefa Simici, “Mai na veika kece sara sa tukuni oti, sa itavi cecere ka bibi duadua o ya na kaburaki ni Kosipeli.”3 Eso vei kemuni o ni tiko nikua o ni na nanuma na vosa nei Peresitedi David O. McKay, a kaya vakamatata kina “Eda sa daukaulotu na lewenilotu yadua!”4
Au mai kuria kina na nodrau vosa ena noqu. Oqo na gauna meda lako vata mai kina na lewenilotu kei na daukaulotu, meda cakacaka vata, ka vakaitavi ena were ni vaini ni Turaga ena kau mai ni yalo ki Vua. Sa vakarautaka tu o Koya kivei keda na veika meda wasea kina na kosipeli ena veimataqali sala, ka na vukei keda o Koya ena noda veiqaravi kevaka eda vakayacora ena vakabauta na vakataucokotaki ni Nona cakacaka.
Me vukea na tauri dei ni tubu cake ni iwiliwili ni noda ilawalawa vakaulotu, au a kerei ira taumada eliu na noda lewenilotu mera na cau mai, ke rawa vei ira, ki na ilavo ni kaulotu ena nodra tabanalevu se ki na iLavo Raraba ni Kaulotu ni Lotu. Sa vakasakiti dina na veitokoni ki na kerekere o ya ka sa vukei kina e udolu na daukaulotu ka ra sega ni rawa ni vukei ira vakaiira ena vuku ni ituvaki dredre ni nodra bula. Au sa vakavinavinakataki kemuni ena cau lomasoli oqo. Ena gadrevi tikoga na veivuke vakaoqo, me rawa ni tomani tiko kina na nodra vukei o ira era gadreva dina mera laki veiqaravi ia e sega ni tiko vei ira na kena ivurevure.
Ia oqo, kemuni na taciqu kei na ganequ, eda sa gole mai eke meda mai vakasalataki ka vakauqeti vakayalo. E vuqa sara na itukutuku, ka kovuti kina na veiulutaga vakosipeli, ena soli tiko ena rua na siga veitaravi oqo. Era sa kerea oti o ira na turaga kei na marama era na vosa vei kemuni na veivuke vakalomalagi me baleta na itukutuku era na mai cauraka.
Sa noqu masu ni da na vakasinaiti ena Yalo ni Turaga ni da vakarorogo ka vuli mai kina. Ena yaca ni noda iVakabula, ko Jisu Karisito, emeni.