Mai, Tomani Keimami
Mai vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Veitalia sara na nomu ituvaki, na veika makawa me baleti iko, se na qaqaco ni nomu ivakadinadina, e tiko na vanua me baleti iko ena Lotu oqo.
A tadra e dua na turaga ena dua na gauna ni a tiko ena dua na olo levu ka ra soqoni vata tu kina na veimata lotu taucoko e vuravura. A siqema okoya ni a tiko ki na matalotu yadua e levu na ka e vaka me taleitaki ka kilikili.
A sotava okoya e dua na veiwatini vinaka ka rau matataka na Lotu i Jisu Karisito ni Yalododonu Edaidai, ka taroga, “Na cava o ni vinakata mai vei ira na nomuni lewenilotu?”
“Keimami sega ni vinakata e dua na ka,” erau sauma. “Ia na Turaga e kerea me keimami vakatabuya taucoko na ka.”
Rau tomana na veiwatini me vakamacalataka baleta na veikacivi ena Lotu, veisiko kei na siko vuvale, kaulotu tudei, lotu vakamatavuvale ena veimacawa, cakacaka ni valetabu, welefea kei na veiqaravi ni veivuke raraba, kei na ilesilesi ni veivakatavulici.
“Ko ni dau saumi ira na nomuni tamata ena cakacaka kece era cakava?” a taroga na turaga.
“E sega sara,” rau vakamacalataka na veiwatini. “Era solia wale na nodra gauna.”
“Vakakina,” rau kuria na veiwatini, “ena veivula ono, era dau tiko se sarava na lewe ni neimami Lotu ena mua ni macawa e 10 na auwa ni koniferedi raraba.”
“Tini na aua ni nodra vosa tiko na tamata?” a vakananuma voli na turaga oqo.
“Vakacava na nomuni qaravi lotu vakamacawa? E vakacava na kena balavu?”
“Tolu na auwa, ena vei Sigatabu!”
“Oilei,” e kaya na turaga. “Era dau cakava vakaidina na ka o sa tukuna na lewe ni nomuni lotu?”
“Oya ka so tale. Keirau se sega ni vakatakila mada na ivola ni kawa, keba ni itabagone, sokalou, vuli ivolanikalou, veituberi ni veiliutaki, itaviqaravi ni itabagone, semineri ena mataka lailai, qarauni na vale ni Lotu, ka vakakina na ivakaro ni tiko bulabula ni Turaga, na lolo ena veivula me vukei ira na dravudravua, kei na ikatini.”
E kaya na turaga, “Au sa qai lomaleqa oqo. Cava na vuna ena vinakata kina e dua me lewena na lotu vakaoqori?”
Rau a dredre na veiwatini ka kaya, “Keirau nanuma ga ni o na sega ni taroga.”
Cava na Vuna me Lewena kina e Dua na Lotu Vakaoqo?
Ena gauna era sa vakila tiko kina e vuqa na matalotu roboti vuravura na lutu sobu vakamatata ni iwiliwili, ni Lotu i Jisu Karisito ni Yalododonu Edaidai—e dina ga ni ka lailai ni vakatauvatani kei ira e vuqa tale—e sa dua na matalotu tubu totolo sara tiko e vuravura. Me qai yacova mai na Sepiteba ni 2013 sa sivia na 15 na milioni na lewe ni Lotu e vuravura taucoko.
E levu tiko na vuna oqo, ia me’u vakaraitaka mada e vica ga?
Na Lotu ni iVakabula
iMatai, na Lotu oqo a vakalesuimai ena noda gauna mai vei Jisu Karisito Vakaikoya. Ko na raica eke na lewa dina ni cakacaka ena Yacana—me veipapitaisotaki me baleta na bokoci ni ivalavala ca, me vakatikora na isolisoli ni Yalo Tabu, ka me vauca e vuravura vakakina mai lomalagi.1
O ira na lewena na Lotu oqo era lomana na iVakabula o Jisu Karisito ka ra gadreva dina mera muri Koya. Era marautaka na kila-ka ni sa vosa tale na Kalou kivua na tamata. Ni ra ciqoma na veicakacaka tabu vakamatabete ka veiyalayalati kei na Kalou, sa rawa ni ra vakila na Nona kaukauwa ena nodra bula.2 Ni ra curuma na valetabu, era vakila ni ra sa tu ena Nona iserau. Ni ra wilika na ivolanikalou tabu3 ka bulataka na ivakavuvuli ni Nona parofita, era toro voleka vua na iVakabula era lomana vakalevu.
Na Vakabauta e Bula
Dua tale na vuna oya baleta na Lotu e vakarautaka na madigi eso ni caka vinaka.
Sa vakacaucautaki na vakabauta na Kalou, ia e levu na tamata era via qarava e levu cake mai na vakarorogo ki na ivunau veivakauqeti se tatadrataka na nodra itikotiko mai cake.4 Era vinakata mera cakacakataka na nodra vakabauta. Era vinakata mera cokia cake na liga ni nodra sote ka vakaitavitaki ira ena cakacaka levu oqo.
Ka sa vakaoya na ka e yaco ni ra mai tomani keimami—sa nodra e vuqa sara na madigi mera vakayagataka na nodra taledi, yalololoma, kei na gauna ki na cakacaka vinaka. Baleta ni sega vei keimami na vakailesilesi vakalotu saumi ena neimami ivavakoso e vuravura taucoko, era qarava vakaiira na cakacaka vakalotu na neimami lewenilotu. Era sa kacivi ena veivakauqeti. So na gauna keimami dau veiqaravi wale; so na gauna keimami sa “qaravi wale.” Keimami sega ni raica na ilesilesi me icolacola ia me mai madigi ni vakayaco veiyalayalati keimami sa cakava ena yalomarau ni qarava na Kalou kei ira na Luvena.
Veivakalougatataki Vakamareqeti
A ikatolu ni inaki ka vuna era lewena kina na Lotu na tamata oya baleta na lakovi ni salatu vakatisaipeli e kauta mai na veivakalougatataki vakamareqeti.
Keimami raica na veipapitaisotaki me itekitekivu ni neimami ilakolako vakatisaipeli. Na noda lako ena veisiga vata kei Jisu Karisito e kauta mai na vakacegu kei na inaki ena bula oqo kei na reki vakasakiti kei na bula tawamudu ena vuravura ka lako mai.
O ira era muria na salatu oqo ena yalodina era levea na dredre e vuqa, yalorarawa, kei na veivutuni ni bula.
O ira na yalomalua kei na yalodina era kunea eke na iyau levu ni kila-ka.
O ira ka rarawa se luluvu era kunea na veivakabulai eke.
O ira ka lomaocaocataka tu ena ivalavala ca era kunea na veivosoti, bula galala, kei na vakacegu.
Vei Ira era Biubiu
Na vakasaqarai ni dina e sa vakayarayarataka e vica vata na milioni na tamata ki Na Lotu i Jisu Karisito ni Yalododonu Edaidai. Ia, e tiko e so ka ra sa lako tani mai na Lotu era a taleitaka ena dua na gauna.
Ena dua beka ena taroga, “Ke sa rui totoka vakaoti na kosipeli, cava na vuna e biubiu kina e dua?”
So na gauna eda nanuma ni sa baleta na nodra vakacacani beka se vucesa se itovo ca. E sega saraga ni kilai vakarawarawa na vuna. Na kena dina, sa ikoya ni sega ni dua ga na vu ni kena yaco ni veika duidui oqo.
Eso vei ira na neimami lewenilotu talei e dau vakayabaki na dredre ni nodra vakatulewataka rawa se sa dodonu mera biuta na Lotu.
Ena Lotu oqo ka rokova vakalevu sara na galala ni digidigi ni tamata yadua, ka a vakalesuya mai e dua na cauravou ka a vakataroga na taro eso ka qara na kena isau, keimami rokovi ira era vakasaqara na dina ena yalodina. Ena rairai voroka na uto ikeimami ni sa vakauti ira tani na nodra ilakolako mai na Lotu keimami taleitaka kei na dina keimami sa kunea, ia keimami doka na nodra dodonu ni qarava na Kalou Kaukauwa me vaka na nodra dui lewa saraga eloma vakaiira, me vaka saraga na noda vakayacora tale tikoga vakaikeda.5
Vakatataro Tawasaumi
Eso e sotava tu mai na dredre ni veitaro tawasaumi me baleta na veika era sa mai yaco se tukuni ena gauna sa oti. Keitou vakatakila raraba ka ni volekata na 200 na yabaki ni gauna ni Lotu—ka sala vata kei na dua na ituvatuva sega ni vakataotaki ni veika veivakauqeti, veidokai, ka vakalou—ka so kina na ka e tukuni ka vakayacori e rawa ni vakavuna na lomatarotaro ni tamata.
So na gauna e yaco mai na vakatataro eso baleta ni se sega ni tiko taucoko vei keda na itukutuku ka da na gadreva meda wawa mada vakalailai. Ni sa qai kilai vakaoti na dina taucoko, na veika a sega ni vakaibalebale vei keda eliu era na vakameautaki meda lomavakacegu kina.
So na gauna ena tiko na duidui ni vakasama ena ibalebale dina ni “ka dina”. E dua beka na taro ka vakavurea na vakatitiqa vei ira eso, ni oti na kena vakadikevi vinaka, ena taracake na vakabauta vei ira tale eso.
Cakacala ni Tamata Tawataucoko
Ia, me tukuni mada na ka dina, a tu na gauna era a cakacala kina na lewenilotu se iliuliu ni Lotu. A rairai tukuni beka se caka eso na ka e a sega ni veiraurau vata kei na noda yavunibula, ivakavuvuli, se ivunau.
Au vakila ni Lotu ena rawa walega ni vinaka sara kevaka e sa cicivaki mai vei ira na tamata era taucoko tu. E taucoko vakaoti na Kalou, ka sa savasava na Nona ivunau. Ia eda dau cakacaka ena Vukuna— ira na Luvena tawadodonu—ka sa dau caka cala na tamata taucoko.
Ena tabana ni ulutaga ni iVola i Momani eda wilika kina, “Ia, kevaka e so na ka e cala kina, sa cala ga ni tamata; ia me kakua sara ni vakalewai kina na ka sa virikotora na Kalou, ia kevaka dou sa vakalewa, dou na tarogi kina ena mataveilewai i Karisito.”6
Oqo na ivalavala e sa dau vakatu kina ka na vakatu oya me yacova na taucoko ni siga ka na mai veiliutaki kina o Karisito Vakaikoya ena dela ni vuravura.
E ka ni rarawa ni so e sa lutu baleta na cakacala ni so na tamata. Ia se vakacava na ka oqo, na dina tawamudu ni kosipeli vakalesuimai e kunei ena Lotu i Jisu Karisito ni Yalododonu Edaidai e sega ni vakadukadukalitaki, vakalailaitaki, se vakarusai.
Me vaka e dua na iApositolo ni Turaga o Jisu Karisito ka dua e sa raica vakamatata na veimatabose kei na cakacaka eso ni Lotu oqo, au vakaraitaka vakaidina ni sega ni dua na vakatulewa ka kilai tani me baleta na Lotu oqo se o ira na lewena e sa vakayacori mada me sega kina na vakasaqaqara vagumatua ni veivakauqeti, veituberi, kei na veivakadonui ni Tamada Tawamudu. Oqo na Lotu i Jisu Karisito. Ena sega ni vakatara na Kalou me kuitaki na Nona Lotu mai na kena kosi vakaturi se sega ni rawata taucoko sara na kena iyacoyaco vakalou.
E Tiko na Vanua me baleti Iko
Kivei ira na sa tawasei ira mai na Lotu, au kaya, kemuni na noqu itokani lomani, se tiko ga e dua na vanua me baleti kemuni eke.
Lako mai ka vakuria na nomuni taledi, isolisoli, kei na igu ki na neimami. Ena vakavuna meda na vinaka cake taucoko kina.
Eso ena rairai taroga, “Ia vakacava na noqu vakatitiqa?”
Sa itovo matau tu me tiko na vakatataro—na sorenikau lailai ni veivaqaqai yalodina e sa dau buroro vakawasoma ka matua yani me dua na oki levu ni kila-ka. E tiko eso na lewe ni Lotu, ena dua na gauna se tarava, era a sega ni vakananuma vakabibi se vakayalomatua na taro eso. E dua na inaki ni Lotu oya me bucini ka vakabulabulataki na sorenikau ni vakabauta—ena so mada ga na qele veinuku ni vakatitiqa kei na veilecayaki. Na vakabauta sa ikoya na vakanuinuitaki ni ka dina e sega ni rairai, ia e sa bera ni kilai sara.7
O koya gona, kemuni na taciqu kei na ganequ lomani—kemuni na noqu itokani talei—yalovinaka sara, vakatitiqataka taumada na nomu vakatitiqa eso ni bera ni o vakatitiqataka na nomu vakabauta.8 Me da kakua ni vakatara na vakatitiqa me vesuki keda ka tarovi keda mai na loloma vakalou, vakacegu, kei na isolisoli eso ka lako mai ena vakabauta na Turaga o Jisu Karisito.
Eso era na kaya beka, “Au na sega ni veiriti kei kemuni ena Lotu.”
Kevaka o rawa ni raica na lomai keimami, o na raica beka ni o tudonu vinaka mai na nonu nanuma. Ko na rairai kurabui ni raica ni tu na neimami gagadre, veika dredre kei na vakanuinui me vakataka ga na nomu. Na nomu ituvaki se susugi cake ena rairai duidui mai na ka o nanuma vei ira e vuqa na Yalododonu Edaidai, ia oqori ena rawa me na dua na ka ni veivakalougatataki. Kemuni na taciqu kei na ganequ, kei na itokani talei, keimami gadreva na nomuni taledi cecere kei na vakasama. Sa dua na ivurevure ni kaukauwa ki na Lotu oqo na duidui ni tamata kei na kawa tamata e vuravura raraba.
Eso era na kaya beka, “Au sega ni nanuma ni’u na bulataka rawa na nomuni ivakatagedegede.”
Oqori na vuna levu mo lako mai kina! Na Lotu sa tuvai tu me vakalomavinakataki ira na sega ni taucoko tu, na sotava tu na dredre, kei na oca. Era lewena tu na tamata era gadreva ena vunilomadra taucoko mera muria na ivakaro, kevaka mada ga era se bera ni qaseta taucoko sara.
Eso era na kaya beka, “Au kila e dua na lewe ni nomudou Lotu e dauveivakaisini. Au na sega ni lewena e dua na lotu ka tiko kina e dua me vakataki koya.”
Ke o vakamacalataka na dauveivakaisini me dua ka sega ni bulataka vakavinaka sara na ka e vakadinadinataka, sa da qai dauveivakaisini taucoko sara. E sega ni dua vei keda e sa vaKarisito rawa me vaka eda kila ni sa dodonu meda vakakina. Ia eda gadreva vagumatua meda dau vorata na noda cakacala kei na via cakava na ivalavala ca. Mai na yaloda kei na lomada eda sa gadreva sara me da vinaka cake mai na veivuke ni Veisorovaki i Jisu Karisito.
Ke sa ikoya oqo na nomu gagadre, veitalia sara na nomu ituvaki, na veika makawa me baleti iko, se na qaqaco ni nomu ivakadinadina, e tiko na vanua me baleti iko ena Lotu oqo. Mai, tomani keimami!
Mai, Tomani Keimami!
Dina ga ni tu na noda malumalumu vakatamata, au sa lomadei ni ko na raica ena kedra maliwa na lewe ni Lotu oqo e vuqa na yalo vivinaka ka ra tu ena vuravura oqo. Na Lotu i Jisu Karisito e vaka me dau dreti ira mai na dauloloma kei na dauveikauwaitaki, na yalodina kei na daugugumatua.
Kevaka o namaka mo kunei ira na tamata era sa taucoko tu eke, o na yalorarawa kina. Ia kevaka o vakasaqara na ivunau savasava i Karisito, na vosa ni Kalou “ka sa vakamavotaka na yalo sa mavoa,”9 kei na veivakayarayarataki ki na veivakatabui ni Yalo Tabu, ia eke o na kunei ira kina. Ena itabayabaki oqo ka sa malumalumu mai kina na vakabauta—ena itabayabaki oqo ka vuqa era sa yawa mai ena iovi kei lomalagi—eke o na kunea kina e dua na matatamata ka ra saga vagumatua mera kila ka toro volekata na nodra iVakabula ena nodra qarava na Kalou kei na wekadra, vakataki iko ga. Mai, tomani keimami!
Dou Sa Via Lako Tani Talega Koi Kemudou?
Au nanuma lesu e dua na gauna ena bula ni iVakabula ni ra a biuti Koya e lewevuqa.10 A tarogi ira na Nona tisaipeli le tinikarua o Jisu:
“Dou sa via lako tani talega koi kemudou?
“Sa qai kaya vua ko Saimoni Pita, Kemuni na Turaga, keitou na lako vei cei? Sa tu ga vei kemuni na vosa ni bula tawamudu.”11
Eso na gauna eda na sauma kina na taro vata ga oya. Eda sa via lako tani talega o keda? Se da na, vakataki Pita, tautauri matua ki na vosa ni bula tawamudu?
Kevaka o vakasaqara tiko na dina, na ibalebale, kei na sala me veisautaka na vakabauta ki na cakacaka; kevaka o vakasaqara tiko e dua na vanua mo ciqomi kina: Mai, tomani keimami!
Kevaka o sa biuta na vakabauta o a taura matua tu ena dua na gauna: Lesu tale mai. Mai tomani keimami!
Kevaka o sa temaki mo soro: Tiko tale mada vakalailai. E tiko eke na vanua me baleti iko.
Au vakamasuti kemuni kece ka rogoca se wilika na vosa oqo: Mai, tomani keimami. Mai rogoca na kaci malumu i Karisito. Colata na nomu kauveilatai ka muri Koya.12
Mai, tomani keimami! Ni eke o na kunea kina na ka sa vakasakiti ka tawavoli rawa.
Au vakadinadinataka ni eke o na kunea kina na vosa eso ni bula tawamudu, na yalayala veivakalougatataki ni veivueti, kei na salatu ki na vakacegu kei na marau.
Au masulaka vagumatua ni nomu vakasaqara dina vakaiiko ena vakavurea e lomamu na gagadre mo na mai tomani keimami. Ena yaca tabu i Jisu Karisito, emeni.